JG-FASNACHT 2011: D SCHWYZ UND YCH: EWIGI LIEBI…?

JG-FASNACHT 2011: D SCHWYZ UND YCH: EWIGI LIEBI…?

           

Sujet: D Schwyz und ych: ewigi Liebi…?

Im August dieses Jahres haben wir die Sujetsitzung durchgeführt und ein Sujet gewählt, welches den Arbeitstitel „Swissness“ trug. Es soll mit diesem Sujet gezeigt werden, was die Schweiz alles zu bieten hat, dass wir stolz sein dürfen Schweizer zu sein bzw. in der Schweiz zu wohnen. In den letzten Jahren hat die Schweiz als Marke auch immer mehr an Gewicht gewonnen und das weisse Kreuz auf rotem Hintergrund ist hip und trendy. Wir möchten durch den Zug der Jungen Garde, welcher als „Alpabzug“ dargestellt wird, verdeutlichen, dass nicht nur das Schweizerkreuz als Symbol hip und trendy ist, sondern dass alte Traditionen wie Jodeln, Schwingen, Alpabzüge etc. wieder Anklang finden und gerade auch die Jungen sich dafür begeistern.

Der Zug gliedert sich wie folgt:
Vortrab & Binggis stellen den klassischen Teil des Alpabzuges dar, die Kostüme bestehen aus Kühen und Sennen/Senninnen.
Die Junge Garde (Pfeiffer) werden ein Jodelchörli darstellen. Der Tambourmajor ist der Prachtstier. Die Tambouren JG werden als Schwinger durch die Gassen russen.

    1. Bilder vo dr JG-Fasnacht
    2. Dr Zeedel vo de Junge
    3. Zeedelvideo
    4. Fasnachtsvideo
    5. Yyschrybige 2011: Kumm doch au zur Junge Garde vo dr Spale Clique

Fasnachtsbilder

Zeedel 2011: D Schwyz und ych: ewigi Liebi…?

Ganz umgää an allne Ränder
vo grosse, fremdsprochige Länder,
bedroot im Süde, Weschte, Norde,
vo EU-Styyrfaander-Horde,
bekämpft syt Uurzytte vo oobe,
(dr Kenner waiss – dert hogge d Schwoobe)
regiert vo siibe Roorkrepierer,
benyydet vo de Wirtschaftsfierer,
beliebt bi Russe und Kineese,
liggt zwische-n-Alpe und Vogeese –
fascht scho in Vergässehait –
e Insle vo Gliggsääligkait.

E Land wo Milch und Honig fliesst,
wo niemer wirklig schaffe miesst,
wo d Gäldbäum us em Boode schiesse,
wo d Schugger jede frindlig griesse,
wo d Schoggibärge dien erstraale,
wo s bi Nationalrootswaale
nur Frinde git – kaini Rivaale…
E sone Land isch doch d Filiaale
vom göttlig Baredyys uf Ärde!
Em Hailand sini Lieblingshärde!

Zuegää… do fäält em Zeedeldichter
grad e bitz dr Linierichter!
Au doo bi uns im Heidiland
gits e mänge Daatbestand,
wo me sich derfir muess schämme.
Boni wo nit kasch yydämme…
Abstimmigsresuldat wo zaige
as mir e bitz nach rächts dien naige…
E Bundesroot wo zämmezuggt
wenn dr Schäuble Gift verspuggt…
E Wolf wo statt em Lamm-Gigot
Schrootkugele het iberkoo…
E Nationalroot wo unscheniert
syni Waalzeedel manipuliert…
(Fir d SP ischs die greeschti Stroof
jetzt hän die au e schwarzes Schoof…)

S isch nit alles Gold, was glänzt!
Nur syg an däre Stell ergänzt
as mir uf hochem Niveau glaage,
wenn mir s Schwyzerland dootsaage!
Banggghaimnis und Wirtschaftsgryyse,
Nääbel, Schnee und kalti Byyse,
Flugläärm, Harmos, AKW,
d Calmy-Rey im Négligé,
Tofu-Würscht und Mineral
e-viva Dioxinskandal,
oggerbruuni Perschpeggtive
dangg SVP-Initiative…
Quer durs Band ai Laitmotiv:
d Schlagzyyle isch negativ!

Die Polemik goot ys z wyt!
Mir glaube es isch heggschti Zyt
as me mit Stolz repräsentiert
was aim als Schwyzer definiert.

S wysse Gryz isch nur s Symbool,
wo als Qualidätsmerggmool
dr ganze Wält verkinde duet:
DAS Broduggt isch wirklig guet!
Saggmässer und Raclettekääs
gälte erscht als bsunders rääs,
wenn das Gryz uf rotem Grund
lyychtend in Erschyynig kunnt.
Duesch das Gryz als T-Shirt draage
wottsch als Maa dermit doch saage:
„Maitli – ains kani verspräche –
I bi zimlig guet im… skifaare“

Und glychwool… s Gryz isch nur Symbool!
E unverkennbors Muettermool
wo d Wärt wo fir ys Schwyzer zelle
mängmol duet in Schatte stelle.
Neutralidäät und Toleranz,
Pinggtligkait und Konkordanz,
vermischt mit langer Tradizioon,
Beschaidehait und Prezisioon,
serviert mit rainer Bärgkultuur,
Nadyyrligkait als Garnituur…
Das Menu wo mir do kreiere
losst sich gottlob nur schwäär kopiere.
E Mänge wurd – statt z kritisiere
gscheiter e Borzioon probiere!

D Schwyz isch – so wie mir das gseen
„in“, modärn und fotogeen,
well drotz globaale Interässe
mir unsre Uursprung nit vergässe.
Wottsch hytzedaags erfolgryych sy
bruchsch – nääbe Muet und Phantasie
Erfaarigswärt wo druff kasch zelle!
Drum „vive la Suisse“ yyr lingge Gselle
s wär scheen yyr wurdets fertig bringe
iiber eyre Schatte z springe.
Integration vo Fremdkultuure
startet bi de Chriesibuebe… äääh –buure!

Dä Alpabzug – scheen inszeniert
sell zaige, as es ys fruschtriert
wenn me-n-ys ständig antiquiert
und ufs Heidi reduziert.
Genausogärn geen mir im Mai
zrugg uf d Alp – wyt wäg vo dehai.
Dert oobe ischs ys warm und woolig
d Bärgluft isch die bescht Erhoolig!
Tradizioon und Modärne – grad vis-à-vis
das ka nur ewigi Liebi sy !

Yschrybyge fir Maitli und Buebe ab 7 Joorsinn an de Samschdige, 19.3., 26.3. und 2.4. jewyyls vo zwai bis am vieri am Nomidaag im Glyggekäller an dr Schitzemattstroos 16a (Yygang Hinterhoof vo dr Poscht)

Die Jungi Spale macht am Drummeli 2014 d Drummel- und Pfyfferschuel. Schryyb Di yy, denn stoosch au Du uff dr Biihni!

Unseri Fasnachtsbaiz Spalungge am Pflueggässli 10 isch immer denn offe,wenn s’Ladärnli brennt.

Am Frytignoomidaag 18.3., und am Samschdig dr 19.3., dien sich alli Jungi Garde im Comité-Zält uff em Seibi vorstelle! Kumm go luege und schnuppere….

Zeedelvideo

Fasnachtsvideo

Bummelbilder