Stamm Fasnacht 09 – Dummy Sieche!

Stamm Fasnacht 09 – Dummy Sieche!

           

  • Sujet: Dummy Sieche
  • Vortrab: Dummy Sieche
  • Requisit: Aktievernichtismaschine
  • Latärne: S lychtend Eländ
  • Pfyffer: Dummy Sieche
  • Majoor: Dr oberdummy Siech
  • Dambuure: Dummy Sieche

Wow dasch e wundebari Fasnacht gsi, s‘ Wätter het entgege de Prognose e kleins Härz für d‘ Fasnacht gha.. es isch denne au nit so schlimm gsi, dass wägem Räge dr Ändstraich nur kurz aber drfür heftig gsi isch..  mehr Bilder kasch in dr Spalegallery im intärne Berych aaluege…

Also im Herbscht het unser Sujet no G’Opfer Dummy gheisse.. s‘ Gschäft oder besser gseit s‘ Sujet isch immer no s‘ glyche aber dr Name het gwägslet… wie das so in dr Wirtschaft üblich isch.. also nit verwirre lo.. mir sinn jetzte die Dummy Sieche und sage G’Opfer Dummy aber blybe immer no d’Spale die liebschti Glygge wo me sich vorstelle ka…

  1. Bilder vo dr Dummyfasnacht
  2. Dummy Sieche – Sujet in e paar Wort
  3. Zeedel
  4. Fasnachtsvideo
  5. Sujetpräsentation (login)
  6. Ändstraichgsichter (login)

Bilder vo dr Dummyfasnacht

Sujet 09- Dummy Sieche in e paar Wort

Syt meh als emene Joor git’s ei Thema wo die ganzi Brichterstattig in de Medie bestimmt: Finanzkrise.
In Amerika bikunsch Immobilie zu Schleuderpryyse well d Bsitzer ihri Zinse nimm hän kenne zahle. D Bangge göhn bankrott, d Wältwirtschaft lyydet und am Schluss isch dr Styyrzahler dr Dummi wo alles darf berappe. Hunderti vo Milliarde wärde vom Staat nochegschosse, well e paar Investmentbanker und Manager in ihrer Habgier d Wältwirtschaft an d Wand gfahre hän. E paar hundert Nase an dr Wallstreet und im Management vo de grosse Finanzinstitut sin derfir verantwortlig as die ganzi Wält darf zahle…

Verdummy nomol! De kunsch dr vor wie e Crash-Tescht Dummy! Mit uns ka me’s jo mache! Die dert oobe in dr Chefetage spiele Gott nach Luscht und Luune und uns verjaggts dr Schädel… Bisch grad no so scheen mit 180 uf dr Iberholspur gfahre, hesch dini Ersparnis fir e neys Hyysli oder e Auto usgäh und PÄNG – knallsch in e Wand! Vo 180 uf 0 in weniger als einere Sekunde…

De frogsch di scho, WAS isch eigentlich no sicher? Wie kas sy, as praktisch ALLI Bangge vo dr Wält dr glychi Fähler gmacht hän? Wie kas sy, as usgrächnet d UBS am meischte het miesse abschryybe? Wo selli mi Gäld aane mache, wenn d Bangge bankrott göhn und sich gägesyttig nimm dien traue? Verdummy nomol! D Wält isch brutal unsicher worde…!

D Spale macht d Wält e bitzeli sicherer! Mir opfere uns fir Crash-Teschts, damits die andere nit mien mache.
Spale 09 – iber Crash-Tescht-Dummies
Spale 09 – iber e Branche wo e rosigi Zuekunft hinter sich het
Spale 09 – iber dummy Styyrzaaler wos am Schluss an dr Wand verdruggt.

Spale 09 – Dummy Sieche

Zeedel 09: Dummy Sieche (Beerse-Crash-Dummy)

An däre Stell merci unserem Zeedeldichter Werni Laubi fir dr 40. Spale Stamm-Zeedel! Chapeau!

Es kunnt s Wort Dummy vo den Ami.
Die woonen in Amerika.
Wenn d redsch, no saisch statt Dummy: Dammy
(z Amerika isch s U en A).
Es isch e Dammy, wo d schrybsch Dummy
e Gschtalt uss Silikoon und Gummi,
wo maischtens ussgseet wien e Maa,
doch kaa me, wenn mi rächt due bsinne,
s Gschlächt vom Dummy schlächt bestimme,
si hänn fascht immer Glaider aa.
Wotsch d Sicherhait vom Auto teschte,
no machsch dä Tescht nit mit em Babbe,
de nimmsch zum Teschten en Attrabbe,
denn mit em Dummy gseesch am beschte,
worum s dä Waage zämmeleggt,
und dää, wo dinne hoggt, verreggt.

