Spale Stamm Fasnacht 2018: iSCHMIERglyych

Spale Stamm Fasnacht 2018: iSCHMIERglyych

           

Gschmiert wird uff dr ganze Wält,
es goot um Macht, um seer vyyl Gäld,
doch au bi uns in dr Regioon,
griegt männge no e ‚Extra-Loon‘.
Unverstyyrt und Baar uff d Flosse,
soo wird dr Bulver-Zuestupf gnosse,
egaal ob Doggter-Thittel oder Bolytigg,
d Schwyz als Banane-Rebubligg
D BVB isch gaar kai Lämmli,
die schmiere nämmli nit nur d Drämmli.
Dr Wessels schmiirt, es isch zem gruuse,
iber d Douane bis wyt ins Alsace uuse.
Dr Blatter schwätzt si FIFA rain,
laider verstoot dr Seppli kain.
Nit suuber isch sy Dialäggt,
und was äär – bigott – bezwäggt.
Waisch du, dass daas gege s Gsetz isch,
und du esoo sämtligi Regle verletzisch?
De gheersch nit uff die Forbes-Thabälle,
sondern bi Wasser und Broot in e Zälle!
Und doch sait jeede in syym Beryych,
es isch mer glyych, wel i schmier glyych!

Fasnachtshighlights

Die drey scheenste Dääg kame amigs gar nit so rächt in Wort fasse und e vollständige Bricht z schribe isch sowieso e praktisch unmöglichi Sach, bi däre Vilzahl an Idrück, Erläbniss und Begägnige an dr Fasnacht. Mir konzentriere uns do deshalb uff e Hampfle Highlights vo dr Fasnacht 2018 (us dr Sicht vom Schribende):

Morgestraich – wenns 4ri schloht

zMorge im DES ARTS

Als Begriessig e Plättli Trochefleisch, perfäggte Service und super Ässe: Dr Muet zum Wächsel vo unserer Baiz isch definitiv belohnt worde.

Dr Cortège bi Oobesunne uff dr Mittlere Brugg gniesse

 

Dr Monsterzug am Mittwuch-Zobe


Gfilmt vom Marcel Michel, Spale Alti Garde

Fotos

(Fotograph: Raphael Alù)

SOMM

 

Morgestraich

 

Mäntig-Nomidag

=> no mehr Fotos findsch im Intärne Berych

=> d Spale het neu au e Instagram-Channel

Zeedel

(gschribe vom Yves)

Dr FIFA laufts wie gschmiert daas Joor,
und y main s Boortmenee, nit d Hoor!
E WM zmitts in däre Hitz,
dasch mee als numme bitz e Witz!
S verheerte, wäg de Schmiirgäldkonte,
sich gege d FIFA jetze d Fronte.
Und doch frai y my, s isch wunderbaar,
uff d Fuessball-WM in Katar!
Wäär spiilt isch mer grunzipiell egaal,
y lueg Australie gege Senegal.
Und sälbscht Marokko geg’ Korea,
muess yych in ganzer Lengi gsee haa.
Numme d Schwyzer die sin lengscht scho dusse,
hän uff d Kappe grieggt vo doopte Russe.
Daas sin au nit so Schloofdablette,
hän die greesser Spritzig-kait doo wurdi wette!
Dr Infantino dä infantilo
hät daas Breesi-Amt gscheiter syy loo.
Dr Gianni schwätzt vom Grauberyych,
Dr Sepp maint aber, i schmier glyych!

Lueg diir emool die Wyysaasche aa,
vom Silvio, Res d Italia!
Glifted, gspritzt und dransplantiert,
kai Reegig im Gsicht, egaal was basiert.
D Falte vom Alte sin mee als kaschiert
und s Lächle uf dr Fotti isch au retouchiert.
So schmierig wie d Hoor vom Herr Esteriore,
isch dr Breesi im Land vo «grande amore»!
Syni Weschte isch wyss, syni Hoor pherfäggt gsträält,
d Zeen glyych wie d Weschte, esoo wird er gwäält.
Dr Bunga Bunga Berlusconi,
waiss, z Italie goots nit ooni.
Schmiergäld, Korubzioon und Mafia,
lueg dr dä Italo-Gaddafi aa!
Er losst e baar Euros iibere waggse,
in Sizilie nennt daas d Mafia «Taxe».
E Dail fliesst in sy aigne Sagg,
s längt fir e Lifting vo sym Dräänesagg…
Er lächlet breff und winggt denn ab,
my Sändezyt isch ständig z gnapp,
wäge de Schmää-Reede und gmaine Verglyych,
doch daas isch mir glyych, wel i schmier glyych!

