Spale Stamm Fasnacht 2016: Glääbe und glääbe loo

Sujet : Glääbe und glääbe loo

Ein Sujet wie für die Spale geschaffen mit vielen kreativen Einzelkostümen von jedem Cliquenmitglied selber mit duct tape erschaffen, einer wundervollen Lampe welche in jede zeitgenössische Kunstausstellung passen würde und dem grossen Fragezeichen welches vom Tambourmajor getragen den Zuschauer zur Interpretation animiert.

Fasnachtszeedel glääse und gschriibe vom Niggi Zittel

Fasnachtsvideo

Spale im Querschnitt vo Telebasel 2016

• Zeedel glääse und gschriibe vom Niggi Zittel
• Bildergalerie vo dr Fasnacht
• Fasnachtsvideo Spale Stamm und dr Spalefamilie

Bilder Fasnacht 2016

Fotos und Videos: Laurent Burdet

Zeedel 2016: Glääbe und glääbe loo

 GLÄÄSE UND GSCHRIIBE VOM Niggi Zittel

Was? Wie bitte? Glääbe und glääbe loo?!
Wie sell y das denn jetz verstoo?
Verstoo doch: Glääbe isch wirgglig e ganz patänti Hilf,
wenn im Lääbe stoosch so richtig fescht im Schilf.

Y meecht Dr gärn mool e baar Byspyyl mache,
was mit Gläbband erzyygsch fir glatti Sache.
Duesch e Kaschte vo dr Ikea grad ufstelle,
kasch mee uffs Gläbband als uff d Schruube zelle!

Wenn s Schwiigermammi kunnt, wo duet an de Näärve zerre,
muesch d Huusdyyre graad mit Gläbband vorhär sperre.
Em Zwänggoog, wo nach Uffmerggsamkait duet strääbe,
s Gläbband diräggt kasch uff d Schnurre glääbe.

Noch em schlächte Ässe wenn sitzisch lyydend uff em Hyysli deroo,
kenntsch son e Glääber … aber das wänn mr jetz doch lieber loo.
«Wegen zu, geschlossen» kaasch an d Innestadt jetzt glääbe.
E Gaisterstadt dien unseri Verwaltigsduubeli aasträäbe.

D raint oder anderi regierigsreetligi Beschluss
erzyygt so by de Lytt grad noo e Darmverschluss.
So losst unseri Verhinderigsverwaltig, ganz leninistisch,
Gschäfts-Prognose erzyyge gar nitt optimistisch.

Bald gseets in der Stadt denne wääge däne Beamtepflegg
glyych penibel us wie in dr Stücki grad uff alle Stegg.
So verliert die Stadt denn jetzt au vellig s Gsicht
und me kaa wirgglig nur no sage: «Mer mache dicht!».

Au uff dr Landebaan vom Euro-Airport ibrigens -y mach e Wett-
faare Slalom bim Starte und Lande scho bald alli Jet.
Denn uff dr Pischte und zwar nit nur an de Ränder
hänn sii natirlig jetz anegstellt au Veloständer!

Uff jede Fall gitts Ysatzgebiet fir s Glääbe ganz mannigfaltigi
und das ereffnet Chance fir uns alli ganz gewaltigi.
S kennt drum au sy, ass mit Glääbe vyl Positivs z erraiche wär.
Mit e Bitz mee Toleranz wär das alles au gar nitt so schwär.

Denn stell Dr doch mool vor, wie wär das scheen,
wirdsch zem gegesytige Verständnis zämmeglääben all die Gleen.
Dr Obama mit syne Idee und Vorsätz ganz e Huffe,
gläbsch mool e Wuchen an Putin zem Vodka suffe.

(Wenn im Kanton Zug allerdings Politiker vo rächts nach links dien suffe
fierts mee zue Problem bim kopulierend Zämmeglääben uff em Huffe.)
Dr Putin kaasch glääbe au an s Delifoon
zem Flugzügversängge spiile mit em Erdogan däm Gloon.

Dr Redaggtions-Grobian und Pseudo-Casanova vo dr Baz
gläbsch mool e Wuche im Swinger-Club an sy Kurdeschatz.
Toleranzerzyyge durch Zämmeglääbe hett natirlig au Gränze, muesch begryffe.
Jetzt muess my im Doon doch noo e Weeneli vergryffe.

Em Terrorischt nämlig gläbsch sy Rageedde am beschte diräggt an Arsch,
druggsch dr Zinder und saisch: «Richtig Pluto – Vorwärts Marsch!»
In allen andere Situatione sell glääbe aber zämmefiege,
was sich sunscht in dr Wält so alles duet bekriege.

Denn nit Abstand sondern Nöchi s Verständinis fir dr Anderi bringe duet.
Drum haltet, nai glääbet zämme, hänt dr Muet!
Vyllicht kasch jetz au Du besser verstoo,
worum me immer sett glääbe und glääbe loo!

Fasnachtsvideo

Bravo bravo bravo! Ein Hoch auf die Sujetkommission und auf jeden einzelnen Spalemer, welcher seine eigene Kreation des Sujet bastelte. Ein Hoch auf den Lampenmaler, welcher die schönste aller Spalelampen erschuf. Ein Hoch auf den bissigen Zeedeldichter für sein Erstlingswerk. Ein Hoch auf den Tambourmajor, welcher uns durch eine tolle und intensive Fasnacht mit vielen musikalischen Hochmomenten und einem sensationellen Ändstraich führte. Das war eine Fasnacht wie ich sie gerne wieder erleben möchte!!! Danke!!
– Laurenzius Vonbürde