Gschmiert wird uff dr ganze Wält,
es goot um Macht, um seer vyyl Gäld,
doch au bi uns in dr Regioon,
griegt männge no e ‚Extra-Loon‘.
Unverstyyrt und Baar uff d Flosse,
soo wird dr Bulver-Zuestupf gnosse,
egaal ob Doggter-Thittel oder Bolytigg,
d Schwyz als Banane-Rebubligg
D BVB isch gaar kai Lämmli,
die schmiere nämmli nit nur d Drämmli.
Dr Wessels schmiirt, es isch zem gruuse,
iber d Douane bis wyt ins Alsace uuse.
Dr Blatter schwätzt si FIFA rain,
laider verstoot dr Seppli kain.
Nit suuber isch sy Dialäggt,
und was äär – bigott – bezwäggt.
Waisch du, dass daas gege s Gsetz isch,
und du esoo sämtligi Regle verletzisch?
De gheersch nit uff die Forbes-Thabälle,
sondern bi Wasser und Broot in e Zälle!
Und doch sait jeede in syym Beryych,
es isch mer glyych, wel i schmier glyych!

(mehr …)

Es het sich emoll e Mensch gfrogt: wie wärde sich unseri kommende Generatione verpfläge? Uff dr Suechi nochen ere Antwort het är uusegfunde, ass e grillierte Heugumper oder e saftige Määlwurm gar nid sone schlächte Gschmack hänn wie me kennt meine.

Was in anderne Länder sit Joor und Daag zur Normalität gheert isch bi uns fyr die Meischte non e Tabu:
Dä wo no nie e Heugumper oder e fein Wüürmli probiert het sait: Yych doch nid! Do ka mi kein drzue bringe.
Und dä wo scho moll son e flambierte Heugumper gha het meint: Wär das probiert, dä sait zum Schluss – e jedes Bainli isch e Gnuss.

(mehr …)

Will d Fasnacht so frieh isch, het natürlich au s Offizielle wieder sehr frieh im Jänner stattgfunde. Vom 11.-13.01 hänn sich die muetige Fasnächtler uf dr Bühni mitenander gmässe. Natürlich isch au d Spale wieder verträtte gsi.

Bi de Junge im Einzel hets dr Nerea Petretta vo de Binggis miteme wunderschöne Arabi uff dr undanggbari 7. Platz in dr Vorusscheidig glängt. Sie het somit dr Final bi ihrer erschte Teilnahm nur um ei Platz verbasst. Das isch e grossartigi Leischtig!!

Bi de Alte isch d Dominique Saladin in dämm Joor die einzig gsi, wo ellei uff d Bühni gstande isch. Fürs Final hets leidr nit ganz glänggt, abr au dr 9. Rang isch e super Resultat.

S isch e bitz ungwöhnt gsi, dass am Donnschtig nachem Einzel denn d Vorusscheidige vo de Grubbe stattgfunde hänn. Bi de Alte Tambuure Gruppe sinn dr Liam Berns und dr Nicola Langlotz vo dr JG zämme miteme Extärne ahträtte und hänn sich ufe 12. Blatz drummlet.

Bi de Alte Pfyffergrubbe isch d Spale zwei moll vrdrätte gsi. Dr „jüngere“ Grubbe mitem Pascal Sarti, dr Dominique Saladin, Florence Saner, Sandra Rudolf, Céline Saladin und Stephanie Hediger hets wie scho letscht Joor wäge eim Blatz nit ins Final glänggt und sie hänn sich miesse mitem 4. Blatz zfriide gäh. Besser ischs dr „ältere“ Grubbe gloffe. D Nicole Meyer-Lehner, Sarah Ziegler, dr Florian Stähli, Laurent Burdet, Niggi Zittel und Flavio Magliozzi hänn sich könne fürs Final qualifiziere.

Am Fritig isch denn zerscht d SoloDuo Konkurränz ufem Plan gstande. Au dört hets vyyli tolli Resultat gäh, au wenns dasjoor leider niemerem für ins Final glänggt het.

