Är bewegt die ganzi Stadt und s ganze Land. Är repräsentiert unseri Stadt uff dr grosse Bihni vom Wältfuessball und drait unsere Namme in d Wält uuse. Doch so einigi Fuessballer vo Wältformat hänn unsere FC Basel als Sprungbrätt in die grosse Ligene vom Fuessball kenne nutze, und nid wenigi kemme wieder zrugg, wenn sie ihri Zyt gha hänn. Ob de jetzt FCB-Fan bisch oder findsch, dr Fuessball isch doch nyt anders als e korrupts Spiel fyr die Riiche, de kasch nid lyygne, as dr FCB Grosses gmacht het fyr unseri Stadt und fyr unseri Liga. Uff dr Jagd noch em 2. Stäärn stoht em FCB momentan nid meh viel im Wäg. Und unseri Junge wärde d Mensche am Strosserand an dr Fasnacht mitnäh und villicht mit em Baslermarsch s FCB-Lied uss ihrne Kehle uusekitzle.

Rädäbäng Eintrag

Voordraab: Sinn Stärnegucker

Requisit: D Wältruumbasis

Ladäärne:  Dr Erfolgsaazug

Die wo pfyffe und drummle: Sinn d‘Stärnespieler und d’Bsatzig vo dr Mission

Dambuurmajoor: Isch dr Stärnetrainer

Fasnachtsbilder

(Fotografe: Nathalie Bucher, Flavio Magliozzi, Matthias Lanz)

SONY DSC

Zeedeltext (gschryybe vom Yves Schachemann)

Sait dr Bappe zue sym Soon,
hit kunnsch mit ins Stadioon.
D Mamme wo an dr Diire stoot,
waiss dass jetz e Gschicht aafoot …
Bevoor de kasch die eerschti Kischte bueche,
muesch zeerscht emool go elf Verruggti sueche.
Zää wo seggle, kämpfe, kepfle, grätsche
und aine wo ständig bim Schiiri duet rätsche.
Dangg eme Zytigsuffrueff het die Schoose zindet,
brezyys elf sin koo, dr Fuessball-Club isch grindet.
Sit mitti Novämber vor hundertdreiezwanzig Länze,
zinde d Fans ihri Pyros und dr Verein sprängt alli Gränze.
Noo vierzig Joor dr aller eerscht Pokaal,
gege GC im Cup, fir Zyyri fadaal.
Nonnemool zwanzig Joor druff mit eme staargge Kader,
aagfiert vo dr Legände, René Bader,
glaubt me z Baasel nimm an d Gaischter
und wird ändi Joor s eerscht Mool Schwyzer Maischter.
Säggsezwanzig Spiil, nur ains drvo verloore,
so wäärde bi uns z Baasel Helde denn geboore.
Im Fimfesächzig kunnt, unter thosendem Applaus,
vo Köln e neie Spiiler, är haisst Helmut Benthaus.
Uff die Ära wo denn staartet,
het d Fuessballstadt lang gwaartet.
Nach säggs Joor wird dr Benthaus Trainer,
me isch erfolgryych und spiilt als wie scheener!
Zwai Cupsiig, siibe Maischterkiibel,
sy Palmares isch gaar nit iibel …
Im Achteachzig, das duet mir im Häärzli wee,
goots fir dr EffCeeBee aabeszue in d Nati Bee.
Statt geege Real z Madrid oder in Liverpool,
spiilt me in Chenois, was isch no weeniger cool?
Ainewääg, dasch z Baasel s Wunderbaare,
kemme d Fans wyterhii, allewyyl in Schaare.
Die zwaiti Ära unter em Christian Gross,
drätte d Gigi Oeri und dr René C. Jäggi loos.
Ihn het me letschte Heerbscht am Boode-n-unde,
aagschosse, im Phargg vom Bethesda gfunde.
Mir hoffe äär wird in Kiirzi wider ganz gsund,
und s laufft em, wie em EffCeeBaasel doozmool rund …

