Spalapfi 2007

Spalapfi 2007

           

Me brucht also im Fall denn tatsächlich e Jagge im Spalapfi! Au wenns am Samschtig und Sunntig wirklig scheen isch, während em Spalapfi kas durchus passiere, as pletzlig 10cm Neuschnee ligge! Aber e rächte Spalapfiner kennt do natirlig nyt und goht freywillig no e glaini Wanderig go mache! Mir kenne das schliesslig vom Morgestraich…

  1. Bericht Spalapfi 2007: Bubi spiele Bubi gsund…
  2. Bilder vom Spalapfi 2007

Bubi spiele Bubi gsund…

Jo! Es isch scho wieder e Jööhrli ume und dr Spalapfisamschtig stoht vor dr Dyyre. Z Basel wartet bereits s Kuchiteam im Spalekäller wo dr Material-Express startet. Näbe Kilowyys Deigwaare, Ryys und Milch kemme au no so gspässigi Materialie wie Progi, Flipchartständer und zwei halbi Drummle ins Auto…

Nach emene Abstächer uf Buochs in d Migros und uf Ängelbärg in Coop gohts ins Lagerhuus „Alphorn“ – grad knapp bevor dr Car mit 47 Goofe yytrifft. Während ebbe die 47 s Lagerhuus dien inspiziere gohts in dr Kuchi bereits rund… Innerhalb vo ebbe 37.69 Minute wäggsle 20kg Ravioli ihre Aggregatszuestand. Industriepfanne sin halt eifach e geili Erfindig! Zwor wär dr Salat einige Teilnähmer frittiert lieber gsi, aber me ka jo nit alli Wünsch grad am erschte Daag erfülle!

Sujetkonform („Spiil ohni Gränze“) het d Musiggruppe zer Vorbereitig dr Arabi in sine einzelne Täggt zerleggt. Aschliessend sin die Täggt ney zämmegsetzt worde und es isch tatsächlich e neye Marsch drus entstande. Well Damboure halt nit sone simpels Instrumänt spiile wie d Pfyffer und me d Täggt bi de Damboure nit eifach ka usenandernäh, hän ebbe die Damboure grad als Afang e neye Drummelteggscht gschryybe. Me verzellt sich, as gwüssi Büslifahrer am Noomidaag kurz uf Luzärn gfahre syge zem Ruggsägg z hole, wo im Car vergässe worde sin…

Nachdäm dr Ping-Pong-Tisch us em Winterschloof erwacht isch, hän d Nochbere ändgültig kei Rueh meh gha. Zwüsche Fuessball, grilliere, drummle und schreyhölzerle hets ebbe 230 Rundene Rundlauf gäh. Erstuunlicherwyys ischs am Schluss immer d Kuchimannschaft gsi, wo im Final gstande isch. Verbindige zem Doggter Fuentes sin Gägestand vo de Untersuechige. Uf alli Fäll hets – Höhenluft sei Dank – bereits am eins z Nacht Rueh gäh. Isch im Fall wohr! Kasch dr Megge frooge!

Am Sunntig sin denn tatsächlich die ganze Materialie us em Spalekäller zem Yysatz ko! Dr Progi bruchts fir Montagsmaler… dr Flipchartständer fir zem Ladäärnehelge moole… d Ballonufbloosmaschine fir zem d Ballön vom Ballon-Dart ufbloose… d Büggse firs Büggsewärfe… e Materialschlacht sondersgleichen! E sone Daag Poschtelauf het allerdings (us Leitersicht) au sini Vorteil: wenn aschliessend no e Brennballturnier drahhänggsch sin alli mied. Inklusiv du sälber!
Aber dr Megge kennt kei Pardon und hets zuegloh, as d Gmeind Ängelbärg uns au no s Liecht duet stääle. So vo wäge Ruhestörig isch pletzlig s Liecht abgange und het im Wald wieder miesse gfunde wärde. Also Schueh ah, Fackle fasse, Räägeschutz nit vergässe und auf gehts! Nach ebbe 3km iber Stock und Stein het me s Liecht denn wieder gfunde und zruggbrocht. Operation geglückt, Patient tod(müde).

Nach enere kurze Nacht isch dusse d Frau Holle brutal am Küssischüttle gsi. Es het schwupdiwup grad emol 10cm Neuschnee gäh und somit het s Mittagässe im Wald miesse abgseit wärde. Hämmer d Prämierig vo de Schnitzelbängg und Ladäärnebilder halt dinne gmacht und derfir s Huus putzt. Isch au lässig gsi!

Jo… und denn isch scho dr Car wieder ko, het s Gepäck mitgnoh und isch denn irgendwo im Wald 47 Kinder und 3 Leiter go yysammle. Dr Räschte vo de Leiter isch zu däre Zyyt bereits am Kloschter Ängelbärg verbyy und uf em Wääg Richtig Basel gsi. Und siehe da… s Wätter isch mit jedem zrugg gleggte Kilometer besser worde! Isch wieder emol obertypisch! Mir friere uns in Ängelbärg dr Arsch ab und z Basel mache sie Beachparty! Aber wartet nur… irgendwenn drülle mir dr Spiess um! Denn fahre mol alli Eltere drey Daag ins Lager und mir mache Party!

I ha gschlosse
Dr Büslifahrer

Bilder vom Spalapfi 2007