Spale-Clique

Am dasjährige Drummeli tritt d Spale Clique mit em Stück “Spale meets Cantina Band” uff. Ursprünglich komponiert worde isches vom John Williams für dr Film Star Wars IV (usecho 1977). Arrangiert für Piccolo hets dr Michael Künstle, dr Drummeltäxt stammt vom Daniel Plattner. S ‘Setting’ vo dr Spale ihrem Bühneuftritt isch in de goldene 20er Joor agordnet. Und bi genauerem aneluege entdeckt me au d Referänz zum Gründigsjoor vo dr Spale: 1927. Ganz eso wie d’ Fasnacht e farbigs Durenand isch, so präsentiert sich jo au d Wält vom Star Wars-Filmimperium.

Nit nur d Drummelikommision het bim Kreiere vom Uftritt e super Arbeit gleistet, au dank em überus grosse Elan und Engagement vo de Instruktorinne und Instruktore, wo vil Energie in s Projäkt “Drummeli ’17” investiert hän,  kunnt das aspruchsvolle Stück uf dr Bühni so guet zur Gältig.

Bilder: © 2017 aluarts (Raphael Alù)

Fürs Video und Kritike klicksch do: (mehr …)

Am 26.11. findet dr Grossbasler-Källerabstieg statt. Das Joor isch au d Spale Clique widr mitem bekannte Oktoberfest drbyy. Kum au du in unsere Käller an dr Schützemattstroos 16A und profitier vo unserem Agebot an Wysswürst, Brezel und natürlich Bier. Meh Infos und e Karte vom Käller findsch do.

Dr Flyer gits au als PDF

Liebi Bsuecherinne und Bsuecher vo däre Websytte

S Wichtigschde zerschd

Nach über 6 Joor isches widr mol Zyt worde für e Redesign vom Spale-Internetuftritt. Bim däm Redesign sin 2 Hauptziel im Vordergrund gstande:

• Zum eine s schnälle Uffinde vo de meist gsuechte Informatione. Das sinn näbe de aktuelle Bydräg zu Drummeli, Fasnacht etc. vor allem s Repertoire zem Loose, dr intärni Berych und für Extärni au dr Spalekäller. Das alles ohni die wichtigsti Infoquelle – dr Spaländer – z fest z verstecke.
• Zum andere isch e so genannts “responsive”-Design im Vordergrund gstande. Ob Tablet, Smartphone, Desktop, FullHD etc. es wird immer die glychi Sytte glade und denn entsprächend dr Breiti noch apasst. Es git dorum au kei spezielli Mobil-Sytte me.

(mehr …)

Au in däm Joor sin zahlrychi Spalemer uff dr Bihni vom (neu in Grossbasel stattfindendende) Offizielle gstande. Und einigi Spalemer hän Plätz füre Medalliespiegel erreicht!

Bi de Junge hän dr Henrik Angehrn bi de Tamboure Einzel (Saalrang 14) und d’ Pfyffergruppe dr Finalyzug leider verpasst. Trotzdäm e super Lob an euch, es brucht vil Muet uf däre Bihni z stoh!

Bi de Alte Solo/Duo het d Spale 5 Teilnähmer-Päärli ins Renne gschickt. Vo däne hän sich bi dr Vorusscheidig am Donschdig drei ins Final trummlet resp. pfyffe und dört super Plätz erreicht: Florian Stähli und Fabian Staub (Schnooggekerzli) 9. Rang, Dominique Saladin und Dominic Plattner (Naarebaschi) 7. Rang. Dr Christian Walk het zämme mit em Patrick Meyer (Die gääle Daggel) dr hervorragendi 2. Platz erreicht.

Bi dr 2. platzierte gmischte Gruppe het dr Christian Walk vo dr Spale ebefalls sini Trummelschlegel mitgwirbelt.

D Pfyffergruppe vom Stamm het nach em ins Wasser gfallene Uftritt vom letschte Joor Vollgas gä und si hän sich d’ Silbermedallie in däre Kategorie gholt. E super Leistig vo dr Nicole, Sarah, Niggi, Flavio, Laurent und em Florian!

Bi de Alte Einzel Damboure hän zwei vo de drei Kandidate s Final erreicht. Dr Olivier Boog het sich bi dr Vorusscheidig uff e 23. Saalrang trummelt. Währends em Christian Walk nid bis ganz in die vordere Räng glängt het, isch dr Sascha Herzog uff e super 6. Rang vom Final cho.

Bi de Alte Pyffer Einzel sin rekordverdächtigi 6 Pfyffer vo dr Spale aträtte. D Konkurränz isch sehr gross gsy und so hän nur d Nicole Meyer-Lehner und dr Florian Stähli s Final erreicht. D Stephanie Hediger, Claudine Plattner, Dominique Saladin und d’ Ria Meyer hän dr Finalyzug leider verpasst. Dr Florian Stähli het sich dört uff dr 11. Rang könne pfyffe. D Nicole Meyer-Lehner het ihri Platzierig vom letschte Joor könne verbessere und landet uff em 2. Träppli vom Podest mit dr Silbermedallie füre hervorragende 2. Platz!

Härzlichi Gratulation an euch alli!