Spale JG Fasnacht 2018: Inseggte (fr)ässe – kasch vergässe!

Es het sich emoll e Mensch gfrogt: wie wärde sich unseri kommende Generatione verpfläge? Uff dr Suechi nochen ere Antwort het är uusegfunde, ass e grillierte Heugumper oder e saftige Määlwurm gar nid sone schlächte Gschmack hänn wie me kennt meine.

Was in anderne Länder sit Joor und Daag zur Normalität gheert isch bi uns fyr die Meischte non e Tabu:
Dä wo no nie e Heugumper oder e fein Wüürmli probiert het sait: Yych doch nid! Do ka mi kein drzue bringe.
Und dä wo scho moll son e flambierte Heugumper gha het meint: Wär das probiert, dä sait zum Schluss – e jedes Bainli isch e Gnuss.

Fotos

(Fotos vom Adrian Sakurai)

Kum zer Spale

An dr dasjährige Fasnacht hämr e kleine Wärbefilm für d Spale JG produziert.
Wotsch Pfyffe oder Drummle lehre? Denn kum zer Spale! Wieso s bi uns bsunders glatt isch, verzelle dir unseri Junge grad sälber:

Zeedeltext

(gschribe vom Yves)

Dr Agga Ugga isch lyyslig am flueche,
wel er mues Inseggte sueche.
Dä Staizyt-Bueb wett eender jaage,
als ständig an gruusige Kääferli z gnaage.
Sy Brueder dr Oggo seet daas nit glyych,
äär hets no gäärn das Grabbelviich.
Hit losst sich aifach nyt gscheits finde,
nit emool in dooter Boorgge-Rinde …
Doch deert, under em Stai, het sich eppis beweggt,
stellt äär fescht und hofft uf e Inseggt.
Numme nit scho wider e giftige Skorpioon,
in kaim Verhältnis steen dert Uffwand und Loon!
S Karma stoot em nit im Wääg,
öppenemool gits zem Gligg soo Dääg,
wel underem Stai im hinderschte Egge,
brobiert e Kääfer sich z verstegge!
Gnau dää gits hit am Mittagsdisch,
sy Brueder bringt e frische Fisch
und d Mamme brutzlet faissi Maade,
das git zem jaage zwäägi Waade!
Nääbe Fricht mit vyyle Wytamyyn,
liifere d Grabbeldierli d Broteyyn!

Dr Timon und Pumba, die baide uffgweggte,
mampfe am allerliebschte Inseggte!
wenn de se ganz frisch wettsch ässe,
darfsch s Ablaufdatum nit vergässe.
Nämme mir byspiilswyys d Aidaagsfliege,
die wettsch nach drei Daag nimm «frisch» uffdischt griege!

Grien und erhaabe uff eme Blatt,
isst sich e Gottesaabätterin satt.
Was yych mi scho syt lengerem due frooge,
und was eich amänd au kennti blooge,
wie wurde sii d Buddhischte nenne,
unter weelem Namme dien sii d Inuit kenne?
Und wie haisst das Viich noonemool im Islam?
Waiss daas amänd dr nei Imam?

Em Noochber sy Flooziirggus find y e Hit,
aaber halt, mit em Ässe spiilt me nit!
Daas sait dr Volggsmund und dr glaini Floo,
isch froo isch daas esoo, drno …

Mir bruuche die munzige Grabbelviicher,
im Alldaag no vyyl – dr Woortschatz wird ryycher.
Joo bi de Inseggte, dene uffgweggte,
gits vo hundskommuune bis zue verreggte,
Biine, Mugge und Libelle,
die hän alli fliege welle.
Nomen est Omen sait sich e Grille,
und duet im Stille uff em Grill e bitz chille!
D Aamaise dänggt deere Thermite-Grytte
liis ych bi Zytte scho no d’ Lewytte!
Es duet laider kai ainzigi Aidaagesfliege,
e scheen Dreidaagesbäärtli griege …
Wenn yych kumm wird allewyyl applaudiert,
verzellt e Mugge schampaar blasiert,
esoo ändet denn dä Mugge-Brätscher,
flach under so-ne-me Mugge-Dätscher.
Sanduurglyych isch dy Fyguur,
denn hesch e Wäschpidaalie puur!
De issisch vegaan, numme Chia Söömli,
Soja-Quargg und Tofu-Chröömli.

Und setzt dr ain e Floo ins Oor,
isch gwiis nyt me wie no drvoor,
kasch kai glaare Gedangge me fasse
und foosch dä Floo glyy aafoo hasse!
Dr sprichweertlig Stich ins Wäschpinäscht,
git em Allergiker graad no dr Räscht!
So machts au dää wo d Amis regiert,
was zu vyyle Allergie fiert!
Bi-ne-re Figgi und Miili maint dr Babbe,
doo schloosch zwai Fliege mit ainere Glabbe.
Bisch als Iiberdryyber stadtbekannt,
machsch uss ere Mugge en Elefant.
Drum het dr Eric Weber im Fall,
au elf Elefante im aigene Stall!
S fäält mer an nyt maint e glaine Zägg,
i lääb do gnau esoo wie d Maade im Spägg.
Was de als Vegaaner gwiis nie saisch,
lieber e Luus im Salaat, als gaar kai Flaisch!
Sin dyny fimf Kinder am ummewiete,
denn duesch e Sagg voll Flöö du hiete.
Und wenn er emool nyt anders sott griege,
denn frisst dr Deifel zur Noot sogaar Fliege.

Do schliesst sich au zem Mensch dr Booge,
denn d Underernäärig het en bewooge,
Heugumper und Maade in d Burger z phagge,
de Hipsters drfiir no e Batze ab z zwagge,
mir meege Pizza und Burger au soo
und wänn d Grabbeldier Timon und Pumba drum loo.
Die baide sin uff die Grabbler dotaal versässe,
mir aber saage: Inseggte (fr)ässe kasch vergässe!
Mir wänn e Määl- statt Määlwuurm-Suppe,
maint au unseri JG-Gruppe!
Bi-ne-re Grille- statt ere Ziibelewaaie,
wurds de Binggis graad dr Maage draaie,
statt Heugumper am Disch miesse aabeschlinge,
dien mir die Kaibe bim schutte bezwinge!

Im Geegsatz zu dr Staizyt zellt underdesse,
Inseggte-Food zu de Delikatesse.
Seggle im Spunte Schwoobekääfer umme,
denn sputte deert ainewääg numme die Dumme.
I wett dir aigedlig kai Floo ins Oor setze,
und di in neggschte Coop Pronto hetze.
Blyyb gscheiter, und daas isch my Root,
bim Bulee-Blätzli und Rinds-Entrecote!
oder gniess du, joo das giengti au,
e gluschtige Laggs oder e Forälle blau.
In däm Sinn wintsch ych allne e Guete,
und spiess dr Määlwuurm an my Angelruete.