Spale am Offizielle 2017

Spale am Offizielle 2017

           

Au Disjohr het einigi Spalemer und Spalemerinne wieder dr Ehrgiz packt und si hän am Offzielle mitgmacht, wo vom Do, 26. bis am Sa, 28. Januar stattgfunde het.

Am Donnschtig het als Erschts d Vorusscheidig im Einzel stattgfunde. D Konkurränz isch wie immer gross gsi. Das het aber d Nicole Meyer-Lehner nit gstört und si het sich souverän für dr Final am Samschtig qualifiziert. Für dr Florian Stähli und dr Chrstian Walk hets leider nit ganz glängt.
Au im Solo Duo isch d Spale verträtte gsi. D Duos Dominique Saladin und Dominic Plattner (Naarabaschi) sowie Christian Walk und Patrick Meyer (Die Gääle Daggel) sin glaub immer no beflüglet gsi vo ihrne Erfolg letschti Johr und hän sich ihres Finalticket gsicheret.

© Bilder: Beat Schwald, fasnacht.ch  

Am Fritig hän denn d Gruppene miesse ind Hoose stiige. Bsunders uusez’hebe sin do die Jungi Dambouregruppe, wo sich uf e guete 6. Rang im Saal drummlet het. Es isch immer schön z’gseh, wenn dr Noochwuggs dr Muet und d Motivation ufbringt sich dr grosse Uuseforderig z’stelle und am Offizielle mitz’mache.
Bi de Alte hets denn ebeso die eint oder ander Amäldig gäh und zwar sin das äi Dambouregruppe und zwei Pfyffergruppene gsi.
Bi de Pfyffer isch dä Fritigobe leider vo knappe Entschäidige prägt gsi. Au e sälbständige Sombrero uf dr Dominique ihrem Kopf bi dr einte Pfyffergruppe und e wunderschön vordreite Fischmärt vo dr andere Pfyffergruppe, wo sich ämel im Publikum alli einig gsi si, dass dä finalwürdig gsi isch, hän leider nit ganz glängt über e 4. Rang im Saal uusez’ko. (Die erschte drei Gruppe in dr Vorusschäidig qualifiziere sich für dr Final.)

Au bi dr gmischte Konkurränz isch denn s Niveau wie jedes Johr wieder hoch gsi. D Spalegruppe het denn nomoll alles gäh und es het schlussändlich dr gueti 8. Rang uusegluegt.

Nachdäm d Spale in de letschte Johr mit vielne Finalischte vom Erfolg verwöhnt gsi isch, isch disjohr s nötige Quäntli Glück leider nit immer uf dr Spalesite gstande. Trotzdäm hän sich am Samschtig vieli Spalemer und Spalemerinne im Volkshuus igfunde zum sich de Piccolo- und Drummelkläng vo dr Nicole Meyer-Lehner, dr Dominique Saladin, em Christian Walk und notürlich au allne andere Finalischte hiz’gäh.
Nach dr heissersehnte Rankgverkündigung het denn d Party im Unionsaal nit lang uf sich warte und nume wenigi hän sich die entgoh lo… Schiinbar isch si so verlockend gsi, dass die eint oder dr ander trotz allne guete Vorsätz frieh häizgoh, sich doch zu spoter Stund immer no dört vorgfunde het und s Tanzbei gschwunge het.

Zum Schluss isch es wie immer unerlässlich, allne Teilnähmer und Täilnähmerinne zu ihrer Läischtig z’gratuliere und grosse Respäkt z’bekunde für ihre Isatz! Es isch gar nit sälbstverständlich uf d Bühni zstoh – sigs elläi, zu zweit oder in dr Gruppe!

Wyterläse für d Rangliste: 

Ranglischte

Vorusschäidig:

Einzel:

15. Florian Stähli
15 Christian Walk

SoloDuo:

4. Florian Stähli und Fabian Staub (Schnoggekerzli),
11. Stephanie Hediger und Luca Müller (wild)
14. Laurent Burdet und Serge Burdet

Gruppe:

6. Christian Walk, Olivier Boog, Moritz Würth
4. Nicole Meyer-Lehner, Sarah Zwiller, Niggi Zittel, Flavio Magliozzi, Laurent Burdet, Florian Stähli
4. Stephanie Hediger, Dominique Saladin, Sandra Rudolf, Céline Saladin, Florence Saner, Pascal Sarti

Gmischt:

8. Stephanie Hediger, Dominique Saladin, Sandra Rudolf, Céline Saladin, Florence Saner, Pascal Sarti, Manuel Männli Martinelli, Olivier Boog, Florian Hediger
11. Christian Walk mit ere wilde Gruppe

Final:

Einzel:

13. Nicole Meyer-Lehner

SoloDuo:

9. Dominique Saladin und Dominic Plattner (Naarebaschi)
10. Christian Walk und Patrick Meyer (Die Gääle Daggel)