Die Jungi Spale am Laaferi 2022 mitem Marsch «dr Pipifax»
Am 2. und 3. April ischs ändligg sowyt gsi: s erschte Laaferi het stattgfunde. S Drummeli für die Junge, wo eigentligg hätt sötte im Januar über d Bühni goh, het us bekannte Gründ miesse in April verschoobe wärde.
Und so hänn über 800 Kinder und Jugendlichi am 4. Bummelwucheänd in dr Eventhalle vo dr Mäss nomoll s Fasnachtsfieber ahstiige loh. Natürlich sinn au unseri Junge zmitzt drinn gsi und hänn das fantastische Wucheänd dörfe miterlääbe.
Nach dr ufregende Stellproob am Fritigzoobe und dr lehrriche Generalprob am Samschtignomidaag, ischs denn am Oobe ändligg sowyt gsi: unseri JG het an dr Première s erscht moll könne dr neu arrangierti Marsch «dr Pipifax» vor Publikum vordraage. Trotz de zittrige Bei und em scho bitz miede Kopf, hänn sie uf dr Bühni e super Uftritt zeigt – de Zueschauer hets eidüttig gfalle!
D Barbara Berli het dr Pfyffertäggscht vom Pipifax gschriebe und dr Roman Lombriser het drzue dr Drummeltäggscht komponiert. Sie hänn so dr Raame für dä wunderbari Uftritt gschaffe und d Idee vom Kinderlieder-Medley perfeggt umgsetzt – vyyle Dangg! So hänn vo Klei bis Gross alli könne zämme ufträtte und em Publikum s einte oder andere Schmunzle ufs Gsicht zaubere.
S isch e grossartigs Wucheänd gsi, uff und au näbe dr Bühni, und allne Beteiligte wird dä Aalass no lang in schöner Erinnerig bliibe. Härzligge Dangg an alli Junge und an alli Hälferinne und Hälfer!
