Spale Jungi Garde Fasnacht 2022 – D Fasnacht brucht Di!
Tradition und dr Geischt vo dr Fasnacht söll wyterlääbe, au trotz dr Coronapause! Dorum hänn sich unseri Junge in klassiche und spale-typische Fasnachtsfigure zeigt und drzue uffgruefe, dass meh Kinderwieder sölle afo Fasnacht mache! Denn d Fasnacht isch eifach e tolli Sach!
Und dass das wirkligg eso isch, het d Fasnacht 2022 ganz dütligg zeigt. Bi strahlendem Sunneschiin hänn die Junge als Krayejoggi, Harlekin und Pierrot unvergässliggi Dääg könne erlääbe. Au ohni Cortège hänn sie e super Zyt kha drfür meh gmeinsami Ründeli als sunscht mitem Stamm könne gniesse.
Dr Zeedel vom Yves Schachenmann 2022
Dr Fippe isch zwelf und drotz de Waggsdumshormoone
allewyyl no wunzig, d Mamme sait em gärn Boone.
Är hofft kimpftig uff voordailhafteri Broborzioone,
e Keepfl i greesser, das wurdi sich loone.
Si Alldaag isch vollgstopft mit Attraggzioone,
zeerscht in d Schuel, dernoo darf äär sich beloone.
S Uffschtoo fi ert scho zue vyyle Diskussioone
är wett snooze und pfuuse, het Bettfl ucht-Awersioone.
Am Zmoorgedisch verdruggt är grossi Borzioone
Miesli mit Nüss und Hoonigmeloone.
E Mutzi, e Wingge fi r syni Madroone,
ab Richtig Schuel, vo deert wo si woone,
gschwind in ÖV, vier Drämmli-Stazioone,
in d Schuel zu de Glasse-Kommilitoone.
Deert vornedraa steen Prozessioone
vo SUV in dr blaue Zoone.
Die suffe alli zig Galloone
und verursache leschtigi Emissioone.
Är sig no guet und heig Ambizioone,
maine ämmel d Leerpersoone.
Am Moorge het är zwai strängi Leggzioone,
Mati stoot aa, s goot um Kalkulazioone.
D Brobleem multibliziere sich drotz Subschtraggzioone.
In Gschicht goots um d Kämpf vo de Reemer-Legioone,
um Hyroglyphe und ägyptischi Hooch-Pharaoone.
Drnoo kämpfe d Schieler mit Permutazioone,
Linguistik haisst s Fach, dass sott-y betoone.
In Fysygg befasst sich d Glass 6C mit W-Bosoone,
dasch elemendaar bi de Käärnfusioone.
In dr Muusig loose si Coverwersioone
vo glassische Stiggli mit Saxofoone.
In Geo goots um Mentsche us fäärne Regioone,
vo de Makedoone bis zue de Salomoone.
Zem Abschluss drait sichs um d Wältreligioone,
vo Erschtkommunioone bis Absoluzioone.
Kemme mer zue de Zmidaagskonsumazioone:
Fir d Mineschdrante gits zer Voorspiis e Mineschdroone,
zem Hauptgang serwiert me Epfelmuess mit Älplermagroone
und zem Dessert gits e glai Stigg Tobleroone,
drzue e still Wasser mit e-me Schnitzli Zydroone.
Und d Schielerschaft hängt an de Mobil-Deelifoone.
Denn goots wyter, ooni grooss Schoone.
Im Franzi fi ert me Konwersazioone,
s Brilliere bi de Translazioone,
weenig iberraschend die Frankophoone.
In dr Sexualkund fääle d Illuschdrazioone,
vo de Schaamregioone und intime Zoone.
Vo Reaggzioone usgleest duur Pheromoone,
verzellt de Schieler d Bioleerer-Stiilikoone.
Vo de Ereggzioone bis zue de Embryoone
tschendergerächti Assoziazioone.
