Glygge-Grimpeli 2015 uff dr Schützematte

Glygge-Grimpeli 2015 uff dr Schützematte

           

D‘ Spale kämpft am dasjöhrige Grimpeli erfolgrych mit

Am letschte Wuchenänd im Juni het s mittlerwyle traditionelle Glygge-Grimpeli stattgfunde. Ufgrund vo de Bauarbeite nit uff em Sandgruebe Areal sondern in de Sportalage vo dr Schützematte. Nachdäm mr letschtmol kei Team us dr JG hän könne amälde, isch d‘ Spale das Joor grad mit 3 Mannschafte („Krayejoggis“ bi dr Kategorie Jungi, „Krayejoggelis“ und „Krayejoggelinhos“ bi de Binggis) vo dr Junge Garde verträte gsy. Drnäbe hän d‘ „Allez-les Fresch&Co“ bi de Schutter und „Schölölö-Spale“ bi de Gmischte teilgnoh.

Für d‘ Binggis Mannschaft, wo vom Matthias coacht worde isch, het s Turnier leider scho am Samstig es Änd gfunde. Das nachdem me in dr Vorrundi, trotz super Ysatz, nur grad ei Spiel het könne für sich entscheide.

Ähnlich isches au dr Stamm-Mannschaft in dr gmischte Kategorie ergange: 5 Pünkt Abstand zum Tabellezweite hän au do s vorzytige Ändi und e freye Sunntig bedütet (das isch natürlig kei Grund gsy am Sunntig dehei z blyybe, me isch trotzdem uff d Schützematte cho und het die andere Teams unterstützt)

D‘ Mannschaft us de Junge coacht vom Florian (Hediger) hets ebefalls in zweite Turniertag gschafft. Leider isch nach de erste beide verlorene Spyl vo dr Gruppephase denn au scho fertig gsy.

Nachdäm sich am Samstig d‘ „Krayejoggelinhos“ (coacht vom Olav) hervorragend uff e zweite Platz hän könne spyle, ischs denn am Sunntig richtig Ärnst worde. Nacheme souverän gwunnene erste Spyl isch d‘ Stimmig mit de folgende zwei sehr knappe Niederlage (3:4 und 4:6) ufgrund vom Usscheide kurzfristig uff em Tiefpunkt aglangt. Trotzdäm freue sich glaubs alli uff die nächsti Usgoob vom Glygge-Grimpeli immene Joor, wenn die mindestens ei Kopf grössere Jungs vo de Gegnermannschafte e Kategorie wyter sin 😉

Bi de „Allez-les Fresch&Co“, dr Stamm-Mannschaft wo bi dr Top-Kategorie „Schutter“ aträte isch, het me sich das Joor vorgnoh d‘ Energie und Konzentration bis zum Schluss z bhalte. Nacheme souveräne Gruppesieg am Samstig (alli 3 Spiel gwunne); ischs am Sunntig scho gly spannend worde: Während s erste Spiel ime Unentschiede g’ändet het, het me im zweite Spyl e 0:2 Rückstand ine 4:2 Sieg könne umwandle. S letschte Spyl in dr Gruppephase het wiederum unentschyde gändet und die „Griene“ sin mit glycher Azahl Pünkt und Goalverhältnis wie d‘ „Schnurebegge 1926“ uff em 2. Tabällerang gsy. Dank dr Mehrzahl an gschossene Goals hets denn aber fürs Halbfinal glängt, so dass dr Sieg zum gryffe noch gsy isch. Nach eme spannende Halbfinal-Match isch unentschyde gstande und so hän beidi Mannschafte ins Penalty-Schiesse miesse. Trotz grosser Unterstützig us dr Spale isch unseri Mannschaft leider am gegnerische Goalie gschytert und so isch me „nur“ in dr kleini Final koh. D‘ Energie isch aber bi de allermeiste durch die asträngende vorherige Matches in dr pralle Summer-Sunne scho fast uffbrucht gsy, so dass es schlussändlig nur für dr undankbari 4. Platz glängt het.

Nichtsdestotrotz simmer stolz uff alli vo euch, wo bi däne heisse Temperature zämme Spass am Fuessball uff dr Schützematte kha händ!

Undedra findsch d‘ Teamfotis vo de JG-Mannschafte. Wyteri 19 Bilder findsch im Intärne Berych. (Bilder 2015 -> Glygge-Grimpeli)

(e coach vom spylfäldrand.)

d‘ Krayejoggelis (Jungi)

d‘ Krayejoggelis (Binggis)

d‘ Krayejoggelinhos (Binggis)