Spalapfi 2006

Spalapfi 2006

           

E gstohleni Drummle, e Hörspiel, e ächte Top-Secret Dambour, e Lieferwaage vollpaggt mit Lääbensmittel, ebbe fimfezwanzig Böggli, säggsedryssig Spalektiv, d Zwillersisters in dr Kuchi und acht Oberpolizeigrossmeischter (aka Leiter). Das isch grob zämmegfasst s Spalapfi 2006 gsi. Aber pssst! Sträng geheim!

Dr Inspäggtor Glaser meint…

„Ufstoh! Spaladingsbums!“

D Dyyre gracht wieder ins Schloss und mi Vater lauft wieder d Stääge durab. Spalapfi heisst das! Nit Spaladingsbums, verdelli nomol! Wenigi Minute spöter hoggi im Spalapfi-Express und fahr in Spalekäller. S Kuchiteam und e Teil vo de Leiter wartet dert und zämme fahre mir uf Giswil. Unterwägs no schnäll e Käffeli in Sarne und die letschti Lääbensmittel yykauft, denn beziehn mir s Hauptquartier fir d Spalektiv. Sunne, 22° und e absolut friedlichi Umgäbig…

Knapp e halb Stund spöter wird die traumhafti Idylle mit Lärm erfüllt – 36 Spalektiv und 5 Leiter kemme lutstargg vom Bahnhof Giswil z laufe. Verbyy ischs mit dr Rueh… Nach enere grosse Portion Ravioli gohts scho ans schaffe – s Hörspiel „Die verschwundeni Drummle“ will erarbeitet wärde. Bereits am Noomidaag denn dr erschti Höhepunggt: e Dambour vo de „Top Secret“ isch us Basel agreist inkl. sinere Snare-Drummle und git e glaini Vorstellig vo sim Könne. Aschliessend dien d Damboure mit em Dänni Plattner e ähnlichs Stiggli yystudiere.

Nach dr Iebig „Brunigo“ wo quer durch Giswil sell gsegglet wärde het d Kuchimannschaft bereits dr Grill parat gmacht und es wartet die göttlichi Kombination vo Tomate-Gurke Salat, Klöpfer, Pommtschips und Marschmellos uf ebbe 46 hungrigi Müüler. Wär dänggt het, me giech frieh ins Näscht het sich tosche… me verzellt sich, as d Nachtwach in dr erschte Nacht am 03:49 Uhr gwunne het… denn sin au die letschte ins Näscht gange!

Dr näggscht Morge beginnt mit „Eye of the Tiger“ us em Ghettoblaster – e Art modärni Daagwach! Nach em z Morge und dr traditionelle Standpauke vo dr Carmen wird am Hörspiel wytergschafft – d Teggschtergrubbe macht die letschte Kapitel fertig, d Muusiggruppe baschtlet an dr Muusig und d Damboure studiere ihre „Flop Diskret“ Part yy. Pinggtligg zem Mittagässe träffe die beide Tom Lüthis vo dr Spale (Ralph & Phippe) nach enere Reis iber dr Glaubebärgpass in Giswil yy. Es git Älplermagrone… kilowyys… Nachdäm gwüssi Persone drah gschyteret sin, dr Öpfelmues durch d Magrone yyzsuuge gohts voruse fir anderthalb Stund Ballsport. Vergässet d WM, harti Action gits z Giswil uf em Hartplatz wenn d Spale JG schüttelet! Dr Teggschter vom Hörspiel het sich in dr Zwüschezyyt dr Joghurtsosse vom Ali-Baba Grill gwidmet…

Nach em Casting fir d Hörspiel-Rollene und emene Chili con Scharf hän die beide Verantwortigspersone gmeint, sie kennte dr Räschte vom Lager mit ihrer Iebig „Rotondo“ mied mache. Pustekuchen! D Leiter schigge kurzerhand dr Plätti im Auto vorus um die Iebig z lööse und gredänze aschliessend Läggerli. Sorry Megge!

Au die zweiti Nacht isch alles andere als ruhig gsi… OK, i kas nit beurteile, well ich nach dr Nachtwach in dr erschte Nacht gschloofe ha wie e Stei! Offebar hets aber Lyyt gäh, wo nit emol ihr Pyjama azooge hän… egal, Eye of the Tiger weggt au am zweite Morge nit minder erfolgryych. Pinggtlig am zähni isch s Hörspiel so wyyt, as das alli Grubbene s erarbeitete kenne vorfiehre. Jetzt ischs am Megge, d Sprächerrolle ufznäh und alles zu enere CD zämme z schnyyde. Well am Samschtig firs Grubbefötteli drey Persone nit abkömmlich gsi sin, muess das ganze bi weniger Sunne am Mäntig wiederholt wärde. Derfir hets jetzt e Büüle mehr uf em Fötteli!

Und denn, am Pfingschtmäntig am halber zwei isch in Giswil ändlich, ändlich wieder Rueh gsi. Dr Zug fir uf Basel isch am 6 ab 2 gfahre und bereits am 14:22 Uhr het dr Schlüssel an Abwart kenne zrugg gäh wärde. Und denn hän au d Leiter uf dr Fahrt in Richtig Basel no 90 Minute Pfingschtferie gha… Felsstürz hän halt au ihres guete – dr Gotthard blybt zue und d Holländer deheime.

Und wurd me mich frooge, eb ich s näggscht Joohr au wieder derbyy wär, denn wurd ich sage jo! Sone Zirkus muesch mol erläbt ha 😉

Dr Inspäggtor Glaser

PS: Bockia… es heisst Bockia!