JG-FASNACHT 2013 : Fasnachtsmuseumsloos

Sujet: Mir sin Fasnachtsmuseumsloos –  drum geen mir jetzt uff d’ Stroos

Basel gilt als eini vo de europawyt bedytendschte Museums- und Kulturstedt – und doch het die wältwytt bedytendschti Fasnacht no käi äiges Museum!
Anschynend syg s Problem, ass me bis jetzt schlichtwägg no käi gäignets Plätzli gfunde het.
Dorum ergryfft d JG vo der Spale jetzt sälber d Initiative und bringt die Museumsexponat äifach uff d Strooss!
Si präsentiere uns die bedytendschte Fasnachte uff däre Ärde in der folgende Formation:

Fasnachts- und Zeedelvideo

1. Bilder vo dr JG-Fasnacht
   1. wenn de no meh Bilder wotsch gseh denn lueg doch do
2. Dr Zeedel vo de Junge
3. Zeedel und Lampevideo
4. Fasnachtsvideo
5. Yyschrybige 2013: Kumm doch au zur Junge Garde vo dr Spale Clique

Fasnachtsbilder

Zeedel 2013: Fasnachtsmuseumslos

Dichtet vom Yves Schachenmann

D Fasnacht duet sich bresentiere,
ze Zyte wo mir z Basel friere,
si findet Aafangs Friejoor statt,
seesch an de Baim oft kuum e Blatt.
Je lenger mir uff d Fasnacht warte,
no griener wirds bi uns im Garte.
Au d Politigg isch nimm wie friener,
die wird ständig als wie griener . . .

Isch der Fasnachtsabfall in der Mulde
muesch e ganzes Joor lang di gedulde
am Bummel darfsch denn nomol Schränze,
an Piccolo und Drummle glänze.
Denn ändet der letschti Fasnachtsdaag,
mit em allerletschte Drummelschlaag.

Nach warme Summerthämpratuure,
hinterlosst der Herbscht glyy syni Spuure.
Usem Käller hoolsch scho bald,
die warmi Jagge denn s wird kalt.
I gang hit rasch mit min’re Perle,
go spaziere in die Langi Erle.
Deert ziets mer glyy emol um d Oore,
und d Finger sin scho fascht verfroore.
Drum d Kappe uff, wär wott sich gwääle?
D Händ in Sagg well d Händsche fääle.
Was myyni Finger deert ertaschte,
duet my Gmiet zimlig belaschte.
Am Cortège het in hochem Booge,
das Räppli sich völlig verflooge,
s isch root und rund und sicher glandet,
und bis im Herbscht deert inne gstrandet.
Jetzt het mi d Fasnachtsweemuet phaggt,
summ scho der Moorgestraich im Thaggt.

Kimftig solls ganz anderscht syy,
denn kasch nämlig joorus – jooryy,
zämme mit de Rhybord-Rueche,
s Fasnachts-Museum z Basel bsueche.

En Yygang riisig gmacht us Yyse,
an der Kasse gsalz’ni Bryyse.
Die Broschyyre sin modärn
gsi – vor dryss’g Joor guet und gärn.
Verstaubti Exponat kasch gsee,
im Käller laagere dausigi mee.
Im hinterschte Egge kasch mers glaube,
isch d Alice Schwarzer am verstaube . . .
Statt e zwaits Mol das Museum z bsueche,
loss i mi lieber vom Zaanarzt untersueche.
Statt Spannig, Spass und Interässe,
gits Langwyyl nur, s isch zem vergässe!
Glych wie der Sven Epiney,
dä wott au glyy kain me gsee!
Sone Museum mit sottige Sörgeli,
het in Ziiri numme der EssVauPee Mörgeli.

Musee gits wie Sand am Meer,
und gwissi irritiere seer:
Wältwyyt gsee gits fascht scho z vyyli,
glaini, grossi, sehr skurryyli.

Gwissi Musee, i finds rächt fataal,
sin riisig, bekannt und monumentaal.

S beriemtischt Museum stoot in Paris,
d Mona Lisa isch dr ghaimnisvoll lächlend Bewiis.
Fimf Millione Gescht im Joor,
nämme sich dr Louvre vor.
Sone Schlange, das findi stargg,
findsch sunscht nur bi Heimspiil im Sankt Jakobs Phargg!