Schuel-uss: Abbau vo Aggressioone,
dr Fippe isch au e Sportskanoone.
Yylaufe um zwai dotzed Pyloone,
bi grauehaft stirmische Kondizioone.
Är glänzt bim Hockey mit stargge Aggzioone,
schyycht wäder Konfrontazioone no Kollisioone,
setzt in dr Defensive die wichtige Interwenzioone.
Als FCB-Aahänger liebt är d Kombinazioone
us Root- und Blaudeen in allne Seggzioone.
Är goot ins Joggeli wäg de-n-Emozioone,
wäg de Spiiler us groosse Fuessball-Nazioone,
wäg dr Ambiance und de Gliggshormoone,
äär isch e Mega-Fan vo de Megafoone.
Im Kino luegt är e Film iber Anti-Terror-Missioone,
mit Droone-Explosioone und Exekuzioone,
mit Dedonazioone vo Gschoss us Laserkanoone,
mit Invasioone vo usserirdische Alien-Spioone.
E Hobby z fi nde bi all dääne vyyle Obzioone,
isch schwiirig und s bruucht Komparazioone,
s isch nit aifach, me drifft subdyyli Dezisioone,
graad in Zytte vo zaalloose COVID-Neiinfeggzioone,
vo Demonschdrazioone gege Moderna-Injeggzioone
vo ungiltige Visa vo impfskeptische Tennis-Ikoone.
S goot im Alldaag numme-no um Vire-Mutazioone,
um Isolazioone vo symptomfreie Zivilpersoone.
Mer befi nde-n-is in Äoone voll Eskalazioone,
mit Sanggzioone gege sämtligi Rebellioone,
mit Komplikazioone bi dr Berächnig vo Korrelazioone,
mit fäälende Sälbschtrefl exioone vo Liegebaroone,
entsprächend au d Reaggzioone vo de Redaggzioone,
heersch iibergryffend in allne Moderazioone,
medial numme-no Schreggenswisioone.
D «Schwurbler» wänn wäder Covid-Applikazioone,
no Deklaratioone vo Date in Restauratioone,
drotz de fäälende Argumentazioone …
Si zelebriere lieber s Aazettle vo Browokazioone,
vollzien Manipulazioone vo Impfreaggzioone
und halte sich an kaini Konwenzioone.
Aber s Fadaalschte sin die soziale Separazioone,
die fi ere zu Diskussioone in allne Kantoone
und laider au zu zaalryyche Depressioone …
Gnau under dääne difi syyle Konschdellazioone,
wett sich dr Fippe gäärn lo beloone,
d Fasnacht isch voller Faszinazioone
mit Millioone vo scheene Emozioone,
mit Schnitzelbängg iber Zircher oder Teutoone,
mit muusizierende Glygge-Formazioone,
mit Faarbexplosioone in de Fuessgängerzoone,
mit kreative Laarve und Gossdym-Kreazioone.
Du, bassts no? So vo de Dimensioone?
Oder bruuchts äggscht no Modifi kazioone?
D Waageglygge glänze mit iire Konschtruggzioone,
fi r d Ladäärne und d Zeedel gits Gratulazioone.
Sin Zueschauer meeglig, kunnts zu Owazioone,
fi r d Gugge mit Pauke und Sousaphoone,
fi r d Glygge mit Pfyffer und Perkussioone,
fi r d Schnitzelbängg, d Schääse, fi r d Dradizioone.
Dr Blaggeddeverkauf generiert d Subwenzioone,
e Satz Gold, Silber und Kupfer gheert in d Kolleggzioone
und d Frau-Fasnacht verbindet alli Generazioone.
Au mit Hyylgschichte vo verstorbene Persoone
wird aim d Fasnacht uff kai Fall verschoone.
D Fasnacht bruucht di, als Stimmigskanoone.
Ass si nit stäärbe, die Dradizioone.
Drum gib dr e Rugg, mach die Ewaluazioone
und kumm zue uns, es wird sich loone!
