Stamm Fasnacht 05: Schall und Rauch
Vortrab: Rauchbekämpfer
Reggwysyt: Rauchentsorger
Lampe: Raucherzyger
Pfyffer: Rauchabwehr
Majoor: Rauchentsorgis-Liferant
Dambuure: Rauchwürscht
Fasnachtsvideo
[wpvideo O179LUwC]
Spale als Füürwehrmänner und -fraue schritte us gäge all die kleine und grössere Rauchentwicklige wo sone Glimmstängel produziere duet.. lueg sälber
Fasnachtsbilder
Zeedel
Zeedel 2005 : Schall und Rauch
Wär raucht, sait gärn: „Ich biin e Gniesser.“
Schyssebybbi, s isch e Spiesser
und uff en trifft, am beschten ämmel,
was d uff em Päggli gsee kaasch: Camel.
Denn wien e Kind am Nuggi kaut,
wenn äs sy Druggi brav verdaut,
so suggt sich dää durch s Läbe duure,
wo mit em e Kemmi in dr Schnuure,
vom Morge frieh bis Zoobe spoot,
mit Schall und Rauch durch s Lääbe goot.
Wie gail sii mit de Lippe zugge,
wenn sii dr Rauch in d Lunge schlugge
und dernoo durch d Kerperlugge
asthmatisch wiider uusedrugge:
uss dr Nasen, uss den Oore.
uss em Muul, uss alle Poore.
Es streemt dr Rauch, mir wurd das gruuse,
zum Nabel und zum Buusen uuse;
jä mänggmool kunnt dr Qualm bim Winde
als blaue Dunst sogar vo hinde.
Zum Rauch kunnt no dr Schall derzue!
Drum herrscht, wo graucht wird, sälte Rueh,
will s in de Bronchie ratteret
d Härzglabbe ständig flatteret,
dr Raucherhueschte schalleret,
wie im Dienscht, wenn s balleret.
Hett sich der Ruess im Keelkopf ghyfft,
no heersch, wie s Stimmband Bartok pfyfft
und wien e Meute Hind, wo bällt,
deent d Stimm vom Raucher, wenn si gällt.
Wär raucht, isch mit syym Raucherbai
dehaim fascht Daag und Nacht ellai,
denn soo ain stinggt uss Muul und Maage
wie z Buus im Buur sy Gillewaage.
Kuum fuffzig Joor alt – und scho hoggt er
jede zwaite Daag bim Doggter:
Im Wade hett er Veneschmärze,
d Bronchie sinn voll vo Wärze,
d Nase foot aa moodere
dr Hals muess ständig koodere,
und in dr Bloosen, uff dr Milz
wuecheret dr Fliegepilz.
D Keele strotzt vo dunggle Moose.
Dr Doggter sait: „s isch e Nekrose
und s Röntgebild duet mi belehre:
Mit Ihne kennt me d Stroosse teere.“
Das bringt zwor d Raucher nitt zum Gumpe:
jetz wäxle si zum Rösslistumpe;
bis sii au d Pfyffe nimm verkrafte,
will d Gurgle gurgle, nesse, safte.
Doch s schlimmscht isch, und das waiss me hitt:
Au wär nitt raucht, raucht passiv mit.
S kunnt digital durch s Telifoon
e Rauchschwall statt em gwinschte Doon.
De heersch im Cliquekäller flueche,
muess men im Qualm enand go sueche.
Und wenn e Raucher schmuuse duet
no hett sy Frau, trotz gsundem Bluet,
scho mänggmool noon em Schmutz vom Maa
e Nikotinvergiftig ghaa.
Uff soon em en Eländ lytt kai Sääge.
Drum kämpfe d Spalemer dergääge,
denn Spale-Cliquen isch bekannt,
dass sii sich gärn im ganze Land
mit Yyfer, Iberzygig, Muet
fir d Volggsgsundhait yysetze duet
und sich am Abstinänzgedangge
sit ee und jee duet ufferangge.
Das Ideal sott me nitt dämpfe:
drum dien mir gege s Rauche kämpfe.
S bruucht, fir dr Nikotinzwang z stille,
kai Wunderhailer und kai Pille,
am beschte hailt, mit Garantie,
em Kneipp sy Wassertherapie.
Drum spritze mir uff Männer, Fraue,
wo an dr Fasnacht sich getraue,
d Stadt mit Schall und Rauch z versaue.
S wird abgspritzt, wär mit Qualm und Schwade
dr suubre Basler Luft duet schade.
Au wär sich vor uns will verstegge:
mir finde sii in allen Egge;
e jede Raucher wird erfasst
und jedem wird e Sprutz verbasst.
Z Basel gitt s, ihr wärdet s gsee,im Moonet Merz kai Raucher mee.
Doch wär nitt raucht, soll jetz nitt kraje:
s näggscht Joor kunnt Wyy und Bier an d Raije.
Nota bene vom Värslibrinzler:
Ich hätt die Värs nie schlyffe kenne,
wurd nitt bim Dichte d Pfyffe brenne.
ladärnevärsli
D Frau Zanolari qualmt verglemmi
wie vor Joore s Ciba-Kemmi.
E Raucher maint, wenn är mit Luscht
am Stumpe lutscht, s syg d Mueterbruscht.
Es glaggt d Arterie dr Vene:
Ich kaa mi wägem Rauch nimm dehne.
E Kräbbsli sait zur Zunge:
Ich wäxle jetz in d Lunge.
Unser Sujet gfall er e,
sait (wägem Name) d Schallere.
E Raucherbai zum andere:
mir geen drei Schritt go wandere.
E Raucher sait: „Ha ganz vergässe
s Kamel het d Sexhormönli gfrässe.“
s gitt usser schwarze Lunge s Schloote
schlaffi Glieder, gääli Pfoote.
s kaa, wäge de Gsetz, de n ängere,
dr Rauch jetz d Luft nimm schwängere.
D Frau Meier sait zu ihrem Maa:
De stinggsch noo Rauch, trotz de Ricola.
Dr Eiger zur Jungfrau: Dr Mönch isch e schlimme!
blyyb standhaft und brav, suscht bisch es bald nimme.
