100 Joor VSG (2006)

Dr Pfaarer vo Häsige hett mi aagfrogt, ob ych als Spalemer mecht e Ständeli ko bringe. Zämme mit mym Babbe han ych dä Aaloss denn gholfe organisiere.

Agfroggt zem mitmache hänn mir alli Dailnähmer, wo am disjährige Offizielle Bryspfyffe- und Drummle dien mitmache. Das sinn ganz e huffe Pfyffer und au e paar Damboure vom Stamm und vo dr Junge Garde, wo denn au zuegseit hänn. Die alli sinn froh gsi, vor e huffe Lyt uffzdrätte um s Musiziere mit Lampefieber besser kenne z`lehre.

Noodämm, dass mir am Blagettesamschdig im Spalekäller sinn go Blagette hoole, sinn mir in Hof vom Rothhuus gloffe. Dört hän mir uns uf dr Stääge uffgstellt und hänn gwaartet bis d Glogge vom Rothhuus Zwei gschlage hett.

300 Lyt hänn unserem Ständeli zuegloost wo mir mit em BaMa, em Dudelsagg und em Spaledöörli musiziert hänn. Dr Applaus isch riisig gsi und es hett glaub allne guet gfalle. Zem Dangg het dr Hedi-Götti-Major e Helge könne entgeege näh, wo im Spalekäller soll ufghänggt wärde.

Nachdäm mir uns mit Apérogebäck dr Buuch voll gschlaage hänn, sin mir in Baselstab e warmi Ovi go dringge. Zem Abschluss sin mir vom Rothhuus dur die ganzi Innerstadt gässlet bis zum Barfi. Dört hänn die vom Stamm scho wieder Durscht gha und sy hänn im Bruune Mutz öppis welle go dringge.

Zoobe han ych denn no im Telebasel e baar Sequänze vo unserem Uffdritt gluegt und bi voller Zueversicht uf’s Offizielle ins Bett go pfuuse. Waseliwas ych dräumt ha, schryb ych do jetzt lieber nit, denn sunnscht erfahret ihr no, dass y vor Lampefieber vor däm Offizielle fascht in d’Hoose gmacht haa…..

Dr Grienschnabel, Pascal Sarti