JG-FASNACHT 2014 : „Dr Otti het ys e Märliwält gschänggt, wo bis zu uns an d Fasnacht längt“
Sujet: „Dr Otti het ys e Märliwält gschänggt, wo bis zu uns an d Fasnacht längt“
Wer kennt se scho nid? Die glaini Häx wo unbedingt mecht mit de grosse Häxe uff e Blocksbärg fliege, s glaine Gschpängscht mit sim beschte Fründ em Schuhu, dr Wassermaa mit sinere rote Zipfelmütze und nid z vergässe dr gfürchigi Räuber Hotzeplotzmit em Kasper und em Seppl. Dr Ottfried Preussler isch dr Schriftsteller vo all däne bekannte Kinderbiecher und het Figure gschaffe, wo unseri Kindheit präge oder prägt hänn. Laider isch dr Otti im vergangene Joor vo uns gange und zu ehre vo ihm bringe mir jetzt sini tolle Figure an d Fasnacht.
Die Jungi Garde wird d Mensche an dr Fasnacht in e Märliwält mitnäh und e mänge Erwaggsene am Strosserand wieder zrugg in sini Kindheit versetze.
- Vortrab: glaini Gschpängschtlis
- Binggis Pfyffer: glaini Häxe
- Binggis Tambuure: Wassermänner
- Jungi Garde: Kasper & Seppels
- Tambuur Mayor: Dr Räuber Hotzeplotz
- Requisit: Goldkischte vom Räuber Hotzeplotz
- Yyschrybige 2014: Kumm doch au zur Junge Garde vo dr Spale Clique
- Fasnachtsinfos als PDF
- Spaländer Junge Garde
Fasnachts- und Zeedelvideo
Fasnachtsbilder
Bilder vom Laurent + Zoe Burdet, Peter Katz und Flavio Magliozzi
Zeedel 2014: „Dr Otti het ys e Märliwält gschänggt, wo bis zu uns an d Fasnacht längt“
Dichtet vom Yves Schachenmann
Es hän emool vor langer Zyt,
ime Land gar färn und wyt …
E Prinz und e Prinzässin gläbt,
und eine wo nach beesem sträbt.
Esoo feen alli Määrli aa,
do halte sich d Autore draa.Uf Matte, Agger, Fäld und Wald,
liggt fiecht-kalte Nääbel, dr Winter kunnt bald.
Die farbige Bletter falle an Boode,
Jagge und Stiifel sin wider in Moode.
D Famyylie goot ainewäg gäärn go spaziere,
dr Bello kunnt au mit, uf all syne Viere.
D Finger sinn klamm und d Bäggli ganz root,
s dämmeret glyy well d Sunne frie goot.
D Famyylie keert an d Weermi zrugg,
deert gennt me sich e haisse Schlugg,
s Schmyynee gnischteret woolig und waarm,
dr Bappe hebbt dr Glai im Aarm,
D Mamme hoggt am Kacheloofe,
und häärzt die baide jingschte Goofe.
Im Schauggelstuel gaagelet s Oomi Joos,
e digge Schungge uf em Schooss.
D Gnäggis sinn muggsmyysli still,
well jeede s Määrli loose will.
Ottfried Preusslers Hotzeplotz,
em laide Suudelwätter z drotz.
Nur dr Oopi isch scho nimmi z wegge,
und dr Bello brinzlet in e-n Egge.
Soo lauft daas scho sit fuffzig Joor
und sicher au scho lang drvoor …
Die friener Määrli-Noschdallgyy,
isch hitte laider längscht verbyy.Die Junge vo hit dien statt Määrli loose,
game und chatte bis zer Arthroose.
Hit spiilt in Basel au dr Daig,
statt Biecher z lääse, Counter Strike.
Si kenne, und daas find yych schlimm,
dr Justin Bieber doch s Schneewittli nimm…
Statt zämme eppis duss z’erlääbe,
dien si lieber vor em PeeCee glääbe.
Statt sich z Dräffe, zämme z schnuure,
gänn si jeede Saich uff Whats App duure.
Sälbscht die altbewäärte Leschtereie,
dien em Twitter scho zem Opfer gheie.
S ganz Lääbe spiilt, sait d Mamme knapp,
sich numme-no uff Facebook ab!