S isch alles sicher in der Schwyz,
es kaan ys nyt bassiere:
fir d Gsundhait hänn mir s Rote Kryz,
am Bahnglais d Barriere.
Dr Babbe, d Mamme und der Soon,
hänn jede Moonet Moonetsloon
und usserdäm griegt d Vroni,
(si isch syt zää Daag Directrice
im Hauptsiitz vo der Crédit Schyss)
e jedi Wuche Boni.

Und goot men als au zoobe spoot
in d Innerstadt go schwanze,
no het me nit, wenn s haimzue goot,
e scharf Stilett im Ranze.
D Polizischte sin presänt
und heebe hilfryych iiri Händ
uff Kinder, Grais und Fraue.
Hesch Gsparts, bringsch s ooni Angst und Stress
zur CS und zur UBS,
denn dääne kaasch vertraue.

Dien d Banggen ys nit s Spaare leere?
Und d Kunscht und s Kulturelle pflääge?
Dien si nit Gaischt und Gäld vermeere?
Sin si nit fir d Moraal e Sääge?
Doch wenn si sponsere und schängge,
no muess me folgendes bedängge:
“s Honorar fir en Adagio,“
haisst s bi der Glaibangg Saaresyy,
“koschtet is nyt, mir spares yy
mit Spesen und em Agio.“

Mir schwelge froo in Sicherhait,
s schyynt alles prächtig z glabbe.
Kai Analischt het zuen ys gsait:
“Ihr Duuble sin Attrabbe!“
Der Ospel wirbt mit Charme und Schliff:
“Styyged yy in s Invest-Schiff!
Solyyd isch s, wie d Armee-Gamälle
und trotzdäm elegant und chic
und unsinggbar wie d Titanic,
au in de Hedge-Funds-Wälle.“

Doch dert, wo Gäld und Gyyr regiergt,
sotsch wach syy und nit schloofe.
Denn wenn me d Crew nit kontrolliert
kunnt s zun ere Katastroofe.
Scho macht s uff der Kommandobrugg
uff Backbord ganz e bitzli „Glugg“
und s brietet fuuli Aier
unden im Maschineruum,
wo alles glaubt, das gheer zum Boom,
vergniegt der Pleitegeier.

Am Määndig dien denn d Wärtbabbiir
e bitzli ruggwärts laufe.
Der Wuffli sait: „Si sin nimm z dyyr;
jetz muess men erscht rächt kaufe!
D Performance, das isch ganz normaal,
fiert mänggmool dur e Wälledaal.“
Am Zyschtig singgt der Kurs scho schnäller,
am Mittwuch fascht dreihundert Pinkt,
am Donnschtig saust der Gwinn in Käller.
Am Fryddig schmeggt s der Letscht, dass s stinggt.

Vyyl z spoot hesch gmerggt, dass d Warnliecht blingge
und dass d Motoore rattere,
dass d Triple-A im Sumpf versingge,
d Piratefääne flattere.
Sogar der Hayek gspiirt dr Bruch,
doch dä glaubt no an Kinderspruch:
Schiffe ruhig weiter,
wenn der Mast auch bricht,
der Banker, dein Begleiter,
verlässt dich sicher nicht.

D Gschäftslaitig sait: „Mir hauen ab,
au wenn s ys wee duet in dert Bruscht!
S Aigekapidaal wird gnabb.
Das Wandern ist des Bänggers Luscht.
Die guete Zyte sin verbyy!
Pagged euri Boni yy.“
Der Dummy, wo am Boode gläbbt
het dä Crash nit iberläbbt.
Fir d Bonds, wo nimm Rendite draage,
griegsch kuum e Kaffi Sytewaage.

Zwor zaigt sich d Crew jetz generös,
und spändet, dasch nit ooni,
als Färsegäld Loon und Erlös,
samt Grati und de Boni.
Sii dien d Bedrääg grosszigig runde –
nadayrlig konsequänt noo unde.
Drum sin au d Spänden eender glai:
Sii glyyche sällem Hosegnopf
oder heggschtens sälle zwai
am Sunndig im Kolläktetopf.

Doch dängget draa: die scheeni Zyt,
wo s Schuldemache duet regiere,
kunnt zrugg. Es sprudle wiider Glaikredit,
wenn d Dummy brav dien investiere
und s gsparte Gäld uff d Bangge draage,
wenn d Boni-Bigger iine klage:
“Mir bruuche si, die glaine Spaarer,
die sollen iiri Batze gää.
S sait jo am Sunndig au der Pfarrer:
Gää isch sääliger als nää!“

Fasnachtsvideo