Spale Klangperformance @ IBA – Basel

Spale Klangperformance @ IBA – Basel

           

Spale Klangperfomance2013

Wär het si nid alles scho gseh, die farbige Plakat wo die Internationali Bauustellig dien akündige?
Zur Ereffnig vo dr Projektschau het drum am letschte Fritigobe (18. 10. 2013) e Klangperformance stattgfunde, wo au d Spale e Tambouregruppe gstellt het. Vo dr Mittlerebrugg rhyabwärts bis zur Europabrugg isch jewlys alli ca. 100m e sone Gruppe stationiert gsy, wo denn hätt sotte e Trummelsignal rhyabwärts wytrgä. 

Punkt finf ab 7ni isches denn au scho los gange mit de erste 5er-Rief wo uns vo dr mitlere Brugg här erreicht händ. Zuesätzlig zu de Tambouregruppe sin au no vili Schiff uff em Rhy untrwägs gsy, eins drvo isch es „Klangboot“ gsy, wo d’Drummelkläng mit ere „Nah-Fern Choreographie“ basierend uf „experimenteller Musik und auditiver Kunst“ (Zitat vom Kinstler) untrstiitzt het. D Musig het in etwa deent wie wenn e Minimal-DJ e Schiffshorn wurdi bediene. Mit dr Zyt isch denn au unseri Gruppe uf dä auditiv und experimentelli Musikgschmack cho und het in nahezu perfäggtem Iklang mit de andere Gruppe diversi Trummelstreich-Variatione statt em 5er-Ruef erprobt. Und eso ischs Rhybord insbesondere an unsrem Standort zwüsche Dreirosebrugg und Dreiländreck (dert wo hinde d Roma und Güeterzüg sin) zu eme Mekka vo Basel worde, d Lyt sin an Rhy gströmt, s’isch kei durecho me gsy und me hets sich gfühlt wie vorem Füürwärk am 31. Juli. Um däne vilne Zueschauer au eppis z biete, hets denn (programmmässig) 2 Durchläuf vo dr Pfyffer-Retraite zämme mit de andere Tamburegruppe gä. Nach ere wytere Rundi vo Trummelsignal simr denn direkt bi unserem Standort vom Schiff abgholt worde, wo uns zämme mit de andere Beteiligte zem Dreiländereck brocht het. Derte hets zwar kei Cervelat-Prominenz, wie sunsch bi so Aläss üblich kah, drfür e feini Gratis-Wurst vom Eiche mit Freibier. Alles in allem e lustige Oobe, wo mr nid so schnäll wärde vergässe.

Bricht und Titelbild: Veegeli, wyteri Fotos und MP3: David

2-3 Wyteri Bilder und verschiedeni Radiobricht kasch do aaluege im intärne Berych vom Stamm

Ein kleiner Eindruck der elektrisch verstärkten Schifffahrtshörner und zum Schluss noch einiger Tambouren siehste hier
Quelle Video: http://www.youtube.com/user/wirtshauslaermer