Website Redesign

Website Redesign

           

Liebi Bsuecherinne und Bsuecher vo däre Websytte

S Wichtigschde zerschd

Nach über 6 Joor isches widr mol Zyt worde für e Redesign vom Spale-Internetuftritt. Bim däm Redesign sin 2 Hauptziel im Vordergrund gstande:

  • Zum eine s schnälle Uffinde vo de meist gsuechte Informatione. Das sinn näbe de aktuelle Bydräg zu Drummeli, Fasnacht etc. vor allem s Repertoire zem Loose, dr intärni Berych und für Extärni au dr Spalekäller. Das alles ohni die wichtigsti Infoquelle – dr Spaländer – z fest z verstecke.
  • Zum andere isch e so genannts „responsive“-Design im Vordergrund gstande. Ob Tablet, Smartphone, Desktop, FullHD etc. es wird immer die glychi Sytte glade und denn entsprächend dr Breiti noch apasst. Es git dorum au kei spezielli Mobil-Sytte me.

Archiv-Transport und Uffruume

Die bishärige Inhält in Form vo Bydräg sin alli vo dr alte Website importiert worde, d Linkstruktur het sich nit g’änderet. Die statische Sytte sin allerdings ufgrumt worde, ev. sin es paar Sache nüm am alte Platz. Damit de aber schnäll zum gwünschte Inhalt kunsch, gits d Quickjump-Buttons: 6 Links zu de meistgsuechte Infos. Wyteri Inhalt findsch über s Menü ganz oobe. Falls de öppis gar nid findsch, kasch d Suechfunktion oobe rächts nutze.

Die 2 wichtigste Sytte für Extärni: „Kum doch zer Spale JG“ und dr „Spale-Käller“ (mit super Fotis vom Raphael Alù) sin ganz neu und schöpfe s neue Design voll us. Gang doch mol go luege!

Für die technisch interessierte

Als CMS (Content Management System) kunnt wyterhin wordpress zum Ysatz. Als Basis für s Design dient Bootstrap v3 und s Theme paper. S ganze wytere Design isch komplett „vo Hand“ im Code-Editor (IntelliJ Idea) entstande. Die beide Spale-Kaländer uff dr Frontsytte (Jungi und Stamm) wärde durch e REST-Schnittstell über d Google API abgruefe und im e PHP-Script ufbereitet. S Hosting isch by dr Basler Firma cyon ime Rächezentrum bi dr IWB. Momentan brucht useri Sytte inkl. de diräkt ybundene Mediedateie 5.5 GB Speicherplatz, d MySQL Datebank hindedra het aktuell 19’000 Yträg. S Fotoarchiv bi Google Drive isch über 60 GB (!) gross. D‘ Spale Website het pro Monet ca. 500 Unique Visitors, im Fasnachtsmonet (Februar/März) sins ca. 2-3 mol so vill.

Hesch e Fähler gfunde oder Amerkige?

Nachem Import vo mehrere hundert Bydräg und über 1000 Mediedateie ka sehr guet öppis verlore go. Ebeso bini froh falls ihr mir schrybe würdet, falls d Website uf eurem Grät doch nit so toll usgseht. Für Kritik/Lob/Feedback bini natürlich au sehr offe. Ihr erreichet mi am beschde via Kontaktformular oder über d Sekretariats Mail vo dr JG: jungi (at) spale (punkt) ch