JG Fasnacht 2009: Em Säuli si Dood

JG Fasnacht 2009: Em Säuli si Dood

           

Sujet2009: Em Säuli si Dood

Gäld elaige macht nit gliggligg – s muess eim au no gheere!

  • Vortrab: hänn no e Stutz
  • Reggwysyt: kasch ha fir e Stutz
  • Binggis: hänn no e Stutz
  • Lampe: dr Säulifriedhof;
  • Pfyffer: hänn kai Stutz
  • Majoor:isch die letschti Sparsau
  • Dambuure: hänn kai Stutz

Als Junge hesches nit eifacher wie die Alte! Ganz egal was de in dr Freyzyyt wottsch mache, immer wird alles tyyrer. Ob Glaider, Sport, Kino oder Mc Donalds – de bruchsch jedes Joor mee Stutz! Mir hän ys gfroggt, was me eigentlig no fir EI Stutz bikunnt… und s Ergäbnis isch nit wirklig rosig gsi!

Wenn fir jedes Röggli oder jedi DVD scho muesch s Sparsäuli schlachte kunsch jo mit em Spare nie uf e griene Zwyyg! So kas nit wytergoo – entweder es git mee Sagggäld oder d Pryyse wärde ändlig emol fir die Junge apasst! Wie selle mir Junge irgendwenn emol e Fahrpriefig mache, wenn mir in dr Freyzyyt immer gschröpft wärde? Wie wänn mir uns e Velo kaufe, wenn me derfir e Joor lang miesst schaffe? Wär zaalt ys unseri Skiferie wenn niene mee Schielerpryyse gälte?

Es isch e Verzwickti Situation! E jeedes Weekend goots em Säuli an Graage! E jeedes Weekend isch em Säuli sy Dood…

  1. Bilder vom Säulizug JG Spalefasi 09
  2. Zeedel 09: Em Säuli si Dood
  3. Fasnacht- und Zeedelvideo
  4. Mir wyyse druff hii

Bilder vom Säulizug JG Spalefasi 09

Zeedel 09: Em Säuli si Dood

Won-ych vor nit ganz fuffzää Joor
vom Barfi via Spaledoor
ha ins Drummle welle goo
han-y amigs s Drämmli gnoo.
Am Barfi hesch denn ändlos gwartet
bis s Drämmli isch dr Bärg uf gstartet.
S Byyljee hesch am Schalter poschtet.
Fuffzig Centimes het das koschtet.

Wott-y hyt in Richtig Spalekäller
Nimm-y s Velo – das goot schnäller
und koschtet mi kei miede Rappe.
Im Winter bruch-y zwoor e Kappe
doch duen-ych das gärn inveschtiere
wenns derfir nit so duet friere.
Mängisch dängg-y: „s wär no glatt
im Combino quer dur d Stadt!“
S wär nit schnäller – aber wäärmer
und ych wär hindedryy denn äärmer!
E Byyljee fir das Schwoobedrämmli
kan-ych mir arme Schlugger nämmli
wie hitzedaags die Allermeischte
bim beschte Wille garnimm leischte.
Vom Spaledoor zem Bruune Mutz
bruchsch fir ai Wääg scho zwei Stutz.
Wenn denn no wottsch e Bierli kaufe
ischs besser duesch die Streggi laufe!

Als Junge gspyyrschs no vyyl brutaler!
Fir uns isch s Ganze no fataler
und sorgt so jeede Daag fir Falte.
Im Gägesatz zu unsre-n-Alte
muesch hyt jeede RAPPE spalte,
wottsch im Koleegekreis mithalte!
Eb Natel, iPod oder CD
Eb Usgang, boarde, DVD
alles scheene uf dr Wält
koschtet permanänt mee Gäld!
Was uns Junge d Sprooch verschloot
isch em Sparsäuli sy Dood!

Dr Beni het dr Fuessball gärn
und wett drum unbedingt uf Bärn
go luege wie d Spaghetti-Pflutte
geege d Holländer dien schutte.
Dummerwyys meint dr Platini:
„Im Stadion bruchts keini Bambini!
die Byyljee – das sin alles mini!“
Drum sammlet dr Beni jetz Panini
und stellt denn fescht mit Spott und Hoon
„das Heftli frisst my ganze Loon!“

„Shopping bi dr Tally Weijl“
findet d Steffi, syg scho geil!
E kurzes Röggli und e Bluuse
ganz in Pink bedoond dr Buuse.
Derzue e Kunschtlääder-Stiletto
fertig isch d W. Nuss vom Ghetto.
„Ych wird wool nie zur Lolità
fir mych gits numme C&A…
E so findsch kaini Härzensbrächer
y will doch au emol e Schwimmwältmaischter!“