In Sankt Petersburg stoot d Ermitage,
wo iber meereri Etage
zwaiehalbdausig Biezer dien schaffe,
kasch säggshundertdausig Kunschtwäärgg aagaffe.
I waiss, bi sovyyl dausig Helge,
bisch z Oobe völlig uff de Felge!

Me gseet s git vyyli Superlative,
aber ains wisse alli, nur nit die Naive,
mee Prunk und e heecheri Bsuecherzaal,
gits irgendwo und nit in «Bâle».
Doch ums Häärz wirds mir schnäll warm,
e Museum fir d Fasnacht, das hätt scho sy Charme . . .

Doch s Fasnachts-Museum isch erscht en Idee,
d Fasnacht kasch nonig in Usstelligsrüüm see.
Drum geen die Junge vo der Spale,
als Fasnachtsmuseum uff d Stroosse go straale.
Nit nur unseri Fasnacht wird deert bresentiert,
au anderi Brüüch wärde scheen inszeniert.
Denn d Fasnacht gits wältwyt iiberall,
haisst Fasching denn, au Karneval.

D Dänzerinne danze Samba,
au sunnscht herrscht z Rio Ramba Zamba,
do wott au ich mol aanegoo,
kuum Stoff doch dä isch farbefroo.
Die Goschdyym dungge mi nit Laid,
e farbig freeligs Fääderglaid.
E Drittel Stoff zwai Drittel Hut,
d Sambakläng sin dief und lut.
Die Lääbensfraid am Karneval
isch fascht so scheen wie d Fasnacht z Bâle.

Z Venedig herrscht e anders Bild,
der Carnevale läbt nit ganz so wild.
Es isch dr kinschtlerisch Aschpäggt,
wo dä Event massgääblig präggt.
Scheen, filigran und ryych verziert,
dasch s Bild wo ganz Venedig ziert.
I ha mi Muul wyt off bim Stuune,
und fall no fascht in die Laguune.
I suech mer zämme mit mym Schatz,
e scheene Disch am Markusblatz.
Der dobblet Espresso belaschte syy vierfach,
bi däne Bryyse wirdsch am Moorge glaub nie wach!

Z Köln drait der Soon und au der Babbe,
bim Fasching immer d Narrekabbe.
Ein duet dreymol «dö-döö» mache,
as der Schwoob au waiss, jetzt sott är lache!
Der Kölner fyyrt undytsch, nit brav,
s Motto isch glaar: Kölle Alaaf.
Uff der Biini danzt d Funggemarie,
si het e Fääderglaid-Phobie,
drumm isch s Verhältnis eher Laid,
ai Drittel Hut, zwai Drittel Glaid . . .

D Basler gänn als Alti Dante,
sich an der Fasnacht au mol d Kante,
sy dien als Blätzlibäjass glänze,
als Harlekin dur d Gasse schränze,
dien als Waggis Mimösli verschängge,
wänn sich nit uff ai Goschdyym beschrängge.
So wänn mir das in däm Joor mache,
vier Fasnachtsgoschdyym, mir leens grache!

Aabelaade: Zeedel_2013_Junge Garde Spale Clique
Yschrybyge fir Maitli und Buebe ab dr erschte Klass sinn an de
Samschdige,

• 23.02.2013
• 02.03.2013 und
• 09.03.2013

 jewyyls vo zwai bis am vieri am Nomidaag im Glyggekäller an dr Schitzemattstroos 16a.(Yygang Hinterhoof vo dr Poscht)
Usskunft gitt d Obfrau: Bettina Meier, 079 384 03 20 / bettina_meier@gmx.ch
Infos: Yyschrybige 2013: Kumm doch au zur Junge Garde vo dr Spale Clique

• Die Jungi Spale macht am Drummeli 2014 d Drummel- und Pfyfferschuel. Schryyb Di yy, denn stoosch au Du uff dr Biihni!
• Unseri Fasnachtsbaiz Spalungge am Pflueggässli 10 isch immer denn offe,wenn s’Ladärnli brennt.
• Am Frytignoomidaag 22. und am Samschdig dr 23. Februar, dien sich alli Jungi Garde im Comité-Zält uff em Seibi vorstelle! Kumm go luege und schnuppere….

Zeedel und Lampevideo

Fasnachtsvideo