Statt eme gmietlige Oobe in dr freie Naduur
gits Partys, Konzäärt und dr Vodka grad puur.
d Eleggtronigg duet unser Dängge yyschrängge,
au d Eltere mien bim Schängge nymm Dängge.
Stundelang hängge Buschis am I-Pad umme,
kai Wunder duet d Gsellschaft langsam verdumme!
Y froog mi, woo fiert daas no aane?
Und posts grad uff Facebook, nundefaane!Gwiisi Dradizioone dien zem Gligg no gryffe,
wie ee und jee gits au jungi wo Pfyffe,
wo sich in-ere Glygge s ganz Joor anngaschiere
und nit all zwei Minute uffs Händy mien stiere! Unseri Junge eere näbscht em Berni Heussler,
daas Joor an dr Faasnacht, dr Ottfried Preussler.
Dr ganzi Zuug isch farbefroo,
duet us em Otti sine Figuure bestoo.
Dr Hotzeplotz duet dirigiere,
und d JG vo dr Spaale fiere.
Dr Vordraab duet be-Gaischt-ere,
Häxe diens Pfyffe maischtere
Wassermänner sin am Drummle,
Seppels und Kaspers dien umme bummle.
Mit vyyl Gspyyr und voller Fantasyy,
laadet äär zu syne Gschichte-n-yy.
Dr Hotzeplotz raiberet dur d Stadt
Gspass und Vergniege uff jeedem Blatt.
Me dailt sich Fraid, Laid und au d Ängscht,
mit dr glaine Häx und em glaine Gschpängscht.
Dr Otti erraicht vyyl mee Lääser als yych,
vo New York nach Rio und zem Dalbedyych.Näb-e-me Fungge Wooret wird vyyl ibertryybe
und gflunggeret bim Määrli schryybe.
Dr Dichter het sich d Freiheit gnoo,
in dr Bolytigg ischs allewyyl esoo.
Wottsch in dr Schwyz in d Bolytigg,
denn draag uff, jä, meegligscht digg!
Wär haltet sich scho an Verspräche,
sin die nit doo nur zem se bräche?
Me duet die aigne Waalpharoole,
noch dr Waal grad iberhoole.
S wird bschisse, glooge, understellt,
vyylfach numme laui Luft verzellt.
Anderscht als d Määrli und daas isch fadaal,
kennt d Bolytigg wäder happy end no-ne Moraal!Dass me «God Bless America»,
iberhaubt no saage kaa,
liggt noch acht Joor Bush und Dramaa,
an dr Waal vom Heer Obama.
Em Tschortsch fäälts näbscht Intelligänz,
an Charismaa und Elogwänz,
au reede kaa dr Georg Bush nit,
daas alles bringt dr Barack mit.
Äär wott dr Grieg geege d Afghane stoppe,
statt mit dr Braggtikantin z … shoppe.
Quantanamo macht äär grad zue,
daas gäbi gaar nit soo vyyl z due.
Waas isch us de Verschpräche woorde?
D Amis dien allewyyl no moorde,
si glääre uff und fliege Droone,
beschpitzle sämtligi Nazioone.
Wie Saiffiblootere blatze d Verschpräche,
statt Friede und Hoffnig gits Griegsverbräche.
Äär stellt, das duet e jeede gruuse,
sich au als Määrli-Dante uuse!Und wie heere äggscht die Määrli uff?
frogt sich ain und regt sich uff.
Wie ischs bim Prinz noo wittergange,
hän si dr Beesewicht scho gfange?
Jä wenn si noonig gstoorbe sin, denn blibe si zu zwait,
und lääbe gligglig und zfriede bis in alli Ewigkait.
Aabelaade: FAsnachtsinfos und Zeedel_2014_Junge Garde Spale Clique
Yschrybyge fir Maitli und Buebe ab dr erschte Klass sinn an de
Samschdige,
- 15.03.2014
- 22.03.2014 und
- 29.03.2014
jewyyls vo zwai bis am vieri am Nomidaag im Glyggekäller an dr Schitzemattstroos 16a.(Yygang Hinterhoof vo dr Poscht)
Usskunft gitt d Obfrau: Bettina Meier, 079 384 03 20 / bettina_meier@gmx.ch
Infos: Yyschrybige 2014: Kumm doch au zur Junge Garde vo dr Spale Clique