Dass es de Root-Blaue besser laufft, das heere mir jo gäärn
und im Zweidausigundvier gits denn ändlig e Stäärn!
Dä gits nämlig fir jeede zäänte Thittel
und jeede Spiiler drait en stolz am aig’ne Kittel.
S Gigi Oeri als Stäärnli im Jaccuzzi inne,
isch, wie die ganzi Fuessballstadt, abselut vo Sinne …
Me hoolt Thittel um Thittel, schiesst Gool um Gool,
daas duet nit numme em Karli wool.
Jä, jeede kaa si Urdail fälle,
wichtig isch: In dr Thabälle…
hets no Blätzli frei grad witter hinde,
uff Blatz zwai oder drei daas wird eich gfalle,
und zwoor eich alle, vo Bäärn bis uff Sanggt Galle …
So draimt me z Baasel scho vom zwaite Stäärn,
andri Deen heert me us Ziiri oder Bäärn.
Die ainte spiile in dr Challenge League
und hoole heggschtens geege Le Mont noone Siig.
Und z Bäärn wättere si scho wider «Scheibenkleischter,
aber nächschts Jahr wird YB äuä de scho Meischter!»
Jä und wenn mir au emool verliere, macht uns daas kai Ranzewee,
denn bi Sunneschyyn und Rääge steen mir ufe-n EffCeeBee!
Z Baasel sitze die Flangge und d Schüss kemme satt,
bi de Geegner sin d Spiiler scho mied, Odermatt …
Dääne fallt geege voorne gaar kai gscheits Zyyg yy,
Au contraire mir z Baasel mit em Seppe Hügi!
Sämtligi Geegner bysse bim Xhaka uff Granit,
schnuurz ob vo Sanggt Galle, Turin oder Madrid.
Mir bätte vor em Spiil numme kuurz und flott,
zem Oli Kreuzer, Fussballgott.
Nääbe mir im Stadioon hegglet e häärzige Zwuggel,
e-n «8» uff em Shirt s stoot grooss «Beni Huggel.»
Gwadraatisch und staargg, motzt ständig bim Schiiri,
wär das isch? He dr glai Xherdan Shaqiri …
Scho bampelet bi Baasel dr näggschti Staar,
am Fischer sin’re Ruete – dasch wunderbaar!
Bim näggschte Matsch, yych glaub do tipp i,
uff drei heerligi Gool, vom Streller Pippi.
Numme aine braicht halt immer nooni,
mir liebe di – Massimo Ceccaroni!
Wenn alli goschdyymiert in d Altstadt renne,

wenn dr Baarfi duet beebe, rauche und brenne,
wenn d Mannschaft uff em Balggoon oobe stoot,
wenn Phunggt vieri z Baasel s Liecht abgoot,
wenn d Muttenzerkurve wägenem Schiiri mues pfyffe,
wenn alli Baasler ze Drummle und Piccolo gryffe,
wenn dr Oobehimmel root isch
und am blaue Ryy no Lyt driffsch,
jo denn waisch de bisch in Baasel,
wo dr EffCeeBee dehaim isch!
E Riisefraid, die glichi Emozioon,
egal ob Cortège oder Stadioon,
wuurscht ob Joggeliwuurscht oder Ziibelewaaie,
ob Arabi pfyffe oder EffCeeBee kraaie,
egal ob am Zyschtig mit holzige Zoggeli,
oder bim Samschtigsspiil dehaim im Joggeli,
egal ob Mimöösli oder gmaaite Raase,
ob Faasnachtszeedel oder Fan-Song-Fraase,
egal ob Resäärve- oder Schnitzelbangg,
du machsch vor Gligg uns alli grangg.
Jä sträng gnoo haani gaar nyt lieber,
als s Faasnachts- oder s Fuessballfieber.
Well Baasel nit numme anderscht thiggt,
sondern halt au vellig anderscht kyggt.
Nur eppis näärvt, daas isch e Saich,
dr Schlusspfyff und dr letscht Ändstraich.