JG Bummel 2009

Dr Florian het si letschte Bummel in dr IG für uns Revue passiere lo.. merci:

Es isch Sunntig, dr 15. März 2009: Dr Bummel isch jedes Joohr ebbis Speziells! Noch de Drey Scheenschte Dääg, wenn dr ganzi Zauber ummen isch, alli Räppli  verschwunde sin und dr Alltag wieder aagfange het, isch d Fasnacht scho fascht wieder für e Joor verbi- aber zum Glück nur fascht! Denn an drey Sünntig derfsch nomol das herrliche Fasnachtsgfyhl erläbe, wenn die ganzi Stadt läbt und `s durch alli Gässli ruesst und pfyfft! Au das Joor isch dr Bummel für die Jungi Spale wieder ebbis ganz Bsunders gsi. Für e paar sogar dr erschti oder aber au dr letschti Bummel mit dr Junge Garde. Mir hän ys am viertel ab zääni am Bahnhof SBB troffe und sin zämme uf Laufe gfahre. Dert hän mir in dr warme Sunne kenne gässle und hän denn am Mittag e super feins Ässe becho, was jo au nid sälbstverständlich isch! …..

Mir sin natürlich au nochem Ässe no durch die scheeni Altstadt bummlet, bevor mir denn am spötere Nomidaag wieder im Zug zrugg uf Basel gange sin. Kuum aakoh, sin mir quer durch d’ Innestadt gloffe und hän ys bis zu unserem Käller pfyffe und drummlet. Dert het ys `s gliebte Wienerli mit Brot und Schoggi erwartet! Es isch e sehr e gmietlichi Pause gsi und mir als Jungi Garde hän’s mega toll gha mitenand- und so noch ere Stund sin mir denn au z’ Oobe nomol so richtig uf d Gass zum die letschte Stunde vo dr Fasnacht in volle Züg z gniesse. D Spale isch logischerwiis au das Joor d Freie durab- e absoluts Highlight! Ych glaub, die Jungi Garde ka stolz uf sich syy, denn musikalisch und stimmigsmässig isch es dr absoluti Hammer gsi! Denn het me scho langsam ans Ändi miesse dänke. Und kurz vor de zääne isch denn au dä Bummel mit em Wäg zum Spaledoor sim Ändi immer nöcher ko. Wo  mir unterem Spaledoor traditionellerwyys mit eme rekordverdächtig schnälle Spaledöörli abgschlosse hän, sin sicher bi vyylne au e paar Tränli nid usbliebe.

Für mi isch es die allerscheenschti JG-Fasnacht gsi, won ych ha dörfen erlääbe! Ych wünsch mir für die Jungi Garde, dass sie die super Stimmig vo däm Joor mit ufe Wääg nimmt- und sag in däm Sinn:

Scheen isch es gsi, adie Fasnacht- und danke!

Bricht: Florian Stähli

Bilder vom JG Bummel 09

{yoogallery src=[/images/bilder/2009/jungi/bummel] width=[60] height=[0] title=[Junig Bummel 2009] style=[slideshow] effect=[fade] spotlight=[1] prefix=[thumb60_] thumb_cache_dir=[thumbs60] thumb_cache_time=[1440] load_lightbox=[1] rel=[lightbox[mygallery]] load_lightbox=[1] resize=[1] order=[asc] count=[10]}