Spale-Clique

    syt 1927 uff dr Gass

Spale am Offizielle 2023

Gschriebe vo dr Stephi

Wie vyyl anderi Ahläss, het in dämm Joor au s Offizielle Brysdrummle und -pfyffe wieder im gwohnte Rahme könne stattfinde. S isch allerdings s erscht moll gsi, dass alli Vorusscheidige unter eim Dach stattgfunde hänn. So het me d Möglichkeit kha, alli Spale-Gspähnli usem Publikum könne z’unterstütze (wenn me denn im richitige Saal gsässe isch…).

Ahgfange hets am Donnschtig im Einzel bi de Junge, wo dr Gian-Marco Felix gstartet isch und sich mit dr Faschtewäje ufe tolle 17. Rang drummlet het. Är isch denn kurz druffabe au no mit Kollege vo de Glunggi und vom CCB mitem glyche Marsch in dr Grubbekonkurränz uf dr Bühni gstande uns sie hänn leider wäge eim Platz d Finalqualifikation verpasst. E super Leischtig, au wenn d Entüschig do gsi isch.

Am spötere Oobe isch s denn au für dr Stamm losgange: Dr Florian Stähli het sich miteme wunderbare Nunnefirzli in Final pfyffe! Super!! Au dr Benjamin Stähli isch im Einzel ahträtte und het sich mitem Ueli ufe tolle 19. Platz im Saal drummlet.

Dr Florian isch denn no mit dr Nicole Meyer, Sarah Ziegler, Jill Hoffmann, Michelle Berns und em Flavio Magliozzi in dr Grubbe ahträtte und au do hänn sie s Nunnefirzli zum Beschte gäh. S Resultat: ebefalls d Finalqualifikation. D Freud bi allne isch riesig gsi!!

Am Fritig isches denn wyter gange mit vier SoloDuo-Päärli mit Spale-Beteiligung: Dr Olivier Boog het zämme mitem Pascal Nippel vo dr Sans Gêne dr Ueli vordreit und dr 14. Rang erreicht. Im glyche Saal ufem 13. Rang sinn dr Florian Hediger und dr Pascal Sarti mit de Alte gsi. Im andere Saal, aber ebefalls ufe 14. Platz, hänn sich d Stephanie Hediger und dr Patrick Bucherer mitem Spaledöörli pfyffe und drummlet. Wäge eim Platz hänn dr Florian und dr Benjamin Stähli als 7. mitem Hofnaar dr Final leider ganz knapp verpasst.  

Zur späten Stunde isch denn au no die Gmischti Grubbe gstartet mit dr Sandra Rudolf, Céline Saladin, Dominique Saladin, Stephanie Hediger, Alessandro Venzin, Pascal Sarti, Patrick Bucherer, Olivier Boog und Andrin Leimgruber. Die nüün schygge Saftschubbse sinn mitem Whisky ufem 11. Platz glandet. D Stimmig an Board isch vor und nachem Uftritt wie immer super gsi!

Am Samschtig Morge frieh sinn denn die jüngschte Konkurräntinne und Konkuränte an dr Reihe gsi, wo alli grad diräggt im Final gsi sinn. Die neui Binggis-Kategorie, wos erscht zum 2. Mol gäh het, isch für dr Nochwuggs e grossartigi Sach. S isch e riese Freud, dass sich grad drey Spale Binggis Pfyfferinne und Pfyffer uff die Bühni getraut hänn. Alli drei hänn dr Spitzbueb vorpfyffe und sie hänn das eifach nur grossartig gmacht! D Anouk Meyer (10. Platz), dr Erik Beer (11. Platz) und d Julia Brüll (16. Platz) könne unglaublich stolz uf sich sy. An däre Stell söll no betont wärde, dass d Julia erscht letscht Joor nach dr Fasnacht het afo pfyffe!!! Respäggt! 😊

Zoobe, im Final vo de Alte, hets denn nomoll gheisse Duume drugge. Dr Florian het e wunderschöne Hofnaar zum Beschte gäh und sich sehr über dr tolli 10. Platz gfreut. D Pfyffergrubbe het e superfätzigs Fritzli pfyffe und so dr 6. Platz erreicht. Vor allem für d Michelle isches e bsundere Momänt gsi, het sie doch an ihrer erschte Teilnahm könne e Bächer mit heime näh! Gratulation zu däm Ihstand!

Ei moll meh isches e supertolle Ahlass gsi und s het Freud gmacht, dass me sich gegesitig, Jung und Alt, unterstützt, flissig d Dume druggt und mitgfieberet het. Härzliggi Gratulation an alli Teilnähmerinne und Teilnähmer und e grosses Dangge an alli wo sinn ko unterstütze.

Die vollständige Rangliste und witeri Föteli findsch uf https://www.offiziells.ch/


Dr Mörder isch d Blumebot gsi

Pfyffer und Vorträbler als Mordkomission unterwäägs

vom Oliver us em Vortrab

Scho wie im letschte Joor hän sich Pfyffer und Vorträbler für iire Heerbschtbummel zammegeschlosse. Dr 17. Sebdämber 2022 isch es drnoo gsi. Noch vyyl überlege und abklääre, hend Florence, d Sandra, d Fabienne und dr Yves iires Überraschigsbrogramm bienander kaa. Die erschte hen sich zem Zmorge im “La Manufacture” droffe. Am halber ains ischs drnoo so richtig mit em Bummel losgange. Oder doch nit?

Heerbschtbummel Pfyyer und Vorträbler 2022
(mehr …)

Die Jungi Spale am Laaferi 2022 mitem Marsch «dr Pipifax»

Am 2. und 3. April ischs ändligg sowyt gsi: s erschte Laaferi het stattgfunde. S Drummeli für die Junge, wo eigentligg hätt sötte im Januar über d Bühni goh, het us bekannte Gründ miesse in April verschoobe wärde.

Und so hänn über 800 Kinder und Jugendlichi am 4. Bummelwucheänd in dr Eventhalle vo dr Mäss nomoll s Fasnachtsfieber ahstiige loh. Natürlich sinn au unseri Junge zmitzt drinn gsi und hänn das fantastische Wucheänd dörfe miterlääbe.

Jungi Spale am Laaferi 2022
(mehr …)


Fasnacht 2022 – Spale Clique

Das ware sy – die drey scheenschte Dääg a de Basler Fasnacht 2022. Dr lieb Gott mues e woorhaftig e Bebbi sy. Bi straalendem Wätter, drey Dääg lang, händ Goschtym vo d Spale-Clique so richtig glüchtet. Sujet isch “Hyppereggsdreem” gsi und het solle zeige in welle Zyyte mir lääbe. Nüt isch me durchschnittlig, het Grautön oder isch aifach. Alles mues mega, schwarz oder wyys und extrem sy. Und so war denn aud Fasnacht. Mega guet! 

E magische Momänt bim Morgestraich, uff däne so vyyli noch dere lange Pandemie gwartet hän. Und ussfiirlige Gässle am Mäntig und Mittwuch het woorhaftig Freid gmacht. Au fyr die Junge Spale isch Zyyt worde, ändlig könne uffd Gass zgoo und könne gniesse.

So heists jetzt Adieu saage Fasnacht 2022 und in 365 Dääg, nämglig am 27. Hornig 2023 drnoo wiider: Morgestraich vorwärts Marsch!

Und do goots zem Zeedel 2022: extrem.spale.ch