Gmeinsam unterwäägs: Vortraab und Pfiffer mache zämme yyre Härbschtbummel

Gmeinsam unterwäägs: Vortraab und Pfiffer mache zämme yyre Härbschtbummel

           

vom Oliver us em Vortraab

Am 18. Septämber hän sich ebbe 20 Clique-Mitglieder us em Vortraab und de Pfiffer im Devettepärkli z Basel troffe. D Lütt hän Froid ka, sich noch so langer Corona-Abschtinänz und bi herrligem Sunneschyy wiider emol gsee. Noch eme glaine Apéro het sich die Gruppe richtig Bahnhof bigää. S Ziel isch gnoo ghaim gsi aber es isch Richtig Prattele gange. Teilnäämer hän am Ziel gschtuunet ka, was hütte uff em Programm stoot: Mini-Gölfle bi Schwarzliecht. Das hän vyli no nie gmacht. Aber all hän d Plausch ka und die ebbe zwai Stund sind wie im nu umme gsi.

Zrugg z Basel hett is Stephi uff yyri lässige Terrasse Dehaime für e wyytere Apéro yglaade. Ains vo de scheenschte Terrasse z Basel.

Und zem Znacht simmer mitänand ins Restaurant Schnabel und hän dürfe derte im Trillegässli sitze. E lässige Obe mit guetem Ässe und Tringge, lässiger Stimmung und guete Gsprööch. E Dail vo d Gruppe het der scheeni Daag no im Club 59 ussklinge losse. Fascht scho als Tradition bi d Pfiffer und jetzt au bim Vortraab.

Härzlige Dangg fürs Organisiere and Muriel, Stephi, Nora und Melanie und hoffentlig snäggscht Joor wiider bimene gmeinsame Bummel.