Spale-Clique

• Sujet: Dummy Sieche
• Vortrab: Dummy Sieche
• Requisit: Aktievernichtismaschine
• Latärne: S lychtend Eländ
• Pfyffer: Dummy Sieche
• Majoor: Dr oberdummy Siech
• Dambuure: Dummy Sieche

Wow dasch e wundebari Fasnacht gsi, s’ Wätter het entgege de Prognose e kleins Härz für d’ Fasnacht gha.. es isch denne au nit so schlimm gsi, dass wägem Räge dr Ändstraich nur kurz aber drfür heftig gsi isch..  mehr Bilder kasch in dr Spalegallery im intärne Berych aaluege…

Also im Herbscht het unser Sujet no G’Opfer Dummy gheisse.. s’ Gschäft oder besser gseit s’ Sujet isch immer no s’ glyche aber dr Name het gwägslet… wie das so in dr Wirtschaft üblich isch.. also nit verwirre lo.. mir sinn jetzte die Dummy Sieche und sage G’Opfer Dummy aber blybe immer no d’Spale die liebschti Glygge wo me sich vorstelle ka… (mehr …)

Dr Florian het si letschte Bummel in dr IG für uns Revue passiere lo.. merci:

Es isch Sunntig, dr 15. März 2009: Dr Bummel isch jedes Joohr ebbis Speziells! Noch de Drey Scheenschte Dääg, wenn dr ganzi Zauber ummen isch, alli Räppli  verschwunde sin und dr Alltag wieder aagfange het, isch d Fasnacht scho fascht wieder für e Joor verbi- aber zum Glück nur fascht! Denn an drey Sünntig derfsch nomol das herrliche Fasnachtsgfyhl erläbe, wenn die ganzi Stadt läbt und `s durch alli Gässli ruesst und pfyfft! Au das Joor isch dr Bummel für die Jungi Spale wieder ebbis ganz Bsunders gsi. Für e paar sogar dr erschti oder aber au dr letschti Bummel mit dr Junge Garde. Mir hän ys am viertel ab zääni am Bahnhof SBB troffe und sin zämme uf Laufe gfahre. Dert hän mir in dr warme Sunne kenne gässle und hän denn am Mittag e super feins Ässe becho, was jo au nid sälbstverständlich isch! ….. (mehr …)

Sujet2009: Em Säuli si Dood

Gäld elaige macht nit gliggligg – s muess eim au no gheere!

• Vortrab: hänn no e Stutz
  
• Reggwysyt: kasch ha fir e Stutz
• Binggis: hänn no e Stutz
• Lampe: dr Säulifriedhof;
• Pfyffer: hänn kai Stutz
• Majoor:isch die letschti Sparsau
• Dambuure: hänn kai Stutz

Als Junge hesches nit eifacher wie die Alte! Ganz egal was de in dr Freyzyyt wottsch mache, immer wird alles tyyrer. Ob Glaider, Sport, Kino oder Mc Donalds – de bruchsch jedes Joor mee Stutz! Mir hän ys gfroggt, was me eigentlig no fir EI Stutz bikunnt… und s Ergäbnis isch nit wirklig rosig gsi!

Wenn fir jedes Röggli oder jedi DVD scho muesch s Sparsäuli schlachte kunsch jo mit em Spare nie uf e griene Zwyyg! So kas nit wytergoo – entweder es git mee Sagggäld oder d Pryyse wärde ändlig emol fir die Junge apasst! Wie selle mir Junge irgendwenn emol e Fahrpriefig mache, wenn mir in dr Freyzyyt immer gschröpft wärde? Wie wänn mir uns e Velo kaufe, wenn me derfir e Joor lang miesst schaffe? Wär zaalt ys unseri Skiferie wenn niene mee Schielerpryyse gälte?

Es isch e Verzwickti Situation! E jeedes Weekend goots em Säuli an Graage! E jeedes Weekend isch em Säuli sy Dood… (mehr …)

S’ Hündli het yygschlage und alli marschiere mit hohe Absätz… di ainte göhn spöter und die andere sofort wieder go umzieh..   und die aintere ohni Drummle göhn an Schlusspfyff… wo das Johr wirklich e wunderschöns Intercliquespontiabschlussspektakel het könne entstoh – so viel Gänsehut ka me gar nit mitnäh wenn e Pauke und alli Clique veraint dr 10 Värs uuselön – e wunderschöns Drummeli 2009 isch das gsi (mehr …)

Intärns Bryysdrummlen und -pfyffe vo dr Junge Spale – 2009 unter em Sujet “Spalympics” isch wieder emol e hit gsi.. viele Dank all de Mitwirkende und vor allem em Organisationsteam mit em Obervärslibrünzler.

Danggerscheen!

S internationale spalympische Comité danggt allne Konkurränte, Zueschauer, Hälfer und Mitwirkende fir dr sensationelli Oobe im KuSpo!
Merci allne Konkurränte vo de Binggis und de Junge, wo elaige oder inere Grubbe uf d Bihni gstande sin. Merci allne Konkurränte vom Stamm, wo just for fun uf d Bihni gstande sin – quasi als Training firs Offizielle.
Merci allne Zueschauer wo im Saal uf dr Glimmstängel verzichtet und nach jedem Byytrag klatscht hän! Chapeau! Merci allne Spalemer and friends wo dr Saal bevölkeret hän.
Merci allne Hälfer wo vom Morge am 10i bis z’ Nacht am 2 uf de Wegge gstande sin. Merci allne extärne Hilfskräft wo Frondienscht gleischtet hän, damit dä Aloss het kenne iber d Bihni go!
Merci dr Alte Garde, em Stamm, de Junge, de Ermitage-Schränzer, em spitzige Ryssblei, de Pfyffer- und Dambouregrubbene, em Mike Shiva und allne andere Mitwirkende uf dr Bihni.

Es goht wyter… 2010 – glychi Zyt, glyche Ort