Spale-Clique

    syt 1927 uff dr Gass

Spale am Offizielle 2023

Gschriebe vo dr Stephi

Wie vyyl anderi Ahläss, het in dämm Joor au s Offizielle Brysdrummle und -pfyffe wieder im gwohnte Rahme könne stattfinde. S isch allerdings s erscht moll gsi, dass alli Vorusscheidige unter eim Dach stattgfunde hänn. So het me d Möglichkeit kha, alli Spale-Gspähnli usem Publikum könne z’unterstütze (wenn me denn im richitige Saal gsässe isch…).

Ahgfange hets am Donnschtig im Einzel bi de Junge, wo dr Gian-Marco Felix gstartet isch und sich mit dr Faschtewäje ufe tolle 17. Rang drummlet het. Är isch denn kurz druffabe au no mit Kollege vo de Glunggi und vom CCB mitem glyche Marsch in dr Grubbekonkurränz uf dr Bühni gstande uns sie hänn leider wäge eim Platz d Finalqualifikation verpasst. E super Leischtig, au wenn d Entüschig do gsi isch.

Am spötere Oobe isch s denn au für dr Stamm losgange: Dr Florian Stähli het sich miteme wunderbare Nunnefirzli in Final pfyffe! Super!! Au dr Benjamin Stähli isch im Einzel ahträtte und het sich mitem Ueli ufe tolle 19. Platz im Saal drummlet.

Dr Florian isch denn no mit dr Nicole Meyer, Sarah Ziegler, Jill Hoffmann, Michelle Berns und em Flavio Magliozzi in dr Grubbe ahträtte und au do hänn sie s Nunnefirzli zum Beschte gäh. S Resultat: ebefalls d Finalqualifikation. D Freud bi allne isch riesig gsi!!

Am Fritig isches denn wyter gange mit vier SoloDuo-Päärli mit Spale-Beteiligung: Dr Olivier Boog het zämme mitem Pascal Nippel vo dr Sans Gêne dr Ueli vordreit und dr 14. Rang erreicht. Im glyche Saal ufem 13. Rang sinn dr Florian Hediger und dr Pascal Sarti mit de Alte gsi. Im andere Saal, aber ebefalls ufe 14. Platz, hänn sich d Stephanie Hediger und dr Patrick Bucherer mitem Spaledöörli pfyffe und drummlet. Wäge eim Platz hänn dr Florian und dr Benjamin Stähli als 7. mitem Hofnaar dr Final leider ganz knapp verpasst.  

Zur späten Stunde isch denn au no die Gmischti Grubbe gstartet mit dr Sandra Rudolf, Céline Saladin, Dominique Saladin, Stephanie Hediger, Alessandro Venzin, Pascal Sarti, Patrick Bucherer, Olivier Boog und Andrin Leimgruber. Die nüün schygge Saftschubbse sinn mitem Whisky ufem 11. Platz glandet. D Stimmig an Board isch vor und nachem Uftritt wie immer super gsi!

Am Samschtig Morge frieh sinn denn die jüngschte Konkurräntinne und Konkuränte an dr Reihe gsi, wo alli grad diräggt im Final gsi sinn. Die neui Binggis-Kategorie, wos erscht zum 2. Mol gäh het, isch für dr Nochwuggs e grossartigi Sach. S isch e riese Freud, dass sich grad drey Spale Binggis Pfyfferinne und Pfyffer uff die Bühni getraut hänn. Alli drei hänn dr Spitzbueb vorpfyffe und sie hänn das eifach nur grossartig gmacht! D Anouk Meyer (10. Platz), dr Erik Beer (11. Platz) und d Julia Brüll (16. Platz) könne unglaublich stolz uf sich sy. An däre Stell söll no betont wärde, dass d Julia erscht letscht Joor nach dr Fasnacht het afo pfyffe!!! Respäggt! 😊

Zoobe, im Final vo de Alte, hets denn nomoll gheisse Duume drugge. Dr Florian het e wunderschöne Hofnaar zum Beschte gäh und sich sehr über dr tolli 10. Platz gfreut. D Pfyffergrubbe het e superfätzigs Fritzli pfyffe und so dr 6. Platz erreicht. Vor allem für d Michelle isches e bsundere Momänt gsi, het sie doch an ihrer erschte Teilnahm könne e Bächer mit heime näh! Gratulation zu däm Ihstand!

