JG-Fasnacht 2019: Adie Goma

JG-Fasnacht 2019: Adie Goma

           

 

«Adie Goma» – so heissts Sujet 2019 vo de Junge Garde Spale. D Goma isch
die beriehmti Gorilladame us em Basler Zolli, wo leider s letscht Joor
verstorbe isch. Sie isch bis zu Ihrem tod die allerältischti Gorilladame vo dr
ganze Wält gsi! Die Jungi Garde widmet sich drum an dr Fasnacht ganz ihre
und erwiise dr Goma ihri letschti Ehr.

Voordraab: – sin Gomas in Windle
Requisit: – isch e Buschiwage mit dr Baby-Goma
Ladäärne: – isch e Yberraschig
Die wo pfyffe und drummle: – sin Gomas im beschte Alter und sehr alti Gomas
Dambuurmajoor: – isch dr Zolliwärter

 

D Bilder

Bilder sin vom Adrian Sakurai, Merci!

 

Dr Zeedel

E alti Gorilla-Dame, d Hut isch nymmi ganz so strAFF, liggt im Basler Zolli, beobachtet vom Primate-StAFF. Ihre Kerper wird mit fortlaufender Zyt schlAFFer, si luegt drum nomol zrugg uff ihr Läbe im ZytrAFFer. Die Zyt jagd verby, wie im AFFäggt, in eim AFFezahn, daas Läbe het gfäggt!

In Basel statt in AFFrika het s Mami-AFF mit letschter KrAFFt D Geburt vom Gorilla-Buscheli grad gnabb no gschAFFt. Nach knapp zwai Daag het dr Zolli-Diräggder, i find das tOUGH, gmerggt, d Mamme stillt en nit, dä siessi, glaini AFF. Är het fir AFFe-Buscheli scho-n-e gwyssi AFFinität, bringt d Goma drum heim – statt uff d Sanität. Är zieht si dert liebevoll uff, wie si aige Kind, mit Schoppe und Windle, drum wachst si au gschwind. Si spiilt gärn mit sine zwai Buebe, si tolle-n-ummenander Doo fäält no dr Yybergang…

Si Frau maint völlig gschAFFt herrje! Do sehts jo zem gruuse us! Ha gmaint mir läbe im Aigehaim und nit im AFFehuus! D Goma winggt ab mit ihrer fiine AFFehand Fir si isch das Huus s SchlarAFFeland! Mit Pinsel moolt si yywandfrei, rAFFiniert e Bild uff d StAFFelei. Ume Hals baumelet dem junge AFF, E Fotikam’ra, jetzt bini bAFF! D Goma darf au yyberall hi mit, zem PfAFF in d Kirche, glaubsch es nit! Zem COIFFeur au wo d Hoor duet schniide, und kei Mensch muess unter ihre liide. (nit wie bi dr MAFFia mit ihre WAFFe, wo bschisse, blAFFe, Schmiergäld dien beschAFFe, rAFFgierig dien si d Monete zämmerAFFe ooni dass si sälber schAFFe. Drum duet me si wenn’s goot verhAFFte. Sofärn das d Bolizei iberhaupt ka verkrAFFte…)

Im Drämmli duet d Goma brav sitze, während dr SchAFFner ihres Billjee duet ritze. Aber BAFFe daas duet d Goma nit, und KAFFi dringge gängt au zwyt. Si sirpflet lieber, wie alli glaine AFFe, gärn Banane-sAFFt us dr KarAFFe. Drzue gits e wysses RAFFaello mit Kokos-RAFFle, D Familie Lang het scho bitz eine an dr WAFFle… So gots am Sunntig gärn ins Hotel KrAFFt, well dert e nätte Källner schAFFt. Uff em Ruggwäg sehsch in dr scheene Basler City, rAFFiniert, schrAFFierti Gorilla-GrAFFitti.

D Goma wird wilder und het z vyyl KrAFFt. Drum goots nach eim Joor wieder zrugg in d ‚HAFFt’. Dört erfrait dä siessi AFF, s Publikum und au dr StAFF. Nur die andere AFFe, hän ganz rasch scho aafo rAFFe, dass d Goma trotz em zämmerAFFe, anderscht isch als alli AFFe. Wenn d Mensche nämlig duurs Glas dien gAFFe, macht das de AFFe mächtig z schAFFe. Drum luegt e Gorilla eme andere nie in d Auge, e AFF wo das macht, dä ka nyt tauge! AFFäre het drum d Goma kaini, wär wetti denn au eso aini, wo wäder AFF no Mensch ka syy, drum löhn si die and’re AFFe syy. Eines Daages suecht si zume Maa dr Bliggkontaggt Und wird denn tschak tschak vo hinde paggt. Nur ganz kurz goot dä AFFegeili Akt, denn goot im AFFehuus alles witter im Takt. D Goma griegt uff jede Fall e AFFe-Baby, ob si das so het welle, i waiss nit, maybe? Me het Schiss gha si taugi nit zem Mami-AFF, e AFFront denn d Goma isch zwa tOUGH, doch em Tamtam ihrem ainzige Soon, isch si e liebevoll Mami. Mit agnähmem Doon, erzieht si ihn zume stattlige AFF, ooni Gschrei, ooni Gstürm, ohni GeblAFF.

Als Oma wird d Goma denn au besser akzeptiert, was zu meh Harmonie im AFFehuus fiert. Wuche für Wuche macht dr Ex-Zollidiräggder Ernscht Lang, e Spaziergang in Zolli si langs Lääbe lang. Är bsuecht dört si Ziehkind d Goma wo sich jedes mol freut wenn är kunnt, die uuralt Oma. Innerhalb vo kurzer Zyt, isch es denn für beidi so wyt. Ihr langs Läbe isch scho glyy verby Und s-isch Zyt zem truurig syy. Im AFFehuus klAFFt jetzt e grossi Lugge. E mängge muess drum e Dräänli verdrugge. Doch mir vo dr Spale dien gärn zrugg an d Goma dängge, wo eim usem AFFe-SchlarAFFeland-Himmel e-n-entwAFFnends Lächle duet schängge.

Adie Goma!