Spale JG-FASNACHT 2015 : GAME OVER – Mir wänn die alte Spiilzyyg wiedr zrugg!

Spale JG-FASNACHT 2015 : GAME OVER – Mir wänn die alte Spiilzyyg wiedr zrugg!

           

IMG_5501

Spaleclique Jungi Garde (Binggis vor dr Ladäärne, JG noch dr Ladäärne)

Sujet: „GAME OVER – Mir wänn die alte Spiilzyyg wiedr zrugg! “

Ditti, Teddybäre, Legostainli – Spiilsache wo d Kindheit vo de hüttige Erwach- sene prägt hänn. Stundelang isch me beschäftigt gsi mit de rote, blaue, griene und gäle Stainli fantasievolli architektonischi baute zämmezstelle, verschie- denschti Szenarios mit sine Ditti duurezspiele oder eifach mit sim Teddy z schmuuse. Am töllschte und spannendschte ischs denn gsi, wenn me das zämme mit sine Gspäänlis het kenne mache. Lauft me hitte in e Kinderzimmer verschriggt me – Wo sind Dittis? Wo d Lego? Und was isch mit em Teddybär passiert? Verschwunde sin die Spiilzyyg us de Kinderzimmer. Statt em Teddy wird hiitzutags Ipad gschmuust, anstatt Legomännli het me d Computermuus in dr Hand und wenn überhaupt bi de hittige Kinder Ditti no exischtiere, denn högschtens virtuell. Das goht uns z wiit! Mir vo dr Junge Garde Spale wänd
die alte Spiilzyyg wieder zrugg!

Dorum präsentiere mir an dr Fasnacht 2015 dr Charme vo unserne liebschte Spiilzyyg und logge d Lüüt am Strosserand zrugg in e reali Wält, wo me no zämme gschwätzt und gspiilt het.

  • Vortrab: sin Teddybääre
  • Pfyffer: sin Legomännli und Ditti
  • Dambuure: sin Legomännli und Ditti
  • Tambuur Mayor: isch e verschpiilte Luusbueb
  • Requisit: Entsorgt die hittige, modäärne und technologische Spiilzyyg
  • Ladäärne: zeigt uff vier Sytte Helgen uss vier unterschiidlige Zytalter
    und gänn en Ydrugg iiber d‘ Spiilzyyg zer Epoche
  • Yyschrybige 2015: Kumm doch au zur Junge Garde vo dr Spale Clique
  • Spaländer Junge Garde

Fasnachtszeedel vom Yves Schachenmann

Fasnachtsvideo

[wpvideo 8hMZooF2]

    1. Bilder vo dr JG-Fasnacht
    2. Dr Zeedel vo de Junge zem loose und lääse
    3. Fasnachtsvideo
      1. Do findsch au no meh Video
    4. Yyschrybige 2015: Kumm doch au zur Junge Garde vo dr Spale Clique

Fasnachtsbilder

Bilder vom Laurent + Zoe Burdet es kömme viellicht jo no meh 🙂

Mir danke ganz härzlich am Olivier Humair und de viele Eltere und Fründe (nur e Teil vom Begleiterteam isch uf em Foti) wo unseri Junge jedes Johr durch d' Fasnacht beglaite! - ohni Euch giengs nit! Merci!!

Mir danke ganz härzlich am Olivier Humair und de viele Eltere und Fründe (nur e Teil vom Begleiterteam isch uf em Foti) wo unseri Junge jedes Johr durch d‘ Fasnacht beglaite! – ohni Euch giengs nit! Merci!!

Zeedel 2015: GAME OVER – Mir wänn die alte Spiilzyyg wiedr zrugg!

Dichtet und vorglääse vom Yves Schachenmann

Spale-Clique 1927
Jungi Garde 1948, Fasnacht 2015

Game Over – Mir wänn die alte Spiilzyyg zrugg

In Kindsgi goot die glaini Paula,

deert spiilt si am liebschte in dr Aula.