Dr Florian Stähli und dr Daniel Heutschi vo de JB Santihans hänn sich ufe 17 Blatz pfyffe und drummlet. Dr Olivier Boog isch zämme mitem Roman Zehnder vo de Muggedätscher ahdrätte und het dr 14. Blatz gsicheret. Mitem Christian Walk und em Patrick Meyer vo de Gääle Daggel isch e witers Duo mit Spalebeteiligung uff dr Bühni gstande. Für sie hets dr 12. Blatz gäh. D Dominique Saladin und dr Dominic Plattner vo de Naarebaschi hänn mitem 8. Blatz s Final nur knapp vrbasst, will die beschte 6 hänn am Samschtig nomoll dörfe ufdrätte. Ebefalls dr 8. Blatz im andere Saal hets fürs einzige komplette Spale-Duo gäh. Dr Florian Hediger und dr Pascal Sarti hänn nit nur dr Goschdympriis gwunne (wenns ein gäh hätt), sondern hänn au pfyfferisch und drummerlisch könne überzüüge. D Stephanie Hediger het zämme mitem Luca Müller vo de Basler Rolli s Final nur um ei Blatz verpasst und hänn sich könne über dr 7. Rang freue.

Zum Schluss isch no die „jüngeri“ Pfyffergrubbe zämme mit em Florian Hediger, Sascha Herzog und em Manuel Martinelli (Männli) in dr Gmischte Konkurränz ahdrätte. Bi dr Finalbekanntgoob ischs denn richtig luut worde, wo tatsächlich ihri Startnummere ufgruefe worde isch. Au sie hänn am Samschtig nomoll dörfe „ein uuse loh“.

Am Samschtig isches denn sowyt gsi: D Pfyffergrubbe het miteme schöne Fritzli s Podescht knapp vrbasst und dr 4. Platz erreicht.

Die Gmischti het sich über dr 5. Blatz könne freue und das isch grossartig gsi. D Freud isch bsunders bim Männli und dr Florence gross gsi, will sie ihre allererschte Zinnbächer hänn dörfe mit heim näh!

Wieder ei moll meh ischs e ufregends und tolls Wucheänd gsi. An dere Stell härzliggi Gratulation allne wo mitgmacht hänn und vyyle Dangg allne treue Fäns, wo d Teilnähmer immer grossartig unterstütze.

Mir hoffe, dass es au näggscht Joor wieder einiges zum Juble und Schreie wird gäh und freue uns scho jetzt uf zahlrichi Spalemer uf dr Offizielle Bühni im 2019.

(Stephi)

Sit 9 Johr findet d Swiss Junior Drum Show statt, für die aktuelli Usgoob isch au d Spale JG drbi gsi. Nach eme Iebigssamstig am 5.11. und einiges an Organisation hinter dr Kulisse isch denn am Samstig, 18.11.2017 ändlich dr grossi Tag cho. Ufgrund vom Stadtcasino-Umbau het d Show im Musical Theater stattgfunde. Es het einigi stuunendi Kinder-Gsichter kha, wo me zum erste Mol vo dr grosse Bühni in no grössere Saal gluegt het. D Ussag vom Urs Gehrig, em Organisator, dass über 500 Zuschauer erwartet wärde, het denn au nid wirgligg zum Abbau vo dr Nervosität bi de 43 Kinder und Jugendliche vo dr Spale JG und Binggis bitreit. Nach em Garderobebezug und feine zMittag ischs denn zur Stellprob gange. D Spale het dr Arabi und s Spaledöörli sowie als Zückerli Basel Nord (JG Tamboure) im Programm kha. Nach em freiwillige (und je nach Blickwinkel asträngende) Nomidagsprogram im Keller am Heuberg het me sich denn vor Showbeginn wieder im „Backstage“ vom Musical Theater troffe. No e letschts mol Probe vorem grosse Uftritt uf dr Passarelle und scho isch mr voller Vorfreud und Lampefieber hinter dr Bühni am warte. Denn isch s ändlich sowit gsi und d Spale JG het könne zeige, für was sie solang giebt het. Au di neui JG Standarte het nach dr Übergab am vorletschte Samstig ihre erste Uftritt kha. Im Aschluss het wer no möge het chönne ins Publikum ihnesitze und denn zur Schlussnummere nomol (mitem Wettstaimarsch) uf d Bühni stoh. Nachdäm isch denn dr langi Tag zume Änd cho, d Kinder und Jugendliche sin hei und d Begleiter hän dr Tag bim offerierte Apéro no lo usklinge.