Ei moll meh isches e supertolle Ahlass gsi und s het Freud gmacht, dass me sich gegesitig, Jung und Alt, unterstützt, flissig d Dume druggt und mitgfieberet het. Härzliggi Gratulation an alli Teilnähmerinne und Teilnähmer und e grosses Dangge an alli wo sinn ko unterstütze.

Die vollständige Rangliste und witeri Föteli findsch uf https://www.offiziells.ch/


S Offizielle 2019

Vom 31.01. bis 02.02.2019 hänn sich wieder vyyl muetigi Fasnächtler am Offizielle gmässe. Und zmitzt drinn sinn au e Huffe Spalemer und Spalemerinne gsi, wo ihri Märsch zum beschte gäh hänn.

Ahgfange hets am Donnschtig mit dr Nerea Petretta, wo bi de Junge Pfyffer Einzel dr tolli 11. Platz im Saal erreicht het. Für sie ischs denn grad wyter gange mit dr Pfyffergrubbe. Dört isch sie zämme mit dr Lena Schär, Meret Burdet, Hannah Stark, Rahel Aebi und dr Natascha Stalder uf dr Bühni gstande. Mit Erfolg, denn sie hänn sich könne über dr Finalihzug freue. Und das bi dr erschte Teilnahm! Grossartig!

Bitz spöter an däm Oobe hets no meh freudigi Resultat vo de Kategorie bi de Alte gäh. D Stephanie Hediger und dr Florian Stähli hänn sich im Einzel beidi in Final pfyffe. Juhuuuii!!!

Bi de Pfyffergrubbe sinn au zwei Spale-Grubbe am Start gsi. Die «Ältere» mit dr Nicole Meyer, Jill Hoffmann, Sarah Ziegler, em Flavio Magliozzi, Florian Stähli und Laurent Burdet hänn ufem undaggbare 4. Platz dr Final leider um ei Platz verpasst.

Im andere Saal sinn die «Jüngere» gstartet. D Dominique Saladin, Florence Saner, Céline Saladin, Sandra Rudolf, Stephanie Hediger und dr Pascal Sarti hänns sälber kuum könne glaube, wo ihri Startnummere als Finalteilnähmer ufgrueffe worde isch. Entsprächend gross isch d Freud und s Gschrei gsi.

(mehr …)

Glygge Grimpeli 2018

Au in däm Joor het s Glygge Grimpeli wieder uff dr Schützematte stattgfunde. Leider gits daas moll kei so erfreulichi Brichterstattig wie im letschte Joor.

In dr Kategorie Gmischti isch s Team „Schölölölö-Spale“ wieder ahträtte und hätt im beschte Fall welle dr Titel verteidige. Het s Team letscht Joor no könne als Underdog überzüge und überrasche, ischs daas Joor mitem Druck als Titelverteidiger nit zschlaag kho. Das isch sicher drah gläge, dass grad drei wichtigi SpielerInne verletzigsbedingt gfählt hänn.
S erschte Spiel het me zwar no mit 1:0 könne gwinne, im zweite hets denn aber e kleini Klatsche gäh. Grad mit 5:1 ischs Spiel ufgrund vonere miserable Abwehrleischtig vrlore gange. Au dr starggi Gooli het do nüt meh könne richte. Im dritte Spiel hets lang nacheme 2:2 Unentschiide usgseh, doch kurz vor Schluss het dr Gegner doch no s 3:2 gmacht. Somit isch me mit 3 Pünggt ufem 3. Platz glandet. Wyter ko sinn jewils die zwei erschte Plätz vo jedere Grubbe und die zwei beschte Drittplatzierte. Also het me miesse bis am Schluss warte und zittere obs nit villicht doch no längt. S isch denn saumässig knapp gsi. E andri Mannschaft het glych vyyl Pünggt kha und au s glyyche Goolverhältnis, sie hänn aber meh Gool gschosse und hänn sich somit für d Zwüscherundi qualifiziert. Somit ischs Grimpeli für d Schölölölös scho am Samschtig vrbi gsi…
Wirkligg druurig isch aber niemerts gsi und dr Oobe isch bim gmieltiche Grilliere im Garte usklunge worde.

Au in dr Kateorie Schutter het d Spale e Mannschaft könne stelle. Die Frèsche-Spale-Kickers mit doppleter Unterstützig us dr JG sinn ebefalls erfolgriich miteme 3:1-Sieg ins Turnier gstartet. Nochärt hänn sie leider au zwei Niederlage müesse ihstegge, bevors denn im vierte und letschte Spiel e einzigs Gool-Festival gäh het. D Frèsch hänn dr Gegner grad mi 12:1 vom Fäld gfäggt. Leider hets trotzdäm nüt gnützt und au d Schutter sinn scho am Samschtig usgschiede. Ufem 4. Platz hänn sie d Qualifikation knapp verpasst. Aber wie bi dr Gmischte isch au bi de Schutter d Enttüschig schnäll wieder verfloge.