D Fabienne und dr Florian
hän sich gfunde – ganz spontan
und staple sich jetzt jeedi Nacht
woogrächt… bis d Matratze gracht.
Uf d Froog wie sie denn dien verhiete
foot dr Florian aa wiete
und meint: „bim allerbeschte Wille
hitzedaags nimmsch eifach d Pille.“
Well d Fabienne sichs nimm laischte ka
nimmt sy e Generika
und stellt nyyn Monet spöter fescht:
„ungniegend im Praxistescht!“

Es isch bekannt, fir sone Zeedel
bruchts e Dichter – guet und eedel.
Dr Zeedel isch e haiggle Boschte
nur sett dr Dichter nit z vyyl koschte!
Swiss Made hätti s Budget gsprängt
drum hets nit fir e Bebbi glängt.
„Zem unseri Dichterkeschte z sängge
mien mir e bitz globaler dängge!“
Do meint dr Tobi: „jo das wärs:
e Gummihals schrybt unsri Värs!“

Y kennt no zwanzig Byspiil bringe
vo Junge wo s glych Liedli singe.
D Freizyyt wird trotz dääre Fluet
vo Agebot zem Luxusguet.
Bowling isch nur fir die Ryyche
im Kino isch s Problem denn s glyyche
em Minigolf – so gheersch ein glaage
miesst me Maxigolf jetz sage…
sofärn mes uf dr Bryys bezieht!
Do gseesch was dir als Junge blieet:
Kegle, Billiard oder Dart
alles nur mit Mastercard!
Dr Rettigswääg us dääre Noot
isch em Sparsäuli sy Dood.
S Säuli duet sich scho beglaage
won-ys will zer Schlachtbangg draage:
„mir schleen die Pryyse uf dr Maage!
Jedes Mol goots mir an Graage!“
In däm Momänt machts klick im Kopf
y mergg, y bi en-arme Dropf
well s Spare sich nit het bewäärt.
My Sagggäld isch jetz nyt mee wärt!
Do kunnt aim denn scho dr Gedangge
„Was bikunnsch no fir AI Frangge?“
En-Achtel Dürüm kenntisch ha
oder zwei Drittel Cervelat
(Das Ziiriditsch isch scho-n-e Gwaal
doch fir dä Värs ischs ideal…)
Säggs Minute Kino ligge din
e halbe Dezi Tonic – ooni Gin
e Fimftel vo dr Nachtbus-Streggi
e Hundertnünzääntel IKEA-Deggi.
Alles scheene uf dr Wält
koschtet immerno zvyyl Gäld!

Momänt emol! Das stimmt so nit!
Mir hän ebbis wos gratis git!
Wenn s Martinsgleggli vieri schloot
und in dr Stadt no s Liecht abgoot…
Wenn d Magie mit de Händ kasch fasse
wells pfyfft und ruesst us allne Gasse…
Wenn d Schlegel uf de Fäll dien danze
schyssisch fir einisch uf d Finanze.
DÄ Momänt isch wunderbar!
Gratis – und doch unzaalbar!

E glaini Info firs Comité: s Sujet heisst allewyyl no “em Säuli sy Dood” und nit “em Seibi sy Dood”. Diend doch s näggscht Mol vor em Drugg vom Rädäbäng s Hirni e bitz meh strapaziere…

Fasnachtsvideos

Mir wyyse druff hii

  • dass me de Gnäggis gnueg Sagggäld mitgitt
  • dass me d Klaidig dr Witterig aabasst
  • dass me allefalls moll ane Fixphunggt goot go luege, wie s am Noowuggs goot
  • dass me de Binggis und Vorträbler e Notfalldelifoon-Nr. mitgitt
  • dass me d Gnäggis bim Abhoole abmäldet
  • dass me de Gnäggis uff e Wääg gitt, säbs zwait uff s Hysli z goo und daas au emene Beglaiter sait
  • dass in dr Zugsapideeg s neetigscht fir die glaine Boboli hett
  • dass d Beglaiter aghalte sinn dytsch und dyttlig mit de Gnäggis zreede, wenn dr Aastand us em Rahme gheit (s wird zuegloost, d Tisch uffgruumt und vor allem kai Ässe umegschosse!)Im Ärnschtfall wird au e Haischigge nid ussgschlosse…
  • dass dr Alkoholkonsum während em offizielle Dail verbotte isch und wenn me muess rauche, das nur absyyts vo dr Gruppe macht
  • dass me nie d Larve abzieht, wenn me in dr Uffstellig stoot
  • dass me nit ooni Larve ummebebberlet oder – fleetlet
  • dass d’Eltere (wo nit Begleiter sinn) NIT im Vordraab mitlaufe!!!