– dr erschöpfti Assistänt vom Chef

(mehr …)

Nach em Usfall vo letscht Joor het me sich am Weekend vom 17./18. Juni 2017 wieder uf dr Schützematte fürs Glyggegrümpeli troffe. D Spale het in allne 4 Kategorie je ei Mannschaft gstellt und gwinnt insgesamt 3 Medallie. In dr Kategorie „Schutter“ hän sich d „Allez les Frèsch und Co!“ leider dank ungünstigem Goalverhältnis nid für die nächsti Rundi könne qualifiziere und an die letztjährige Erfolg aknüpfe. D Binggis-Mannschaft „Krayejoggelis“ het am Samstig alli 3 Spiel gwunne und het erst im Halbfinal am Sunntig die erst Niederlag erlitte. Nach ere kurze Resignationsphase het me denn aber s „Kleine Final“ souverän für sich entschide und so die ersti Spale-Medallie an däm Tag könne hole. D JG Mannschaft „Krayejoggis“, wo in dr Gruppe-Phase am Samstig uf dr zweiti Platz cho isch, het am Sunntig die erste 3 Spiel und s Halbfinal für sich entschide, im Final hets denn aber leider nit ganz für dr Sieg glängt. D „Schölölö-Spale“, wo am Samstig mit fast Minimalbsetzig aträte sin hän sich am Tagesändi ufem 4. Rang vo dr Tabälle gfunde. Ganz anders am Sunntig: Mit mehr Spieler het me Spiel um Spiel könne gwinne. Im Halbfinal isch d Entscheidig im Penaltyschiesse gfalle, au dört isch me als Sieger drus hervorgange. Durch e absolut verdiente 2:1 Finalsieg isch denn s Undänkbare Tatsach worde und d „Schölölö-Spale“ hän dr Turniersieg in dr Kategorie „Gmischti“ gholt!!! Härzliggi Gratualtion allne, wo am Wuchenänd bi däre Hitz ufem Rase mitgschutet hän!

Bilder und mehr:

(mehr …)

Mit eme lachende Gsicht hoch über de rund hundert Köpf isch dr Spale Stamm Zug an dr Fasnacht 2017 durch d Stadt gloffe und het drmit d Uffmerggsamkeit vo noch und färn uff sich zoge. S Wätter isch alles in allem eher grau und nass gsy, insbesondere am Mäntig isch me in de Pause tröchnet und denn aber püngtligg zum Ablaufe widr nass worde. Aber d Fasnacht isch jo nur eimol im Joor. D Lüt am Strooserand hets Wätter uff jede Fall nid gstört und es sin flyssig Fotis mit unserem Zug gmacht worde und me het bi Gross und Glai villi grossi Auge gseh.

Bilder und no meh findsch miteme Klick:

(mehr …)

Är bewegt die ganzi Stadt und s ganze Land. Är repräsentiert unseri Stadt uff dr grosse Bihni vom Wältfuessball und drait unsere Namme in d Wält uuse. Doch so einigi Fuessballer vo Wältformat hänn unsere FC Basel als Sprungbrätt in die grosse Ligene vom Fuessball kenne nutze, und nid wenigi kemme wieder zrugg, wenn sie ihri Zyt gha hänn. Ob de jetzt FCB-Fan bisch oder findsch, dr Fuessball isch doch nyt anders als e korrupts Spiel fyr die Riiche, de kasch nid lyygne, as dr FCB Grosses gmacht het fyr unseri Stadt und fyr unseri Liga. Uff dr Jagd noch em 2. Stäärn stoht em FCB momentan nid meh viel im Wäg. Und unseri Junge wärde d Mensche am Strosserand an dr Fasnacht mitnäh und villicht mit em Baslermarsch s FCB-Lied uss ihrne Kehle uusekitzle.

(mehr …)

Kum doch zer Spale: Yyschrybige

Für d Yschrybige kunsch an eim vo de 3 Samstige (11., 18. und 25. Meerz) nach dr Fasnacht zwüsche 14.00 und 16.00 am Nomidag in dr Spalekäller. Dört beantworte mir dir gärn jedi Froog rund ums Iebe und d Spale und du kasch di bi uns amälde. Wyteri Infos über unseri Junge inkl. de Events unterem Joor findsch in unserem Spalebiechli oder uf dr „Kum doch zer Spale“ – Sytte.

Au dr Vortrab vom Stamm suecht Nochwuggs, lueg doch emol do.

Am dasjährige Drummeli tritt d Spale Clique mit em Stück „Spale meets Cantina Band“ uff. Ursprünglich komponiert worde isches vom John Williams für dr Film Star Wars IV (usecho 1977). Arrangiert für Piccolo hets dr Michael Künstle, dr Drummeltäxt stammt vom Daniel Plattner. S ‚Setting‘ vo dr Spale ihrem Bühneuftritt isch in de goldene 20er Joor agordnet. Und bi genauerem aneluege entdeckt me au d Referänz zum Gründigsjoor vo dr Spale: 1927. Ganz eso wie d‘ Fasnacht e farbigs Durenand isch, so präsentiert sich jo au d Wält vom Star Wars-Filmimperium.

