JG-FASNACHT 2012: Zumba-Fieber
Sujet:Zumba- Fieber
«Mir sin im Zumba-Fieber» lautet das Sujet der Jungen Garde für die Fasnacht 2012. Zumba heisst die neue Art seinen Körper in Form zu halten. Die Verschmelzung von Tanz und Fitness wurde vom kolumbianischen Fitnesstrainer «Beto» Perez erfunden und zuerst in den USA eingeführt. Zumba erfreute sich grosser Beliebtheit und wurde schnell zum welt- weiten Kult. Zumba vereint heisse Latino-Rhytmen mit einfach nachzumachenden Bewegungen zu einem einzigartigen Fitnessprogramm.
«Mir danze durch d Gasse zu Piccolo- und Drummelkläng» – Die Junge Garde zeigt an der Fasnacht, wie Zumba langsam auch auf die Fasnächtler übergreift.
Der Zug gliedert sich wie folgt:
- Voordraab macht no Fasnacht und danzt nooni, aber d Binggis sinn scho halbwäggs vom Zumba-Fieber befalle
- Requisit isch Zumba puur
- Ladäärne zaigt Zumba puur
- Die wo pfyffe sinn im heggschte Zumba-Fieber
- Dambuurmajoor kunnt go Fiebermässe
- Die wo drummle sinn au im heggschte Zumba-Fieber
Fasnachtsbilder
Zeedel 2012: Zumba-Fieber
Dichtet vom Yves Schachenmann
An de Feschtdääg issisch hemmigslos! Laggs und Foie Gras sin grandios
s Bouquet vom Roote isch famos
und s Dessert zindet denn furios
mit Armageddon-Melodie
e Fyyrwärgg voll vo Kalorie.
Wottsch e bessers Keerpergfyyl, denn danz Zumba meeglichscht vyyl! Nur in Italie kunnt das Zumba,
nit verbyy am BungaBunga…
E Schritt nach vorne, eine zrugg,
us dr Hifte lyychte Drugg,
d Händ dien rhythmisch ummeschwängge, s Beggi duet sich aabesängge,
d Ärm zeichne druff e grosse Booge,
s gseet us wie dr Morin Guy uf Drooge!Bim Danz wo in Kolumbie wurzlet,
sin d Kilos vo de Zumbas burzlet.
E Zumbakurs isch scho nit gschänggt, näbem Gwicht het är au s Budget gsänggt. Dä Kurs duet Dir nit nur e Gfalle,
muesch dr Rieme dopplet änger schnalle!Friener vor gnabb dryssig Joor,
– schrilli Glaider, schreegi Hoor –
in ängi Leggins zwängsch di Ranze,
nur zem go Aerobic danze.
Die Wälle isch denn gly verebbt,
me het im Fitnesscenter gstebbt
und bald druffaabe – lueg d Frau Fehr aa, macht jetzt jede Capoeira.
Tae Bo und gnau so s Aquajogge, meege d Lyt nit ganz so logge,
derfyr schloot denn s Pilates yy,
jede isch im Kurs derbyy.
Die findig gschiggte Gschäftsgenosse, hän druffaabe gly beschlosse,
me sott si eigne Body toone,
das wurd firs Boortmenee sich loone.
Eb „Pörsnl-Trainer“, Power Plate,
startet morn, it’s not too late!Doch all die Trends sin schnäll vergange,
nur mi Wampe, die blybt hange!
Hyt isch Zumba danze in,
und macht uns’ri Gsellschaft dinn.
Wurde d Lyt nur massvoll ässe,
kennte si dä Saich vergässe!
Dr Gäldseggel wär dopplet froo…
– numme ischs halt nit esoo.Doch Zumba het au gueti Sytte,
meint scho gly e glaini Grytte:
„Lueg emol d Lyt im Alldag aa,
ganz egal eb Frau eb Maa,
seesch kuum emol e freeligg Gsicht, beesi Myyne – meinsch syg Pflicht.“
Faal und grau dien d Lyt amuete,
gseen oft s Schlächte statt em Guete.
Do bringt das Zumba Farb ins Lääbe,
s wird sich beweggt statt Sässelglääbe. Me darf nit nur lache, sogar straale,
und erscht no mit em Gnaggarsch braale. Dr Vordänzer – ych bi am Stuune,
straalt und sorgt fir gueti Luune.
Är het Energie fir zwai,
im Härze und au in de Bai.
Wie dr Haas vo Du-ra-cell,
lacht und danzt und gumpt dä Gsell. Miechte mee dä Zumba-danz, gsächt me in de Auge Glanz!
Dert e Farbkläggs, do e schmunzle,
statt grau in grau und Stirnerunzle.
Es wurd e Mängem gar nit schaade,
wurd är sich in dem Froosinn baade,
denn syge mir doch emol eerligg,
uns Schwyzer goots im Grund gnoo herrligg. Vyyl z sälte dien mir d Fraid au zaige,
dien im Geegeteil zu Unmuet naige. D Mensche in dr dritte Wält,
hän Fraid – anstatt e huffe Gäld.Wenn zem Winteränd nach Basel faarsch,
und s haisst: „Morgestraich, vorwärts, Marsch!“ denn isch das Grau z Basel verschwunde,
d Clique dreie iiri Runde,
faarbigi Räppli fliege dur d Luft,
furt kunnt au die farblos Kluft.
Goschdyym gseesch in allne Farbe,
d Larve ersetze d Alldaagsnarbe.
E ganzi Stadt stoot drey Daag Kopf,
mir sin nimm grau, hän farb im Topf!
Wie d Fasnacht begeischteret au s Zumba d Masse, drum duet das s Sujet so guet passe!Worum ych gang isch rächt pragmatisch, dr Vordänzer isch mer seer zumpatisch…
Aabelaade: Zeedel_2012_Junge Garde Spale Clique
Yschrybyge fir Maitli und Buebe ab dr erschte Klass sinn an de
Samschdige,
- 03.03.2012
- 10.03.2012 und
- 17.03.2012
jewyyls vo zwai bis am vieri am Nomidaag im Glyggekäller an dr Schitzemattstroos 16a.(Yygang Hinterhoof vo dr Poscht)
Usskunft gitt d Obfrau: Bettina Meier, 079 384 03 20 / bettina_meier@gmx.ch
Die Jungi Spale macht am Drummeli 2014 d Drummel- und Pfyfferschuel. Schryyb Di yy, denn stoosch au Du uff dr Biihni!
Unseri Fasnachtsbaiz Spalungge am Pflueggässli 10 isch immer denn offe,wenn s’Ladärnli brennt.
Am Frytignoomidaag 02. und am Samschdig dr 03. Meerz, dien sich alli Jungi Garde im Comité-Zält uff em Seibi vorstelle! Kumm go luege und schnuppere….
Zeedel und Lampevideo
Dr Zeedel und Lampe Film vom Raphi:
