Stamm Fasnacht 2014: am Limit

Stamm Fasnacht 2014: am Limit

           

Spale Stamm Fasnacht 2014: am LimitSujet : Am Limit – Oobe wird d’ Luft dünn

Egal wo me aaneluegt – me het s Gfyyl, as alles e bitz aagspannt isch. Alles isch unter Druck. Alles isch am Limit.
Dr Schieler wo gueti Noote muess abliefere, dr Lehrer wo mit de modärne Kommunikationsforme nimm mitkunnt. Dr Manager wo sich an dr Patrouille des Glaciers mit andere Manager misst… und denn sich sälber s Lääbe nimmt. Dr öffentligi Verkeer, wo immer mee Aforderige sett erfülle – aber nur Verspötige und Zugsusfäll bringt. Die amerikanischi Wirtschaft wo dr Kollaps nur ka vermyyde, indäm d Gränzwärt uffegsetzt wärde.
Do isch dr alljöhrlichi Wettkampf am Everest mee als eifach «nur» e gueti Metaphere! Jede wott sich mässe, jede wott als erschte oobe sy… und jede wott no e neue Rekord ufstelle. E Mänge zaalt dä Wettkampf mit synere Gsundheit… und e paar zaale mit ihrem Lääbe.
Wär ganz nach oobe will ko, dä muess kämpfe… do gits kei Ruggsicht oder Mitgfyyl. Me loost nit uf medizinischi Rotschlääg und scho garnit uf sy eigene Kerper. Eifach oobe uf em Gipfel stoo. Egal was es koschtet. Egal wär derfir muess zaale.

Dr Stamm nimmt sich dr heikle Thematik vom Gipfelerfolg aa… als Sherpas sin mir die verarschte wo s Gepäck uf dr Gipfel mien schleppeMir sin die, wo bis an d Gränze mien goo. D Gepäckträger, fir as e paar wenigi sich dert oobe kenne ustoobe.
Mir hinterfrooge, eb eim dert oobe die dünni Luft nit buechstäblich in Kopf styggt. Eb me grösseri Risike yygoot, eifach nur, as me «au emol» dert oobe gsi isch. Und mir froogen-ys, eb das wirklig soo ersträbenswärt isch.

  • Requisit: schneit
  • Vortrab, Pfyffer und Tamboure: geen als Sherpas ans Limit

Bilder Fasnacht 2014

Fotos: Raphael Alu, Laurent Burdet

Zeedel 2014: am Limit – Oobe wird d’ Luft dünn

An däre Stell merci unserem Zeedeldichter Werni Laubi fir dr 45. Spale Stamm-Zeedel! Chapeau!

Der Kevin sait zum Alexander:
Mir brinzle baidi mitenander
an sälle Baumstamm in der Sunne,
wär heecher von ys drifft, het gwunne.
Der Kevin gwinnt. S probiert s der Peter.
Dä bringt s uff nynzig Santimeter.
Jetz kunnt der Hanspi aanegloffe.
Au är hett s Limit iberdroffe.

Speeter hänn si gmergt: Am beschte
kaasch s Limit in de Drämmli teschte.
Wenn als e Dramm an d Haltstell faart,
steen sii zum Sturmaagriff parat.
Es wurd zwor guet in Waage länge,
doch sii drugge, zwänge, dränge
und stregge d Schaiche, wie der Blitz,
vom Stammplatz uff der Nääbesitz.
Und will kai Gnoche proteschtiert,
wird s au im IC praktiziert.

Bald gheert me nimme zu de Waiche:
Kai Limit z hooch, fir s nitt z erraiche.
Kai Stoppliecht und kai Barriere
hemmt jetz dr Drang fir d Karriere.
Denn wär im Lääbe nyt kaa biete,
isch ökonomisch gsee e Niete.
Wär nyt risskiert, nie ebbis woggt,
nitt grampft und sich und andri ploggt,
wär nummen uff d Kanalbangg lauft
und Kassenobligation kauft,
kai shat down, kai Konkurs kaa mache,
dur s Dorf nitt raast mit hundert Sache,
wär Angscht hett, är kennt sich verkelte,
zfriiden isch mit eme Gstellte,
dä blybbt syy Läbe lang e Fäger,
und bringt s nie zum en e Laischtigsdräger.
Drum sott men alli Buschi doppe
mit Anabolika im Schoppe,
damit si speeter nyt kaa hemme,
dass si in d Chefetage kemme.
Der «Blick» schrybbt: Ain vo däne Bosse
haig sich im Stress gescht z Nacht verschosse.

Wär in der Politik will glänze
und au im Sport, kennt sälte Gränze.
Zwor zoggsch nitt ab, wie sälli Beese,
wo Boni wänn. Me buecht s uff d Speese
und duet e soo, versteggt im stille,
syy Conto à la Conti fille.
Und d Angela hett iire Gnoche
bim Raasen uff der Loipe broche.

Es stoosst ans Limit als wie mee,
bald jede Daag au d SBB.
Zwaiglaisig faare? Lachsch di grumm!
Es bruucht säx Glais. Im minimum!
Es darf, will s d Kunde wänn, in Lause
der TGV nitt duresause.
Au z Titterte sott, fir die Alte,
der ICE in Zuekunft halte.
In Balsthal will der Kirchechor
e Zusatzkurs noo Wälscheroor.
E Faart im Takt vo Viertelstunde,
verlange d Waldeburger Kunde.
Und schnäll goo muess s uff jede Fall,
winschenswärt wär Iberschall.
Doch denn bassiert s: E Zug kunnt z spoot,
will dä vor iim z frieh wytergoot.
Dä duet bim Stellwärgg, uff der Waiche,
e Gieterwage sytwärts braiche.
Will d Kueh, wo dinnen isch, muess furze,
hett d Laitig uff em Netz e Kurze.
Me hett d Limiten iberdroffe.
und s Fazit haisst: s isch nytt me gloffe.

Wär z Basel läbt, bruucht nitt wyt z goo,
fir an e vornääm Limit z koo.
Zaalsch pro Joor zwelf Riisen yy,
no bisch im Club de Bâle derbyy
und darfsch als Daigaff alle Gugge,
an der Bar der Doobe drugge.
Vom ächte Daig s deert nit vyyl haig,
es haig fascht numme Moggedaig
D Frau Spillmaa duet mit eme siesse,
Spillmaa-Mimpfeli d Lyt begriesse.
Dää Bligg zum Rhyy! Au wenn s grad saicht:
Jetz hesch s Limit de Bâle erraicht.
Der Louis Seize hett s Gäld verschwändet
und s Lääbe underem Fallbeyl gändet.
Jetz muess är, statt goo Luxus z kaufe,
im Jensyts kopfloos ummelaufe.

Wär guet der Kohlebärg bezwingt,
wäm au der Spalebärg no glingt,
dä dänggt: Vom Limit s allerbescht
bietet mir der Everest.
Bim Kumbu-Yysfall an der Biegig,
stoot s Closomat aim zur Verfiegig.
Wär d Tour nitt sälber schaffe kaa,
schafft sich e Dotzed Sklaven aa.
De findsch, wenn d Gäld hesch, immer Deppe,
wo dir dy Grimpel uffe schleppe.
Und wenn si wägem Stress dien muurre,
no gitt ene der Steck uff d Schnuure.
Stolz bisch, wenn im Kääsblatt stoot:
«Är hett mit Qual und Otemnot
im Todeskampf s Limit erkore
und isch am Zyyl im Yys verfroore.»

Uff Kreta, won en Insle isch,
umgää vo Wasser und vo Fisch,
hett mit sym Soon, em Ikarus,
e Griech gläbt namens Dädulus.
Dä wär gärn haim zu syner Lotte,
doch der Keenig hett s verbotte.
Der Dädulus hett doorum z Nacht,
uss Fädere vier Flügel gmacht
und sii mit Wachs fescht zämmeglääbt,
so dass me sicher fliegt und schwäbbt.
Är sait zum Sohn und druggt em d Hand:
«Mir fliege jetz noo Griecheland.
Wotsch aber bis zur Sunne fliege,
schmilzt s Wachs und baidi Fligel biege.
Gang nie an s Limit, Ike, y bitt dy.
Blyyb hinter mir! Flieg in der Mitty.»
Der Ike folgt nitt. S isch schytter gloffe.
Är isch im Mittelmeer versoffe.
Wotsch nitt an s Limit goo und zieh e Schlabbe,
no dängg an Ikarus! Und bsunders an syy Babbe!

Fasnachtsinfos und Zeedel als PDF

Zeedelvideo vom Stamm

Fasnachtsvideo