Vorfraid isch die scheenschti Fraid …

Vorfraid isch die scheenschti Fraid …

           

… oder s Fasnachtsfieber stygt! Dasch sicher bi jeedem Fasnächtler eso,
aber wenn foots denn aa aim tschuudere?

Quelle: Us em Krayejoggi Nr. 158 | Fasnachts-Ussgoob 2006

Wenn me d Blaggedde ka ans Revers hänge oder wenn me an die erscht Marschiebig goot oder wenn me d Eellimpe am Vogel Gryff gheert d Feschtspiil zerleege? S isch ebbe verschiide und doch hett e jeede sy ganz
bestimmti Vorfasnachtserinnerig. Im spezielle wenn me grad nonem Baum verruume die grooss Schissle firehoolt und mit Räppli fillt und zmitts in d
Stuube stellt oder wenn me kuum ka erwarte jeede Daag e Faschtewajie und Fasnachtskiechli zmampfe …
Im Stamm bruuchsch bstimmti Vorfraid-Aaraiz, wie Drummeli (aggtyv oder passyv), Pfyfferli-Biljee bstelle oder Spalungge schmigge, um in d Stimmig zko. Doch wie gsehts bi unserne Jungen us? Mir hänn zwai Gnäggis gfroggt, was fir si Vorfasnacht isch – baidi hänn e bsunderi Fasnacht vor sich …

Was isch so bsunders an eure nägg-schte Fasnacht?

Stephanie (S): Ych darf s erscht Mool bi dr Junge-Garde mitpfyffe! Florian (F): Fir mi isches au die erscht Fasnacht bi dr JG und daas grad no als Major.

Uff was fraied ihr eich am maischte?

F: Uff dr Morgestraich – dasch s scheen-scht! S: Au uff dr Morgestraich – vor
allem wägem Kopflatärnli!

Was gfallt eich an dr Vorfasnachtszyt?

S: s Larvemoole und ganz bsunders s Latärnemoole; do hett me denn immer so scheen dräggigi Finger!
F: Mir gfallt s Latärnemoole am beschte, do leert me ebbis und muess au meegliggscht gnau schaffe – me hett jo au e gwissi Verantwortig! S Perüggeknüpfe find y nit so spannend – do knüpft und knüpft me und denn
kunnt d Baschteldante und schiebt
alles widder zämme.

S: jo genau – denn ka me widder fascht vo vorne
aafoo …

Was gheert au no drzue?

F: Larve aabasse, Massnäh. S: Iebe! F: Intärns, s Offizielle. S: jo, doo isch me denn schambar nervös; aber Hauptsach me macht mit! Marschiebige und fir s Mami Gossdym naije …

F: und fir dr Papi: mit uns d Larve uffdaggle – wenn mir im Käller dr Baschteldisch uffstelle, kunnt langsam d Fasnachtsstimmig!
S: s Drummeli go luege!

Und kurz vor dr Fasnacht?

F: s Morgestraichziggs phagge und zem Grossi bringe! S: Schyferie und denn am Sunndig zem Grossi go, bevor mr uff dr Petersblatz geen – au doo darf ych jo serscht mool mitpfyffe! F: ah joo denn mache mir denn no unseri Klaider
baratt – dien si eso byygele, dass mr schenn dr Raihe noch uns kenne schnäll aaleege …

Kennet ihr denn iberhaupt schloofe vor em Morgestraich?

(Papi schwätzt dry: was haisst vor em Morgestraich – si kenne jetze scho bald nimme …)
F: wohrschynts nit! S: hmm – glaub au nit, will s doch so spannend wird sy …
Die baide wärde nit die ainzige sy, wo vor dr Fasnacht zappelig wärde und kuum hett si denn agfange, isch si scho widder umme – aber daas isch en anderi Gschicht! Zerscht aber fraie mr is alli zämme uff dr 6. Meerze! Me gseet sich am Spalebuggel!