Immerhin wird s au näggscht Joor wieder e Glygge Grimpeli gäh, wo hoffentlich au die Junge Spalemer ihri Fuessball-Künscht wieder könne unter Bewiis stelle…

(mehr …)


S Offizielle 2018

Will d Fasnacht so frieh isch, het natürlich au s Offizielle wieder sehr frieh im Jänner stattgfunde. Vom 11.-13.01 hänn sich die muetige Fasnächtler uf dr Bühni mitenander gmässe. Natürlich isch au d Spale wieder verträtte gsi.

Bi de Junge im Einzel hets dr Nerea Petretta vo de Binggis miteme wunderschöne Arabi uff dr undanggbari 7. Platz in dr Vorusscheidig glängt. Sie het somit dr Final bi ihrer erschte Teilnahm nur um ei Platz verbasst. Das isch e grossartigi Leischtig!!

Bi de Alte isch d Dominique Saladin in dämm Joor die einzig gsi, wo ellei uff d Bühni gstande isch. Fürs Final hets leidr nit ganz glänggt, abr au dr 9. Rang isch e super Resultat.

S isch e bitz ungwöhnt gsi, dass am Donnschtig nachem Einzel denn d Vorusscheidige vo de Grubbe stattgfunde hänn. Bi de Alte Tambuure Gruppe sinn dr Liam Berns und dr Nicola Langlotz vo dr JG zämme miteme Extärne ahträtte und hänn sich ufe 12. Blatz drummlet.

Bi de Alte Pfyffergrubbe isch d Spale zwei moll vrdrätte gsi. Dr „jüngere“ Grubbe mitem Pascal Sarti, dr Dominique Saladin, Florence Saner, Sandra Rudolf, Céline Saladin und Stephanie Hediger hets wie scho letscht Joor wäge eim Blatz nit ins Final glänggt und sie hänn sich miesse mitem 4. Blatz zfriide gäh. Besser ischs dr „ältere“ Grubbe gloffe. D Nicole Meyer-Lehner, Sarah Ziegler, dr Florian Stähli, Laurent Burdet, Niggi Zittel und Flavio Magliozzi hänn sich könne fürs Final qualifiziere.

Am Fritig isch denn zerscht d SoloDuo Konkurränz ufem Plan gstande. Au dört hets vyyli tolli Resultat gäh, au wenns dasjoor leider niemerem für ins Final glänggt het.

Dr Florian Stähli und dr Daniel Heutschi vo de JB Santihans hänn sich ufe 17 Blatz pfyffe und drummlet. Dr Olivier Boog isch zämme mitem Roman Zehnder vo de Muggedätscher ahdrätte und het dr 14. Blatz gsicheret. Mitem Christian Walk und em Patrick Meyer vo de Gääle Daggel isch e witers Duo mit Spalebeteiligung uff dr Bühni gstande. Für sie hets dr 12. Blatz gäh. D Dominique Saladin und dr Dominic Plattner vo de Naarebaschi hänn mitem 8. Blatz s Final nur knapp vrbasst, will die beschte 6 hänn am Samschtig nomoll dörfe ufdrätte. Ebefalls dr 8. Blatz im andere Saal hets fürs einzige komplette Spale-Duo gäh. Dr Florian Hediger und dr Pascal Sarti hänn nit nur dr Goschdympriis gwunne (wenns ein gäh hätt), sondern hänn au pfyfferisch und drummerlisch könne überzüüge. D Stephanie Hediger het zämme mitem Luca Müller vo de Basler Rolli s Final nur um ei Blatz verpasst und hänn sich könne über dr 7. Rang freue.

Zum Schluss isch no die „jüngeri“ Pfyffergrubbe zämme mit em Florian Hediger, Sascha Herzog und em Manuel Martinelli (Männli) in dr Gmischte Konkurränz ahdrätte. Bi dr Finalbekanntgoob ischs denn richtig luut worde, wo tatsächlich ihri Startnummere ufgruefe worde isch. Au sie hänn am Samschtig nomoll dörfe „ein uuse loh“.