Gschmiert wird uff dr ganze Wält,
es goot um Macht, um bees vyyl Gäld,
doch au bi uns in dr Regioon,
griegt männge no e «Äxtra-Loon».
Unverstyyrt und Baar uff d Flosse,
soo wird dr Bulver-Zuestupf gnosse,
egaal ob Doggter-Thittel oder Bolytigg,
d Schwyz als Banane-Rebubligg
D BVB isch gaar kai Lämmli,
die schmiere nämmli nit nur d Drämmli.
Dr Wessels schmiirt, es isch zem gruuse,
iber d Douane bis wyt ins Alsace uuse.
Dr Blatter schwätzt sy FIFA rain,
laider verstoot dr Seppli kain.
Nit suuber isch sy Dialäggt,
und was äär – bigott – bezwäggt.
Waisch du, dass daas geege s Gsetz isch,
und du esoo sämtligi Reegle verletzisch?
De gheersch nit uff die Forbes-Thabälle,
sondern bi Wasser und Broot in e Zälle!
Und doch sait jeede in syym Beryych,
es isch mer glyych, wel i schmier glyych!

D Gsellschaft, s isch daas e Blamaasch,
kennt se hit nimm, d Zivilguraasch.
Sälbschtloos hälffe, kasch vergässe,
y bi doch graad bim Midaagässe …

Im Dram wett d Irma Merian hogge
und yych kumm sälber graad vom Jogge.
Sii isch nimm guet uff de Bai
und yych bsetz mit Ruggsagg Blatz fir zwai.
So stoot denn d Irma gheerig lang,
e weeneli wagglig in däm Mittelgang.
Het in de Ooberäärm kuum Saft
und hebt sich fescht, mit letschter Graft.
Wo s Dram denn bletzlig brämse duet,
sääglet s Irmi, samt em Huet,
duur s Dram nach voorne, als wie wyter,
und dr Uffschlaag, dää isch schytter!
Me heert die alte Gnoche bräche,
hälfe wär jetz kai Verbräche,
daas waiss e jeede, ussnaamsloos,
doch s Dram stoot an dr Pilgerstrooss.
Doo muess y uuse, nundefaane,
haa e Thermyyn, muess naime aane!
Yych myyd drum striggt dä Sturzberyych,
wäär dr Irma hilfft, daas isch mir glyych!

S isch Sunntig, mir hän GeeCee gschlaage,
y dschiengg zem Imbiss, s gnuurt my Maage,
Und duurschte duets my au bigott,
esoo-ne Bierli wäär jetz flott.
Dr Murat ziet entdyscht vo danne
und d Mamme Yakin het e Dreiraad-Panne.
Doo tschalpt e GeeCee-Fan mit Soon,
graad voor mir uusem Staadioon.
Bletzlig kunnt e Ultra-Meuti,
die witteret doo lyychti Beuti.
Dr Bappe het graad aini gfange
mit iirgend ere Yysestange.
Er rollt sich wie-ne Igel yy,
und D Hooligans schleen buschber dryy.
Jetz goot d Boscht so richtig ab
und fir die baide wirds bees gnapp.
Dr Soon het kai Chance geege vier,
und yych waart als no uff my Bier …
Y sott jo hälffe, daas isch glaar,
doch yych geg zwelf soo Exemblaar?
Kai Hiirni drfir Musggelmasse,
und yych bi nit esoo-ne Krasse,
y haa null Chance im Verglyych,
wäär iine hilfft, daas isch mir glyych.

Und au wenns allne and’re glyych isch
und nimm in dyym Gomfoor-Beryych bisch,
heeb d Auge und au d Oore offe,
s wird nit aifach wyter gloffe.
Stand yy fir die hilffloose Lyt
denn usser Mumm koschtet’s di nyt!
Fir die wo aifach schmiere wette,
schmier bitte mii und kauff d Blaggedde!