Hoggt im Schnyydersitz gnau in dr Mitti,

mit Baugletz, Junte und zwai Ditti.

Uff em Schooss dr Teddybäär,

daas isch jetz 80 Länze häär.

Dr Max het Joorgang Fimfedryssig,

goot in d Schuel und leert deert flyssig.

Dr Mitwuch Noomidaag isch frei,

dr Underricht goot bis am drei.

Dehaim duet d Mamme en erwaarte,

doch äär wett graad mit Spiile staarte.

Me findet in dr Spiilzyygkischte,

glaini Modäll-Bolizischte,

Legos, Ziigli, Teddybääre,

Moolstift, Baschtelzyygs und Schääre.

Dr Schorsch isch 15, bubertiert,

was gäärn zu vyyl Kumeedi fiert.

Äär het die Baugletz langsam gsee.

Maag anderi Hobby alls wie mee.

Inseggte fangt, uff allne Viere,

äär und duet si denn studiere.

Kääferlaarve, Raupe, Spinne,

hauptsach dusse und nit dinne.

Doch d Detail gseet äär numme groob,

und wintscht sich drum e Mikroskoop.

So isch-es gsi am Dalbedyych,

no voor dr Zyt vom dritte Ryych.

Noch-em Wältgrieg kunnt denn d Hippi-Zyt,

zem kalte Grieg ischs au nimm wyt.

Denn foot d Computer-Ära aa,

jeede mues hit soo ain haa.

Guet 80 Joor sin scho verbyy

doo styyge mir juscht wiider yy.

Dr Max vo hit haisst Kevin-Kim,

und äär kennt all die Spiilzyyg nimm.

Wär d Paula hit e jungi Daame,

so draagti si e Stedtenaame,

Eb so-n-e  Sydney, Paris oder Chelsea,

mit däm Namme äggscht ka hell syy?

Em Schorsch sait me hit Maiggel-James,

dää spiilt dr ganz Daag Ballergames.

Ab-eme Mikroskoop, sygs in de Dräum,

schloot hit kai Kind me Buurzelbäum.

Schänggsch Eleggtroonigg dien si straale,

mit ihrem I-Phone 8S praale.

In, sin PC-Game und Smartphone-App,

statt Kinderlieder loost me Gangster-Rapp.

Tamagotschi statt ’me ächte Hund,

i froog mi, isch daas wiirgglig gsund?

D RS macht hit kuum me aine,

alles Phazifischte, kennt me maine.

Statt nass in-eme Schitzegraabe,

heggle si dehaim erhaabe

vor em PeeCee, siirpfle Bier

verdrugge Pizza grad fir Vier

und ballere mit groossem Gnuss,

dehaim am PeeCee und nit duss.

Doch graad in däre Cyber-Zyt,

goot daas e männgem Junge z’wyt.
Game Over – Joo daas Spiil isch uss

denn numme Cyber, isch au Schduss,

Me schloot ins letscht Jordausig d Brugg

und wett die alte Spiilzyyg zrugg,

wo in kai Schublaade basse,

nit wie die scheene Meissner-Dasse.

Baut kreativ mit Legostai,

und spiilt, isch me emool elai

Mit em Teddy ganz normaal,

analoog statt digidaal.

D Spale-Glygge hets erkennt,

und unterstitzt drum gärn dä Trend

Me sott Teddy und Ditti fiirehoole

statt allewyyl die Game-Konsoole.

I frai mi schampaar kas kuum glaube,

dass hit no Joystick dien verstaube,

well d Kinder eenter anders mache,

mit de guete alte Sache.

Wettsch baides zämme kombiniere,

duet di dr Wääg ins Kyyno fiere,

dert kasch dr Lego-Movie gsee,

die gääle Männli in 3Dee.

Fasnachtsvideo

[wpvideo 8hMZooF2]

Do findsch no meh Video 🙂