Drummeli 2007: s’ Ohremiggeli
D’Spale und s’Ohremyggeli :
“Jazztöne swingen uns aus der Pause an den Tisch zurück. UND WAS FÜR TÖNE! d’Spale Clique goes Jazz – zusammen mit der Jazz-Hochschule intoniert sie Gruntz-Sound vom Feinsten: s’Ohremyggeli. Der Meister selber sitzt im Publikum. Ist begeistert…. ” [minu, baz 12.2.07]
Bilder vom Drummeli 07
Drummelivideo
Samschtig
*Ohjeeminee* han y jo am Fryttig scho gschribe gha.
Aber y bi nach em Uffstoo no e zyttlang im Delirium gsi! Am 12.00 sin mir go d Cor-tége-Larve go abhole und hänn sie grad in dr Spalebärg-Wohnig deponiert. Drno sin mir zaggig an dMUBA zruggkehrt ys fir dr näggschti Drummeliuffdritt go paratmache. Dr Hedi het am Nomidaag bereits sini Derniere gfyyrt und het nonemool Alles gäh!
Nach em Uffdritt het sich e Jede Spalemer uf sini Art gstäärgt fir dass er zobe nomoll mag dureheebe. D Deiggeler hänn uf em Mässeplatz e Abstimmig ghalte, ob sie jetz e Marschiebig wänn durefiehre oder nit! Das het sauluschtig usgseh! Gruess vo de Haneburgerli und de Schlüsselgässler!! (Wenn aber usser em Niggi, no mehr Deigs an Match gange sin, no froog y mi, ob s sich glohnt het ! Egaal! Dr Flavio het drnoo jedefalls 3 Bierli bruucht! Do kha jede si eigene Schluss druss zieh!
Die wo am Spalebärg dien huuse iber d Fasnachtsdääg sinn ebbis Gsunds go ässe und hänn 2 Liter Mineralwasser drungge – do hänn sich unseri Läberli und Nierli aber mächtig driber gfreut!
Dr Nochdail, dass mir so gsund und somit au schnäll gässe gha hänn isch denn aber gsi, dass mir am halb achti bereits wieder butzt und gstrählt und im *Goschdyym* im Foyer gstande sin. Isch denn scho e komisch Gfyyl, wenn du im Goschdyym dert stoohsch und du Di Instrument nit hesch! (Hätt y ächt sotte in dr ZSA warte? He neii, sie vergisst das sicher nit!) Am halbnyyni isch die Piccolo-usleehn-Frau no immer nit im Yypfyffe gsi! Claaaaaaaauuuudiiiiaaaaaaaa woo biisch Duuuuuu?! Ah, ändligg isch sie iitrudlet! …..streggt mir ihr Piccolo aane und hauts wieder in d ZSA….! Wo isch si ächt gsi mit de Gedangge – in Anbetracht, dass sie eh zspooht kho isch? He?
Dr Derniere-Uffdritt han y perseenlig sauguet gfunde (au wenn y kai Trompete gspielt ha und dr Claudio kai Piccolo gspielt het – zer Freud vom Plätti, wo das nämlig gar nit gschetzt hätt!)
Unseri Jazzschuel het vo de Schnurebegge, dHiet sowie au die *SCHEENE* Krawat-tene bikho und am Schluss vom Uffdritt isch die ganzi Band uffgstande zem Spiile!
Drno sin mir mit Sagg und Pagg ins Foyer, e letschtmoll go dStimmig gniesse, woby so richtig gniesse het me fascht nit könne, denn s Foyer isch bereits bevor sDrumme-li fertig gsi isch, bummsvoll gsi und me het sich gfrogt, wo als die zahlende Gäscht no sotte e Plätzli finde?! D Idee isch uffkho, dass me doch kennt im Ygangsbereich e Bar ufbaue! Aber do kunnt scho die nägschti Froog! Wird s Drummeli nägschtjoor no im MUBA-Saal stattfinde? Wo wärde mir die näggschte Joore unseri Drummeli-Öbe verbringe? Gits iberhaupt denn wieder neume e Foyer? *Snief*!
