Stamm Fasnacht 2010 – Lustig ist das Zigeunerleben!?
Sujet: Lustig ist das Zigeunerleben!?
- Vordraab: sin Schäreschliffer, Woorsager, Kesselfligger
- Reggwysyt:was me halt so brucht unterwägs
- Lampe: zaigt d Wooret
- Pfyffer: sin die halbi Sippe
- Majoor: e Danzbäär
- Dambuure: sin die anderi halbi Sippe
Zigyynerinvasion! Es vergoot efang kei Daag mee, wo nit irgendwo e Zigyynerbandi duet yybräche… Kum leen sich die Sippe im Elsass niider, styyge z Basel d Yybrüch rasant aa. Am Bahnhof bättlets efangs an jedem Egg
e und in dr Freye gseesch alpott Zigyynermusikante. Die Meinig wird dir ämel vermittlet, wenn divärsi Schwyzer Zyttige duesch lääse.
Mir hän-ys gfroggt, eb me das alles so eifach ka pauschalisiere. Ischs denn wirklig eso, as d Zigyyner eifach us Plausch
dien yybräche? Nämme d Yybrüch wirklig zue, wenn e Sippe in Saint-Louis duet cämpe? Oder gseet d Realität andersch us?
Schlussändlig gits nur ebbis: dr Sälbschtversuech! Drey Dääg lang sin mir als Bättler, Yybrächer, Kesselfligger, Woorsager, Schueputzer, Mässerschlyffer und Stroossemusikante unterwägs. Fazit wird spöter zoge…
- Bilder vo dr Zigyynerfasnacht
- Zigyyner-Sujet in e paar Wort
- Zeedel
- Zeedelviedeo vom Stamm und Alti Garde
- Zischtigsgruppe als Matrose in dr Baz
Bilder vo dr Zigyynerfasnacht
Sujet 2010 in e paar Wort
Syt em Summer 2009 ischs amtlig: sobald as es im Elsass e Zigyynersippe het, gits z Basel mee Yybrüch. So ämel häns d Zyttige vermäldet. Es isch heggschti Zyyt, as me dergääge ebbis unternimmt! Mee Bolizei und härteri Kontrolle an dr Gränze sin s mindeschte, wo me muess mache!
Dejà-vu?
Hämmer au gsait! Es wird e Studie in Uftrag gää, as denn repressivi Massnaame besser kasch rächtfertige. Aber mit allne Bolizeiyysätz und allne Gränzkontrolle wärde nur d Symptom bekämpft. S eigentlige Problem bestoot wyterhin. Es wär an dr Zyyt, sich z frooge, was d Hintergrind sin. Wiiso dien d Zigyyner yybräche? Wiiso hets als wie mee Bättler am Baanhof? Und wiiso isch uns das friener nit ufgfalle?
Mir wooge dr Sälbschtversuech… die ganzi Spale isch drey Dääg als Zigyyner-Sippe unterwägs. JG, Stamm und Alti-Garde – alli EI Sujet. Alli EI Sippe! Iber 250 Zigyyner… e regelrächti Invasion. E kunterbunte Mummeschanz – als Plädoyer fir Akzeptanz.
Spale 2010: iber Bättler, Mässerschlyffer, Stroossemusikante und Korbflächter.
Spale 2010: iber e Kultur, wo uns Schwyzer total unbekannt isch.
Spale 2010: iber e Volk, wo syt dausige vo Joor verfolgt wird. Verfolgt well mer dien umereise – und am umereise well me-n-ys verfolgt.
Spale 2010: iber dr Generationekonfliggt innerhalb vo dr Sippe… und d Gränze vo dr Integration.
Spale 2010 – Lustig ist das Zigeunerleben!?
Zeedel 2010: Lustig ist das Zigeunerleben!?
An däre Stell merci unserem Zeedeldichter Werni Laubi fir dr 41. Spale Stamm-Zeedel! Chapeau!
Unsri Alte sinn total dernääbe
mit: „Luschtig isch s Zigüünerlääbe!“
und iren alte Märligschichte,
wo si erfinde dien und dichte,
wo d Fraue Wullesogge strigge
und d Männer alti Kessel fligge,
wo, wenn är Not het, jede Maa
an jede Baumstamm brünzle kaa,
wo men e Bio-Lääbe gniesst
und, wenn s ain het, e Hirschbogg schiesst,
wo kain der ander ploggt und hasst,
wo jede so läbbt, wie s em basst.