Am Samschtig isches denn sowyt gsi: D Pfyffergrubbe het miteme schöne Fritzli s Podescht knapp vrbasst und dr 4. Platz erreicht.

Die Gmischti het sich über dr 5. Blatz könne freue und das isch grossartig gsi. D Freud isch bsunders bim Männli und dr Florence gross gsi, will sie ihre allererschte Zinnbächer hänn dörfe mit heim näh!

Wieder ei moll meh ischs e ufregends und tolls Wucheänd gsi. An dere Stell härzliggi Gratulation allne wo mitgmacht hänn und vyyle Dangg allne treue Fäns, wo d Teilnähmer immer grossartig unterstütze.

Mir hoffe, dass es au näggscht Joor wieder einiges zum Juble und Schreie wird gäh und freue uns scho jetzt uf zahlrichi Spalemer uf dr Offizielle Bühni im 2019.

(Stephi)


Spale am Offizielle 2017

Au Disjohr het einigi Spalemer und Spalemerinne wieder dr Ehrgiz packt und si hän am Offzielle mitgmacht, wo vom Do, 26. bis am Sa, 28. Januar stattgfunde het.

Am Donnschtig het als Erschts d Vorusscheidig im Einzel stattgfunde. D Konkurränz isch wie immer gross gsi. Das het aber d Nicole Meyer-Lehner nit gstört und si het sich souverän für dr Final am Samschtig qualifiziert. Für dr Florian Stähli und dr Chrstian Walk hets leider nit ganz glängt.
Au im Solo Duo isch d Spale verträtte gsi. D Duos Dominique Saladin und Dominic Plattner (Naarabaschi) sowie Christian Walk und Patrick Meyer (Die Gääle Daggel) sin glaub immer no beflüglet gsi vo ihrne Erfolg letschti Johr und hän sich ihres Finalticket gsicheret.

© Bilder: Beat Schwald, fasnacht.ch  

Am Fritig hän denn d Gruppene miesse ind Hoose stiige. Bsunders uusez’hebe sin do die Jungi Dambouregruppe, wo sich uf e guete 6. Rang im Saal drummlet het. Es isch immer schön z’gseh, wenn dr Noochwuggs dr Muet und d Motivation ufbringt sich dr grosse Uuseforderig z’stelle und am Offizielle mitz’mache.
Bi de Alte hets denn ebeso die eint oder ander Amäldig gäh und zwar sin das äi Dambouregruppe und zwei Pfyffergruppene gsi.
Bi de Pfyffer isch dä Fritigobe leider vo knappe Entschäidige prägt gsi. Au e sälbständige Sombrero uf dr Dominique ihrem Kopf bi dr einte Pfyffergruppe und e wunderschön vordreite Fischmärt vo dr andere Pfyffergruppe, wo sich ämel im Publikum alli einig gsi si, dass dä finalwürdig gsi isch, hän leider nit ganz glängt über e 4. Rang im Saal uusez’ko. (Die erschte drei Gruppe in dr Vorusschäidig qualifiziere sich für dr Final.)

Au bi dr gmischte Konkurränz isch denn s Niveau wie jedes Johr wieder hoch gsi. D Spalegruppe het denn nomoll alles gäh und es het schlussändlich dr gueti 8. Rang uusegluegt.

Nachdäm d Spale in de letschte Johr mit vielne Finalischte vom Erfolg verwöhnt gsi isch, isch disjohr s nötige Quäntli Glück leider nit immer uf dr Spalesite gstande. Trotzdäm hän sich am Samschtig vieli Spalemer und Spalemerinne im Volkshuus igfunde zum sich de Piccolo- und Drummelkläng vo dr Nicole Meyer-Lehner, dr Dominique Saladin, em Christian Walk und notürlich au allne andere Finalischte hiz’gäh.
Nach dr heissersehnte Rankgverkündigung het denn d Party im Unionsaal nit lang uf sich warte und nume wenigi hän sich die entgoh lo… Schiinbar isch si so verlockend gsi, dass die eint oder dr ander trotz allne guete Vorsätz frieh häizgoh, sich doch zu spoter Stund immer no dört vorgfunde het und s Tanzbei gschwunge het.

Zum Schluss isch es wie immer unerlässlich, allne Teilnähmer und Täilnähmerinne zu ihrer Läischtig z’gratuliere und grosse Respäkt z’bekunde für ihre Isatz! Es isch gar nit sälbstverständlich uf d Bühni zstoh – sigs elläi, zu zweit oder in dr Gruppe!

Wyterläse für d Rangliste:  (mehr …)