OK! Dasch e Detail! Uf jede Fall hänn mir im Foyer so witergmacht wie mir an dr Premiere agfange gha hänn! Es het rächt vyyl Bier und Waggis gääh! Es isch wieder mächtig gflöörtet worde. Jetz sin schiints au d Vorträblerinne bereits am Claudio am ummebaggere gsi und hänn welle wisse, wievyyl är däät koschte pro Stund!! :o) Het er ächt deswäge nohär nur no Bleeterliwasser drungge?! Mir frooge ihn an dr Fas-nacht odr am Bummel, wo är gärn wurd kho! D Claudia het eimool mehr, mit de Beb-bi-Männer gflirtet und au suschtigi Grüchtli sin do an mi drait worde so richtig mit dobbel-Froogezeiche…“Duu weisch doo sicher meeehr driber!??!“ hets gheisse! Mein Name ist Hase und ich weiss von nix, han y zer Antwort gäh!! (Y kha jo nit sa-ge: „ Goht Di nytt aa!!!“). Und so sinn mir dertbliibe, bis sLiecht agange isch!! Sehr gfreut het mi au, dass no e paar Jungi ins Foyer sin kho luege (oder sott me do ächt nit stolz druff sii, wenn sie scho vor em Stamm kemme kho su… eh pläuderle?!) Hmm! Y finds guet, denn das isch Integratioon!!!
D Tambuure hänn s zämme au sauglatt gha – SCHEEEN!! Nur was sie gmacht hänn isch nit so scheen gsi! Wott jetz aber nit neecher druff yygoo, numme ebbis: Dr T.S: het sGedränggeschild vo dr Wand gnyyblet und dr C.R. in d Finger druggt und schwupps isch au scho e Uffsichtsperson vor ihre gstande und het sie ganz bees agluegt, sie sott doch kimftig sottigi Wandaaleaggt siiloo und soll sofort das Schild go abgää an dr Bar!! Jääjäää! D Tambuure mache sZyyg kaputt und dPfyffer kennes wieder usbaade! ;o)
S isch denn aber glii sLiecht agange und y ha eifach nur no welle heimegoo!
S isch wie allewyyl wieder e scheeni Wuche gsi mit Eych und y bi froh, zue däm glat-te Spalehuffe gheere zderfe!
Aadie Drummeli ABER HALLO FAASENACHT 2007 :O)
S Spale-Myysli
Dr Drummelifrytig
Hüt isch es sowyyt gsi!! Y ha frieh uffstoo miesse um mini Larve – wo verdanggendwärterwyys vo flyssige SPalehälfer no kurzfrischtig zämmebaut worde sinn – im Käller abzhoole. Jo, y muess zuegää, s Uffstoo isch mir hitt scho rächt schwärgfalle und y ha ganz wehmietig mim Kopfküssi nochegluegt und ha dänggt, hou das kha jetz no liigebliibe!!!
Dr Uffdritt isch guet gsi, kaine het si Ysatz verpasst odr drnääbeghaue! Fir das uns aber iitrichteret worden isch, dass hit s Färnseh do sig und mir nit solle verschregge, wenn ein mit dr Kamera in d Auge lyychte sott, han y rächt wenig Kameras gseh (ah jo, mir hänn jo am Donnschtig scho e Kameramaa uff dr Bihni gha, hihi)
Suscht gits nur zverzapfe, dass die wo scho in dr Wuche drvor nach ai zwai Bierli ahängligg worde sin, jetz au wieder ahängligg gsi sin und dass es e paar Spalemer gitt wo derfe iber dFasnacht am Spalebärg Egge Noodlebärg woohne :o)))))))))!! Uuuund äääändligg hänn mir wieder emoll in Baggestoooss kenne go, wo e paar no fit gnueg gsi sin zem döggele.