Die Alte könne nitt begryffe,
dass s fertig isch mit Schäreschlyffe,
und dass das luschtig, sorglos Lääbe
wo die Komposchti no draa klääbe;
an de Hoor isch aanezoge,
gflunggeret, erfunde, glooge.Me het in de vergangne Zyte
ys aanegstellt als Parasyte:
mir diege wilderen und stääle,
Bäre, Ross und Kinder quääle,
mir syyge dräggig, diege stingge,
mir wurde suffen anstatt dringge,
Gulaasch ässen ooni Bschtegg,
für d Fraue syyge mir e Schregg,
der Rogg voll Löcher, Strümpf, wo lotze,
statt schaffe diege mir schmarotze.
Me het ys, statt für s Bruuchtum z loobe,
als we mee in s Offside gschoobe,
an Pranger gstellt und inhaftiert,
versklavt, verstümmlet und kastriert.Euri Seel syg unbefläggt
und unsri, sagen iir, verdräggt?
Mir froogen euch: Jä sinn mir schlächter,
als iir, die Brave? Sinn iir grächter?
Sinn unsere Kinder so vyyl minder
als euri Kind- und Kindeskinder,
wo kiffe vor em Morgenässe,
will sii wänn d Pflicht und d Schuel und vergässe,
wo sii in vier Dääg fünfmool schwänze?
Die hänn mit Vier scho z diggi Ränze
vo Burgers und vom: Ich go Jogge?,
wo siibe Stund am PC hogge,
und d Muus am Bildschirm ummeschiebe
für Gwalt und Mord und Dootschlag z iebe?S isch woor: in der Vergangehait
hän d Basler als „Me git nyt“ gsait.
Doch jetz, wo Grien und Rot floriert,
wo s Rächtbikoo d Pflicht dominiert,
wo sozialgrächt haisst: es sott,
wär hett, däm wytergää, wo s wott,
wo die, wo z Basel s Sage hänn,
Gerächtigkait für alli wänn,
will sii als jung scho gsait hän: „Heilig
isch ys in Zuekunft d Umverteilig!“,
au will me singt in schöne Lieder:
„Alli Mensche wärde Brieder“,
wänn mir jetz, dass uff dären Ärde
die schöne Wörter umgsetzt wärde
und das in z Basel z allererscht,
will Luxus und Verschwändig herrscht.
Mir hän e Menscherächt uff s Gsundsyy,
uff Spyys und Trank, uff s Satt und Rund sy.
Bi euch liggt Kapidaal, wo doot isch,
statt dass s däm Volgg nutzt, wo in Not isch,Drum kömme mir mit Unggle, Dante
zu euch als gschetzti Imigrante.
Durch uns wird d Basler Wirtschaft vyfer,
dangg Horoskop und Schäreschlyffer.
Unseri Fraue, wyysi Wääse,
dien uss der Hand euch d Zuekunft lääse,
wo alles stimmt; s goot nüt in d Hoose,
wie bi de Schwyzer Stimmprognose.
Für unseri Auto, Wääge, Zält
schänggen iir ys s Kannefäld;
luut Menscherächt bruucht s Zämmeläbe
vyyl Platz und isch kai Zämmeklääbe.
Drum könnte d Basler z Ettige,
in Riechen und in Bettige
uns Zigüüner zue sich nää
und jedem zwai, drei Zimmer gää.
Bestimmt freut s d Basler Oeko-Perle,
wenn mir is in der Langen Erle
unter däne schönen alte
Eiche s Weekänd wurde gestalte.Zuversichtlig dien mir hoffe:
iir syyge sozial und offe
und dien ys mit de Hünd und Gaisse
in eurer Stadt wilkomme haisse.
Doch wänn iir, was is ghöört, nit gää,
no miesst e mer ys s Rächt halt nää
und wenn iir schnarchlet – s wär nitt gstoole –
unsere Dail bi euch go hoole.
Zeedelvideo vom Stamm und dr Alte Garde
eine Reportage von Servus TV über die Basler Fasnacht mit Interview mit em Martin Horny