Spalapfi 2011 – Thema „SpaleTV“

Spalapfi 2011 – Thema „SpaleTV“

           

Samschdig, dr <<AneFahreUspaggeThemaKennelerne-Daag>>

Es isch widr emol so wyt gsi. D‘ Spalapfi-Deilnäämer hän sich am Samschdig, em 11. Juni 2011 am viertel vor Nyni am Morge gegeniiber vom Badische Bahnhof troffe und sin denn mitem Car uf Herrischried gfahre. Das liggt oberhalb vo Bad Säckingen im grosse Kanton.
Nachere kurzwiilige Fahrt sin mir denn vo de räschtliche Leiter vorem Huus empfange worde.
Nach dere härzligge Begriessig hän mirs uns in unserene Zimmer gmietligg gmacht und e baar Sache uspaggt. Am Beamer und dr Lyynwand, wo im Ässzimmer gschtande sin, het me gmergt, dass au dr Tortellini (s’Hämpfeli) dr Wäg do uffe nach Herrischried gfunde het. Voller Vorfreud uf d Präsentation vom Thema (ebbe mit Beamer und Co.) hän mir uns am Nomidaag im Spyssaal troffe.
Denn isch s grossi Gheimnis glüfftet worde: S Spalapfi 2011 wird unterem Name „Spale TV“ stattfinde. Grad aschliessend an die Vorstellig hets no e glaini Ifierig ins „Film-Business“ gä. Uff was muess me luege bim Filme? Welli Kameraystellig sott me benutze? Das und viil meh hän mir an däm Nomidaag glernt.
D Laiter hän sich scho sehr viil Gedangge gmacht, was me für Themene könnt dreihe. Doch für die Umsetzig hän mir zerscht mol Gruppe miesse mache. Schnäller als erwartet sin die Gruppe zschtand ko und me het könne loslege. Zerscht hän mir uns in de Gruppe beroote und abgsproche, denn hän mir eins usgwählt und schliesslich het me e sogenannts Story-Board miesse verfasse. Dört inne stoht ganz genau, was in dere Szene alles vorkunnt und wie d Kameraystellig muess si. Was die verschiedene Gruppierige alles so usgwählt hän, will ich jetzt aber nid priisgä!

  1. Bilder vom Spalapfi 2011
  2. Samschdig, dr <<AneFahreUspaggeThemaKennelerne-Daag>>
  3. Sunntig, dr <<DreiharbeiteFilmeIebeUfnää-Daag>>
  4. Mäntig, dr <<UfruumNomolFilmeMinigölfeHeifahre-Daag>>

Ebbis het aber an däm scheene Samschdig au nid dörfe fähle. E Baad im glaine See unterhalb vom Huus. Muetig hän sich e baar in d Fluete gworfe und sin aber gly widr use, es isch nämligg seeeeeehr kalt gsi!
Zem Schluss vom Daag Eins muess ich no unseri Nachtwanderig erwääne. Mir häns uns grad welle gmietligg mache und dr Film „Forrest Gump“ luege, do hets plötzligg ghaisse, dass unseri Popcorn „entfiert“ worde sin. Sofort hän mir warmi Kleider ahgleggt und sin durch d Dunkelheit in Wald verschwunde. Nach e baar Schreck-Sekunde für die einte und Lach-Ahfäll für die andere (mir könne jo au nüd drfür das d Fraue so schreckhaft sin :-)) sin mir denn ändligg ane Fyrstell ko. Dört hän uns zwei gschpängschtigi Figure mit Nosferatu-Larve empfange. Mir sin denn jede einzel zem Füürli gange und hätte drei schweeeeeri Froge sotte beantworte. Will me die eifach nid het könne beantworte, het me miesse Häxebluet dringge (Ihr wänd gar nid wüsse was din gsi isch!!).
Ich bi uf dr Name Choucroute dauft worde und erwähn das nur, damit au dr Oli nomol gseht, wie me das richtig schriibt! 🙂
Nochdäm alli ihre Name ka hän, sin mir widr s Loch ab durch d Dunkelheit zrugg ins Huus go pfuuse.

Sunntig, dr <<DreiharbeiteFilmeIebeUfnää-Daag>>

Nach emene gmietligge zMorge sin mir widr in de Gruppe zämme ghoggt und hän die bereits vorbereitete Szene giebt. Erscht wo wirgligg jedes Detail gschtume het, hän mir könne ufnää.
Trotz em Iebe hän mir sicher jedi Szene mehreri Mol ufgnoh. Es isch wirkligg e super Erfahrig gsi, emol mit Kamera und Stativ zschaffe.
Nodyrligg het au am Sunntig e Bad im Dümpel nid dörfe fähle. Nach dr wohlverdiente warme Duschi und emene eimol meh usgezeichnete zNacht hän mir denn no dr Film vom Samschdig fertig gluegt (Forrest Gump).
Nur will dr Bricht vom Sunntig so kurz isch, haisst das no lang nid, es sig nüd los gsi! Will aber alli Gruppe mit Dreiharbeite beschäftigt gsi sin, will ich keini Details verroote!!! 😉

Mäntig, dr <<UfruumNomolFilmeMinigölfeHeifahre-Daag>>

Au am Mäntig hets widr e super zMorge gä. Denn sin mir vo de Leiter in neui Gruppe ydeilt worde und hän nomol e Kamera in d Händ druggt beko. S Ziel vo däre Iebig isch gsi, e Wärbespot zdreihe. Und zwar het me äntwäder miesse öbberem d Spale-Clique schmackhaft mache odr öbber überzüüge, mit ins Spalapfi zko. S Ändproduggt sin ungschnitteni Filmli, wo bi dr Vorstellig für e mänge Lacher gsorgt hän.
Will dr Vermieter von dr Hütte irgend e Gnuusch gha het, isch die neui Gruppe anstatt wie abgmacht am drei am Nomidaag scho am 12i uf dr Matte gschtande.
Mir hän uns denn verzooge und sin go Minigölfle. Das isch mega luschdig gsi, denn plötzligg sin die eigentligg eltere Generatione vo dr JG widr gaanz kleini Buebe worde! 🙂

Punggt Drei isch denn au dr Car vo Herrischried zrugg in d Zivilisation abgfahre. Nachere eher stille Fahrt, die meischte hän pfuust, sin mir widr wohlbehalte in Basel ahko.

An däre Stell will ich mi nomol ganz härzligg bi unserem ganze Leiter-Team bedangge. Es isch eimol meh e HAMMER WEEKEND gsi!!!!!
E bsundere Dangg goht au in d Kuchi an Sandro und d Jacqueline. Si hän wieder emol bewiise, dass es wirgligg Lager git, wo me s Ässe ka Ässe nenne!

Ich wünsch euch allne e schöni Zyt und freu mi, im Joor 2013 mit euch widr Fasnacht zmache! (Jä du hesch richtig gläse, ich mein nid im 2012! :-))

Es griesst,

Choucroute (Gäll du kennsch mi nid!?)

Bilder vom Spalapfi 2011