Nit nur d Drummelikommision het bim Kreiere vom Uftritt e super Arbeit gleistet, au dank em überus grosse Elan und Engagement vo de Instruktorinne und Instruktore, wo vil Energie in s Projäkt „Drummeli ’17“ investiert hän,  kunnt das aspruchsvolle Stück uf dr Bühni so guet zur Gältig.

Bilder: © 2017 aluarts (Raphael Alù)

Fürs Video und Kritike klicksch do: (mehr …)

Au Disjohr het einigi Spalemer und Spalemerinne wieder dr Ehrgiz packt und si hän am Offzielle mitgmacht, wo vom Do, 26. bis am Sa, 28. Januar stattgfunde het.

Am Donnschtig het als Erschts d Vorusscheidig im Einzel stattgfunde. D Konkurränz isch wie immer gross gsi. Das het aber d Nicole Meyer-Lehner nit gstört und si het sich souverän für dr Final am Samschtig qualifiziert. Für dr Florian Stähli und dr Chrstian Walk hets leider nit ganz glängt.
Au im Solo Duo isch d Spale verträtte gsi. D Duos Dominique Saladin und Dominic Plattner (Naarabaschi) sowie Christian Walk und Patrick Meyer (Die Gääle Daggel) sin glaub immer no beflüglet gsi vo ihrne Erfolg letschti Johr und hän sich ihres Finalticket gsicheret.

Patrick Meyer und Christian Walk (SoloDuo)

Nicole Meyer-Lehner

Dominique Saladin und Dominic Plattner

© Bilder: Beat Schwald, fasnacht.ch  

Am Fritig hän denn d Gruppene miesse ind Hoose stiige. Bsunders uusez’hebe sin do die Jungi Dambouregruppe, wo sich uf e guete 6. Rang im Saal drummlet het. Es isch immer schön z’gseh, wenn dr Noochwuggs dr Muet und d Motivation ufbringt sich dr grosse Uuseforderig z’stelle und am Offizielle mitz’mache.
Bi de Alte hets denn ebeso die eint oder ander Amäldig gäh und zwar sin das äi Dambouregruppe und zwei Pfyffergruppene gsi.
Bi de Pfyffer isch dä Fritigobe leider vo knappe Entschäidige prägt gsi. Au e sälbständige Sombrero uf dr Dominique ihrem Kopf bi dr einte Pfyffergruppe und e wunderschön vordreite Fischmärt vo dr andere Pfyffergruppe, wo sich ämel im Publikum alli einig gsi si, dass dä finalwürdig gsi isch, hän leider nit ganz glängt über e 4. Rang im Saal uusez’ko. (Die erschte drei Gruppe in dr Vorusschäidig qualifiziere sich für dr Final.)

Au bi dr gmischte Konkurränz isch denn s Niveau wie jedes Johr wieder hoch gsi. D Spalegruppe het denn nomoll alles gäh und es het schlussändlich dr gueti 8. Rang uusegluegt.

Nachdäm d Spale in de letschte Johr mit vielne Finalischte vom Erfolg verwöhnt gsi isch, isch disjohr s nötige Quäntli Glück leider nit immer uf dr Spalesite gstande. Trotzdäm hän sich am Samschtig vieli Spalemer und Spalemerinne im Volkshuus igfunde zum sich de Piccolo- und Drummelkläng vo dr Nicole Meyer-Lehner, dr Dominique Saladin, em Christian Walk und notürlich au allne andere Finalischte hiz’gäh.
Nach dr heissersehnte Rankgverkündigung het denn d Party im Unionsaal nit lang uf sich warte und nume wenigi hän sich die entgoh lo… Schiinbar isch si so verlockend gsi, dass die eint oder dr ander trotz allne guete Vorsätz frieh häizgoh, sich doch zu spoter Stund immer no dört vorgfunde het und s Tanzbei gschwunge het.

Zum Schluss isch es wie immer unerlässlich, allne Teilnähmer und Täilnähmerinne zu ihrer Läischtig z’gratuliere und grosse Respäkt z’bekunde für ihre Isatz! Es isch gar nit sälbstverständlich uf d Bühni zstoh – sigs elläi, zu zweit oder in dr Gruppe!

Wyterläse für d Rangliste:  (mehr …)