So jetz haus ys an d MUBA und denn nämme mir dr Räschte.
S Spale-Myysli alias Sumpfdötterli oder Trulla2 ;O)
Dr Drummelidonnschdig
[aufschnaufmodus ein] Ebbe! Goot jo! [aufschnaufmodus aus]
Mir – yep, ych au 😉 – sinn widder tipp topp uff dr Heechi gsi – au dä wo s
“Dryruesshandglängg” montiert hett – bi de Tschässr hetts gescht wäge zvylne
Stellverträtter e weeneli gruntz äh gharzt! UND DÄ, WO NO UFF DR BIHNI
GFETTELET HETT ISCH MY PERSEENLIGGE HELD!! (Posuune roulez!) – s gitt aifach
Sache, die gitts gar nit! Und natyrligg isch drno im Fuayee “Schule” gsi –
logo: isch jo au SpaleDonnschdig!Und noneme deftige Hopfestroosynezieh macht
aim s haimdäbbele scho fascht nyt me us…
Joo Mysli – logger blybe – aifach gsait und umsumeluege bisch wäg! Stand
emoll näbe s Schlagzüg, denn hesch denn s Züg mit em Schlag und ebbe dä
trifft di amme fascht…
Kai Oobe ooni Frooge: Wär landet aigentligg zerscht oder iberhaupt bim
Claudio? Worum ka e Schlagzüger nit nooteläse? Bruuchts wirgligg zwai
A4-Sytte fir drei Noote? Wär hett aigentligg im Lift e bitz Wind ka? Muess
me d Boa birschte und dr Schal glette wenns Färnseh kunnt? Isch 20:30
grundsätzligg halber nyny? Wär vergisst alles d Larve am Samschdig zwische
10:30 und 12:00 abzhoole? Gitts iberhaupt so groossi Blaschtigggugge? Hetts
no Haisslym? Wisse d Vegis, dass si unserem Frässe s Frässe wägfrässe?
Et voilà – nämmemr dr Fryttig nit so gyttig und denn kunnts wie gwohnt guet!
hedi
Dr Drummelimittwuch
“Aaaargh Grrrrnpf”
hedi
die 2 Zyyle sinn alles – und alli, wo gescht uff dr Bihni gsi sinn wisse, was y main ;-))i
D Spale het geschter ganz logger afo pfyffe-ruesse-trompeete! Alles isch guet gsi, mir hänn ys alli pudelwohl uff dr Bihni gfyylt (will mir wisse, dass dr Hedi uns immer scheen azeigt, wenn mir unsere Yysatz hänn). Pletzligg ischs passiert: Y ha de Jazzer zuegloost wie scheen sie wieder emoll improvisiert hänn und uff s Mool han y gmerggt, dass dr Hedi numme no mit sym Stäggli griehrt het, ganz heggtisch, ass mir selle afo pfyffe und drummle. Also dr Doon isch scheen vo Hinde nach Vorne kho und dr Megge het dr Tambouredail au grettet und so hänn mir dr Vortrag ganz sicher und ruhig iber dRundi brocht. Sovyyl zu:“do hilft numme stur zelle zelle zelle uuuuuund zaige…!“(Villicht ischs besser, nit ganz so stur z’zelle drfir mehr mit de Jazzer mit z’schwelge :o).
Us em Publikum hets aber trotz däm Lapsus e tolle Applaus wie au vyyl Lob gäh fir uns und vo dr Jazzband hets nur gheisse, dass mir e scheens Crescendo pfiffe hebe!
Im Foyer isch es au wieder glatt zue und här gange. D Jessica het sich pletzligg vom Plätti magisch azooge gfyylt und dr Thomi Stettler het mit ere Pfyffere iber sini Frisuur afo pläuderle.
