Spale-Clique

    syt 1927 uff dr Gass

Spale am Offizielle 2023

Gschriebe vo dr Stephi

Wie vyyl anderi Ahläss, het in dämm Joor au s Offizielle Brysdrummle und -pfyffe wieder im gwohnte Rahme könne stattfinde. S isch allerdings s erscht moll gsi, dass alli Vorusscheidige unter eim Dach stattgfunde hänn. So het me d Möglichkeit kha, alli Spale-Gspähnli usem Publikum könne z’unterstütze (wenn me denn im richitige Saal gsässe isch…).

Ahgfange hets am Donnschtig im Einzel bi de Junge, wo dr Gian-Marco Felix gstartet isch und sich mit dr Faschtewäje ufe tolle 17. Rang drummlet het. Är isch denn kurz druffabe au no mit Kollege vo de Glunggi und vom CCB mitem glyche Marsch in dr Grubbekonkurränz uf dr Bühni gstande uns sie hänn leider wäge eim Platz d Finalqualifikation verpasst. E super Leischtig, au wenn d Entüschig do gsi isch.

Am spötere Oobe isch s denn au für dr Stamm losgange: Dr Florian Stähli het sich miteme wunderbare Nunnefirzli in Final pfyffe! Super!! Au dr Benjamin Stähli isch im Einzel ahträtte und het sich mitem Ueli ufe tolle 19. Platz im Saal drummlet.

Dr Florian isch denn no mit dr Nicole Meyer, Sarah Ziegler, Jill Hoffmann, Michelle Berns und em Flavio Magliozzi in dr Grubbe ahträtte und au do hänn sie s Nunnefirzli zum Beschte gäh. S Resultat: ebefalls d Finalqualifikation. D Freud bi allne isch riesig gsi!!

Am Fritig isches denn wyter gange mit vier SoloDuo-Päärli mit Spale-Beteiligung: Dr Olivier Boog het zämme mitem Pascal Nippel vo dr Sans Gêne dr Ueli vordreit und dr 14. Rang erreicht. Im glyche Saal ufem 13. Rang sinn dr Florian Hediger und dr Pascal Sarti mit de Alte gsi. Im andere Saal, aber ebefalls ufe 14. Platz, hänn sich d Stephanie Hediger und dr Patrick Bucherer mitem Spaledöörli pfyffe und drummlet. Wäge eim Platz hänn dr Florian und dr Benjamin Stähli als 7. mitem Hofnaar dr Final leider ganz knapp verpasst.  

Zur späten Stunde isch denn au no die Gmischti Grubbe gstartet mit dr Sandra Rudolf, Céline Saladin, Dominique Saladin, Stephanie Hediger, Alessandro Venzin, Pascal Sarti, Patrick Bucherer, Olivier Boog und Andrin Leimgruber. Die nüün schygge Saftschubbse sinn mitem Whisky ufem 11. Platz glandet. D Stimmig an Board isch vor und nachem Uftritt wie immer super gsi!

Am Samschtig Morge frieh sinn denn die jüngschte Konkurräntinne und Konkuränte an dr Reihe gsi, wo alli grad diräggt im Final gsi sinn. Die neui Binggis-Kategorie, wos erscht zum 2. Mol gäh het, isch für dr Nochwuggs e grossartigi Sach. S isch e riese Freud, dass sich grad drey Spale Binggis Pfyfferinne und Pfyffer uff die Bühni getraut hänn. Alli drei hänn dr Spitzbueb vorpfyffe und sie hänn das eifach nur grossartig gmacht! D Anouk Meyer (10. Platz), dr Erik Beer (11. Platz) und d Julia Brüll (16. Platz) könne unglaublich stolz uf sich sy. An däre Stell söll no betont wärde, dass d Julia erscht letscht Joor nach dr Fasnacht het afo pfyffe!!! Respäggt! 😊

Zoobe, im Final vo de Alte, hets denn nomoll gheisse Duume drugge. Dr Florian het e wunderschöne Hofnaar zum Beschte gäh und sich sehr über dr tolli 10. Platz gfreut. D Pfyffergrubbe het e superfätzigs Fritzli pfyffe und so dr 6. Platz erreicht. Vor allem für d Michelle isches e bsundere Momänt gsi, het sie doch an ihrer erschte Teilnahm könne e Bächer mit heime näh! Gratulation zu däm Ihstand!

Ei moll meh isches e supertolle Ahlass gsi und s het Freud gmacht, dass me sich gegesitig, Jung und Alt, unterstützt, flissig d Dume druggt und mitgfieberet het. Härzliggi Gratulation an alli Teilnähmerinne und Teilnähmer und e grosses Dangge an alli wo sinn ko unterstütze.

Die vollständige Rangliste und witeri Föteli findsch uf https://www.offiziells.ch/


S Offizielle 2018

Will d Fasnacht so frieh isch, het natürlich au s Offizielle wieder sehr frieh im Jänner stattgfunde. Vom 11.-13.01 hänn sich die muetige Fasnächtler uf dr Bühni mitenander gmässe. Natürlich isch au d Spale wieder verträtte gsi.

Bi de Junge im Einzel hets dr Nerea Petretta vo de Binggis miteme wunderschöne Arabi uff dr undanggbari 7. Platz in dr Vorusscheidig glängt. Sie het somit dr Final bi ihrer erschte Teilnahm nur um ei Platz verbasst. Das isch e grossartigi Leischtig!!

Bi de Alte isch d Dominique Saladin in dämm Joor die einzig gsi, wo ellei uff d Bühni gstande isch. Fürs Final hets leidr nit ganz glänggt, abr au dr 9. Rang isch e super Resultat.

S isch e bitz ungwöhnt gsi, dass am Donnschtig nachem Einzel denn d Vorusscheidige vo de Grubbe stattgfunde hänn. Bi de Alte Tambuure Gruppe sinn dr Liam Berns und dr Nicola Langlotz vo dr JG zämme miteme Extärne ahträtte und hänn sich ufe 12. Blatz drummlet.

Bi de Alte Pfyffergrubbe isch d Spale zwei moll vrdrätte gsi. Dr „jüngere“ Grubbe mitem Pascal Sarti, dr Dominique Saladin, Florence Saner, Sandra Rudolf, Céline Saladin und Stephanie Hediger hets wie scho letscht Joor wäge eim Blatz nit ins Final glänggt und sie hänn sich miesse mitem 4. Blatz zfriide gäh. Besser ischs dr „ältere“ Grubbe gloffe. D Nicole Meyer-Lehner, Sarah Ziegler, dr Florian Stähli, Laurent Burdet, Niggi Zittel und Flavio Magliozzi hänn sich könne fürs Final qualifiziere.

Am Fritig isch denn zerscht d SoloDuo Konkurränz ufem Plan gstande. Au dört hets vyyli tolli Resultat gäh, au wenns dasjoor leider niemerem für ins Final glänggt het.

Dr Florian Stähli und dr Daniel Heutschi vo de JB Santihans hänn sich ufe 17 Blatz pfyffe und drummlet. Dr Olivier Boog isch zämme mitem Roman Zehnder vo de Muggedätscher ahdrätte und het dr 14. Blatz gsicheret. Mitem Christian Walk und em Patrick Meyer vo de Gääle Daggel isch e witers Duo mit Spalebeteiligung uff dr Bühni gstande. Für sie hets dr 12. Blatz gäh. D Dominique Saladin und dr Dominic Plattner vo de Naarebaschi hänn mitem 8. Blatz s Final nur knapp vrbasst, will die beschte 6 hänn am Samschtig nomoll dörfe ufdrätte. Ebefalls dr 8. Blatz im andere Saal hets fürs einzige komplette Spale-Duo gäh. Dr Florian Hediger und dr Pascal Sarti hänn nit nur dr Goschdympriis gwunne (wenns ein gäh hätt), sondern hänn au pfyfferisch und drummerlisch könne überzüüge. D Stephanie Hediger het zämme mitem Luca Müller vo de Basler Rolli s Final nur um ei Blatz verpasst und hänn sich könne über dr 7. Rang freue.

Zum Schluss isch no die „jüngeri“ Pfyffergrubbe zämme mit em Florian Hediger, Sascha Herzog und em Manuel Martinelli (Männli) in dr Gmischte Konkurränz ahdrätte. Bi dr Finalbekanntgoob ischs denn richtig luut worde, wo tatsächlich ihri Startnummere ufgruefe worde isch. Au sie hänn am Samschtig nomoll dörfe „ein uuse loh“.

Am Samschtig isches denn sowyt gsi: D Pfyffergrubbe het miteme schöne Fritzli s Podescht knapp vrbasst und dr 4. Platz erreicht.

Die Gmischti het sich über dr 5. Blatz könne freue und das isch grossartig gsi. D Freud isch bsunders bim Männli und dr Florence gross gsi, will sie ihre allererschte Zinnbächer hänn dörfe mit heim näh!

Wieder ei moll meh ischs e ufregends und tolls Wucheänd gsi. An dere Stell härzliggi Gratulation allne wo mitgmacht hänn und vyyle Dangg allne treue Fäns, wo d Teilnähmer immer grossartig unterstütze.

Mir hoffe, dass es au näggscht Joor wieder einiges zum Juble und Schreie wird gäh und freue uns scho jetzt uf zahlrichi Spalemer uf dr Offizielle Bühni im 2019.

(Stephi)


Spale am Offizielle 2017

Au Disjohr het einigi Spalemer und Spalemerinne wieder dr Ehrgiz packt und si hän am Offzielle mitgmacht, wo vom Do, 26. bis am Sa, 28. Januar stattgfunde het.

Am Donnschtig het als Erschts d Vorusscheidig im Einzel stattgfunde. D Konkurränz isch wie immer gross gsi. Das het aber d Nicole Meyer-Lehner nit gstört und si het sich souverän für dr Final am Samschtig qualifiziert. Für dr Florian Stähli und dr Chrstian Walk hets leider nit ganz glängt.
Au im Solo Duo isch d Spale verträtte gsi. D Duos Dominique Saladin und Dominic Plattner (Naarabaschi) sowie Christian Walk und Patrick Meyer (Die Gääle Daggel) sin glaub immer no beflüglet gsi vo ihrne Erfolg letschti Johr und hän sich ihres Finalticket gsicheret.

© Bilder: Beat Schwald, fasnacht.ch  

Am Fritig hän denn d Gruppene miesse ind Hoose stiige. Bsunders uusez’hebe sin do die Jungi Dambouregruppe, wo sich uf e guete 6. Rang im Saal drummlet het. Es isch immer schön z’gseh, wenn dr Noochwuggs dr Muet und d Motivation ufbringt sich dr grosse Uuseforderig z’stelle und am Offizielle mitz’mache.
Bi de Alte hets denn ebeso die eint oder ander Amäldig gäh und zwar sin das äi Dambouregruppe und zwei Pfyffergruppene gsi.
Bi de Pfyffer isch dä Fritigobe leider vo knappe Entschäidige prägt gsi. Au e sälbständige Sombrero uf dr Dominique ihrem Kopf bi dr einte Pfyffergruppe und e wunderschön vordreite Fischmärt vo dr andere Pfyffergruppe, wo sich ämel im Publikum alli einig gsi si, dass dä finalwürdig gsi isch, hän leider nit ganz glängt über e 4. Rang im Saal uusez’ko. (Die erschte drei Gruppe in dr Vorusschäidig qualifiziere sich für dr Final.)

Au bi dr gmischte Konkurränz isch denn s Niveau wie jedes Johr wieder hoch gsi. D Spalegruppe het denn nomoll alles gäh und es het schlussändlich dr gueti 8. Rang uusegluegt.

Nachdäm d Spale in de letschte Johr mit vielne Finalischte vom Erfolg verwöhnt gsi isch, isch disjohr s nötige Quäntli Glück leider nit immer uf dr Spalesite gstande. Trotzdäm hän sich am Samschtig vieli Spalemer und Spalemerinne im Volkshuus igfunde zum sich de Piccolo- und Drummelkläng vo dr Nicole Meyer-Lehner, dr Dominique Saladin, em Christian Walk und notürlich au allne andere Finalischte hiz’gäh.
Nach dr heissersehnte Rankgverkündigung het denn d Party im Unionsaal nit lang uf sich warte und nume wenigi hän sich die entgoh lo… Schiinbar isch si so verlockend gsi, dass die eint oder dr ander trotz allne guete Vorsätz frieh häizgoh, sich doch zu spoter Stund immer no dört vorgfunde het und s Tanzbei gschwunge het.

