S Offizielle 2019

Vom 31.01. bis 02.02.2019 hänn sich wieder vyyl muetigi Fasnächtler am Offizielle gmässe. Und zmitzt drinn sinn au e Huffe Spalemer und Spalemerinne gsi, wo ihri Märsch zum beschte gäh hänn.

Ahgfange hets am Donnschtig mit dr Nerea Petretta, wo bi de Junge Pfyffer Einzel dr tolli 11. Platz im Saal erreicht het. Für sie ischs denn grad wyter gange mit dr Pfyffergrubbe. Dört isch sie zämme mit dr Lena Schär, Meret Burdet, Hannah Stark, Rahel Aebi und dr Natascha Stalder uf dr Bühni gstande. Mit Erfolg, denn sie hänn sich könne über dr Finalihzug freue. Und das bi dr erschte Teilnahm! Grossartig!

Bitz spöter an däm Oobe hets no meh freudigi Resultat vo de Kategorie bi de Alte gäh. D Stephanie Hediger und dr Florian Stähli hänn sich im Einzel beidi in Final pfyffe. Juhuuuii!!!

Bi de Pfyffergrubbe sinn au zwei Spale-Grubbe am Start gsi. Die «Ältere» mit dr Nicole Meyer, Jill Hoffmann, Sarah Ziegler, em Flavio Magliozzi, Florian Stähli und Laurent Burdet hänn ufem undaggbare 4. Platz dr Final leider um ei Platz verpasst.

Im andere Saal sinn die «Jüngere» gstartet. D Dominique Saladin, Florence Saner, Céline Saladin, Sandra Rudolf, Stephanie Hediger und dr Pascal Sarti hänns sälber kuum könne glaube, wo ihri Startnummere als Finalteilnähmer ufgrueffe worde isch. Entsprächend gross isch d Freud und s Gschrei gsi.

Bi de Alte Dambuuregrubbe het sich e Trio us unserer JG an Start traut. Dr Yannic Ruf het zämme mitem Jonathan und Christian Langlotz dr super 6. Platz im Saal erreicht! E grossartigi Leischtig!

Am Fritig sinn denn s SoloDuo und die Gmischte Grubbe ufem Programm gstande. Au do sinn mehreri Spalemer uf dr Bühni gstande. Im SoloDuo bi de Junge isch dr Liam Berns und dr Thiery Burkhardt vo dr Rätz 9. im Saal worde.

Bi de Junge Gmischte Grubbe het sich d Pfyffergrubbe zämme mitem Nicola Langlotz, Basile Boog und Cyrill Sakurai uf dr 6. Platz pfyffe und drummlet. Au das sinn e ganz tolli Leischtige! Bravo!

Im SoloDuo vo de Alte sinn vier Päärli mit Spale-Beteiligung ufdrätte: D Dominique Saladin und dr Dominic Plattner vo de Naarebaschi (11. Rang), dr Olivier Boog und dr Roman Zehnder vo de Muggedätscher (13. Rang) und d Stephanie und dr Florian Hediger (16.Rang).

Ei Päärli fählt no, nämlig dr Florian und Benjamin Stähli. Sie hänn sich könne für dr Final qualifiziere! Sensationell!!

Zur späten Stunde het denn au no d Vorusscheidig vo de Alte Gmischte Grubbe stattgfunde. Die «älteri» Pfyffergrubbe und dr Florian Hediger, Benjamin Stähli und Manuel Martinelli (Männli) sinn mitem Nunnefirzli ahdrätte und hänn sich uff dr 8. Platz drummlet und pfyffe.

Die jüngeri Grubbe het nach kurzfrischtige Wäggsel vo de Dambuure und em gwählte Marsch doch no könne starte und zwar zämme mitem Olivier Boog, Andrin Leimgruber und Patrick Bucherer. Ohni Erwartige abr mit umso meh Spass hänn sie mit de Alte dr 9. Platz erreicht. Entsprächend gross isch d Freud gsi bi allne us dr Grubbe. Für das dr Andrin und dr Patrick e Wuche vorhär no gmeint hänn, sie könne am Fritig zoobe gmietlich go loose, hänn sie sich super gschlage uf däre Bühni!

Am Samschtig het denn äntligg dr Final stattgfunde. Nacheme tolle Uftritt het sich d Pfyffergrubbe vo de Junge könne über dr 6. Platz freue! S het Spass gmacht zum zueloose!

Au d Pfyffergrubbe vo de Alte het sich im Final uff dr 6. Platz pfyffe.

Im SoloDuo isch d Spale vom Florian und Benjamin vrdrätte gsi! Sie hänn dr tolli 13. Rang erreicht.

Bi de Pfyffer Einzel het me sich zerscht über zwei schöni Vorträäg und denn über zwei sensationelli Plätz dörfe freue. Bi dr Rangverkündigung hänn d Stephanie und dr Florian lang könne stohbliibe und hänn bi jedem Platz nit könne glaube, dass sie immer no drbi sinn. So isch d Stephanie denn bim 6. Platz ufgrueffe worde uns het sich unglaubigg über das tolle Resultat gfreut. Dr Florian het dr grossartigi 5. Platz erreicht und au bi ihm isch d Freud riesig gsi.

S isch e langs, aber e grandioses Wucheänd gsi. S isch vor allem toll gsi zgseh, dass s Offizielle-Fieber langsam au unseri Junge wieder paggt het. Das vrspricht einiges für die näggschte Joor. Me ka sich also druf freue.

Härzliggi Gratulation allne Teilnähmer zu dene tolle Leischtige und genauso e härzliggs Danggschön an alli Spalemer wo wie jedes Joor zahlriich sinn ko loose, mitfiebere und juble. Ohni euch würds nur halb so viel Spass mache!