Also, fir hitzobe heissts dämfall: Hochi Konzentration und immerlockerbleiben :o)
S Spale-Myysli
Dr Drummelizyschtig
Jemersnaiaberau – hanis Euch scho fascht e bitz vermisst am Mändigzoobe.
Aber gescht hämmer widder Vollgas gäh 😉 Irgendwie dunggts mi, duet dä immer ängeri Kontaggt zu unsere Spalemyggeli de Jazzer nit so guet – bim improvisiere kenne si sich fascht nimm heebe und gänn alles – do hilft numme stur zelle zelle zelle uuuuuund zaige….
Immer wiider erstuunligg isch, dass so Zyschdig, Mittwuch d Konzentration noocheloost – me dänggt “binis nit supermega wien ych s ka pfyffe” oder au ganz beliebt “irgendöbber nimmt denn das Schlagzüg scho mit” oder “worum soll ych mi bim ypfyffe konzentriere – so goot jo au mit schnuure”! Me gseht allerhand Facette dien sich so uff 😉 Nimmt mi Wunder wie dr Pfyfferscheeef yfahrt – wenn die Zyle uff em Web sinn, wisse mrs scho….
Und was passiert äggscht alles an dr Dernieere? wärde d Jazzer vo andere Glygge ney yklaidet? Steemr alli uff dr Bihni bi dr AGB und ruesse dr Festival? Brinzlet ebber dr VKB an e Baum? Bykunnt dr Spezi-Läppli Bsuech vom Mysli? Ka d Breo au mit volle Bächer bächerle? Maine alli bi dr Junteressli sisch e Dernieere-Scherz, drby…..? Wärde die Pinguin ändligg vom Walross gfrässe? Erschyne bi dr Staine no anderi “Tambourefescht Gossdym”? Schwätzt dr Zubi im Rahme pletzligg franzesisch?
Frooge iber Frooge – mir wärdes gseh und gheere….
Grussinsky
hedi
Dr Drummelimäändig
Nochdäm mir sErschti Drummeli Wuchenend einigermasse gsund überstande hänn (y nenn keini Näme) und e jede Spalemer si Arbeitsdaag irgendwie ummebrocht het, hänn mir ys schowider uf unsere Uffdritt vom Mändig gfreut und sinn schnuerstraggs ys go paratmache. S het gheisse, dass mir am Achti mien in dr ZSA sii und sette am Halbnyyni im Käller vo dr MUBA parat stoo.
Do hit dr Hedi nit do gsi isch und somit nit het kenne dirigiere hänn mir ys miesse voll und ganz uf dr Plätti verloo und er het das bravouröös gmeischteret (hei, y bi scho lang nimmi so närvös gsi vor emene Drummeliuffdritt!!) Aber do au dr Schlagzyyger jede Daag e neys Intro uf sini Tamburins haut, simr jo eh jede Daag närvös!
Erschtgrad no im Spital und schodooo!! Au unseri Carmen isch kho mitpfyffe, was ys usserordentligg gfreut het! Vor luter Umarmige und vyyyle härzligge Schmütz isch si sogar fascht zspoht ins Yypfyffe kho. Fir ihri Asprooch/Danggesreed hets denn aber doch no glängt!
Dr Uffdritt isch eimool mehr MEGA gsi! Und noonem Uffdritt hets denn s obligate *ÄNDLIGKÖNNEMIRINSFOYERSTOOUNDSGLATTHAABIERLI* dringge. Dr Flavio het sogar e zer Bierfarb passends Jäggli aglegt (ebbe als Tarnig, dass me sBierglas in dr Hand nit duet gseh?) Und au vo dr Jazzschuel sin immer die glyyche wo no mit uns ai, zwai Bierli nämme :o). Ändi Wuche hänn mir si sicher sowyyt, dass sie mit uns Fasnacht mache – y bi do ganz zueversichtlig, hihihi!!
S Spale-Myysli