Zum Schluss isch es wie immer unerlässlich, allne Teilnähmer und Täilnähmerinne zu ihrer Läischtig z’gratuliere und grosse Respäkt z’bekunde für ihre Isatz! Es isch gar nit sälbstverständlich uf d Bühni zstoh – sigs elläi, zu zweit oder in dr Gruppe!

Wyterläse für d Rangliste:  (mehr …)


Offiziells 2016

Au in däm Joor sin zahlrychi Spalemer uff dr Bihni vom (neu in Grossbasel stattfindendende) Offizielle gstande. Und einigi Spalemer hän Plätz füre Medalliespiegel erreicht!

Bi de Junge hän dr Henrik Angehrn bi de Tamboure Einzel (Saalrang 14) und d’ Pfyffergruppe dr Finalyzug leider verpasst. Trotzdäm e super Lob an euch, es brucht vil Muet uf däre Bihni z stoh!

Bi de Alte Solo/Duo het d Spale 5 Teilnähmer-Päärli ins Renne gschickt. Vo däne hän sich bi dr Vorusscheidig am Donschdig drei ins Final trummlet resp. pfyffe und dört super Plätz erreicht: Florian Stähli und Fabian Staub (Schnooggekerzli) 9. Rang, Dominique Saladin und Dominic Plattner (Naarebaschi) 7. Rang. Dr Christian Walk het zämme mit em Patrick Meyer (Die gääle Daggel) dr hervorragendi 2. Platz erreicht.

Bi dr 2. platzierte gmischte Gruppe het dr Christian Walk vo dr Spale ebefalls sini Trummelschlegel mitgwirbelt.

D Pfyffergruppe vom Stamm het nach em ins Wasser gfallene Uftritt vom letschte Joor Vollgas gä und si hän sich d’ Silbermedallie in däre Kategorie gholt. E super Leistig vo dr Nicole, Sarah, Niggi, Flavio, Laurent und em Florian!

Bi de Alte Einzel Damboure hän zwei vo de drei Kandidate s Final erreicht. Dr Olivier Boog het sich bi dr Vorusscheidig uff e 23. Saalrang trummelt. Währends em Christian Walk nid bis ganz in die vordere Räng glängt het, isch dr Sascha Herzog uff e super 6. Rang vom Final cho.

Bi de Alte Pyffer Einzel sin rekordverdächtigi 6 Pfyffer vo dr Spale aträtte. D Konkurränz isch sehr gross gsy und so hän nur d Nicole Meyer-Lehner und dr Florian Stähli s Final erreicht. D Stephanie Hediger, Claudine Plattner, Dominique Saladin und d’ Ria Meyer hän dr Finalyzug leider verpasst. Dr Florian Stähli het sich dört uff dr 11. Rang könne pfyffe. D Nicole Meyer-Lehner het ihri Platzierig vom letschte Joor könne verbessere und landet uff em 2. Träppli vom Podest mit dr Silbermedallie füre hervorragende 2. Platz!

Härzlichi Gratulation an euch alli!


Offiziells 2015 – 1. Platz in dr Kategorie SoloDuo

Au das Joor sin zahlrychi Spalemer uff dr Bihni vom Offizielle gstande. Allne e härzligi Gratulation, ihr händ das super gmacht!

Bis ganzs uffs Podest uffe hets am Sascha Herzog und dr Katrin Minder glängt:
1. Platz in dr Kategorie Solo Duo. SENSATIONELL!

offiziells15_sieger_solo_duo

Die wytere Platzierige im Final sin ebefalls sehr guet:

Jungi:

Georg Angehrn (JG) 11. Rang bi de Pfyffer einzel

Pfyffergruppe JG mit dr Ria Meyer & Co (wild) hets uff e 3. Podestplatz gschafft.

Alti:

Nicole Meyer-Lehner: 7. Rang bi de Pfyffer einzeln

Sascha Herzog: 8. Rang bi de Tamboure einzel

Pfyffergruppe 2 vom Stamm mit dr Julia, Sandra, Ariane, Claudine, Jessica und dr Dominique sin im Final bis uff e 5. Platz cho

Daniel Plattner und Nicole Meyer-Lehner sin uff e 12. Rang bim SoloDuo cho

Wyteri Bilder und alli Rangliste findsch uff offiziells.ch