Stamm: Vorstandssitzig
Stamm: um 20:30 GV Spale-Clique 1927
Stamm: Charivari-Yebigsweekend
Stamm: Charivari-Yebigsweekend
Stamm: Charivari-Yebigsweekend
Stamm: Charivari-Yebigsweekend
Kum doch zer Spale
Spale Keller
Passiv Mitgliedschaft
Instruktionsblog
Repertoire zem Loose
Intärni Berych
… oder s Fasnachtsfieber stygt! Dasch sicher bi jeedem Fasnächtler eso,
aber wenn foots denn aa aim tschuudere?
Quelle: Us em Krayejoggi Nr. 158 | Fasnachts-Ussgoob 2006
Wenn me d Blaggedde ka ans Revers hänge oder wenn me an die erscht Marschiebig goot oder wenn me d Eellimpe am Vogel Gryff gheert d Feschtspiil zerleege? S isch ebbe verschiide und doch hett e jeede sy ganz
bestimmti Vorfasnachtserinnerig. Im spezielle wenn me grad nonem Baum verruume die grooss Schissle firehoolt und mit Räppli fillt und zmitts in d
Stuube stellt oder wenn me kuum ka erwarte jeede Daag e Faschtewajie und Fasnachtskiechli zmampfe …
Im Stamm bruuchsch bstimmti Vorfraid-Aaraiz, wie Drummeli (aggtyv oder passyv), Pfyfferli-Biljee bstelle oder Spalungge schmigge, um in d Stimmig zko. Doch wie gsehts bi unserne Jungen us? Mir hänn zwai Gnäggis gfroggt, was fir si Vorfasnacht isch – baidi hänn e bsunderi Fasnacht vor sich … (mehr …)
Quelle: Us em Krayejoggi Nr. 158 | Fasnachts-Ussgoob 2006
Mr mechte e baar, fiir unseri Clique wichtigi Mensche und ihri Mitaarbed nöcherbringe.
Dr Aafang mache mer mit em Werner Laubi, wo uns allne als «Zeedel-poet» bekannt isch.
Ruth: Werner Laubi, Zeedeldichter – Värslibrinzler e ganz e wichtigi Person für e Clique. Wie wird me das? Wie lang dichtet dr Werner Laubi scho Zeedel für d Spale?
Werni: 1952 hett dr Oobmaa vo dr Junge Spale – dr Ernst Schäpperle zu mer gsait:» Du hesch in de letschte Joore e baar glatti Ladärnevärsli dichtet. Vo jetzt aa kasch dr Zeedel schryybe». Sällmool bin y 17 Joor alt und in zwaite Joor KV-Stift gsi. Sitt 1948 han y bi dr Junge Spale pfiffe. Vo 1952 ewägg ha y bis 1964 dr Zeedel fi die Junge gmacht. Myy Lehrmaister isch dr Bolo Mägli, e sälbetsmool stadtbekannte Journalist gsi. Är hett dr Zeedel fir dr Stamm brinzlet und mir gsait, wie me rächt ryyme duet und dass me sich d Värs luut vorsaage miess bis dr Rhythmus stimmi. «Zeedel muess me eso schryybe, wie ain wo Karrikaduure zaichnet. Me muess Fantasyy ha, suscht gohts nit». 1963 ha y, als Noochfolger vom Bolo, agfange dr Zeede fir dr Stamm z schryybe. Und
bi dr Grindig vo dr alte Garde anno 1978isch au dr Zeedel vo den Alte a mr hange bliibe. Y bi also, wenn me d Fasnacht 2006 derzue nimmt, syt 54 Joor
dr Spale-Clique-Värsli-Brinzler. Alles in allem han y 86 Zeedel gschriibe. (mehr …)
Bravo, bravo, bravo… sensationelle Organisation haben die beiden OK Teams von the GAME und Spaledörli06 hingelegt.. es jagte sich ein Höhepunkt nach dem andern…
Im intärnen Konkurrenzkampf the GAME zeigten die Jungen ihre Überlegenheit und siegten, wenn auch nur knapp vor dem Stamm… nächstes Jahr wird sich die Revengegelegenheit wieder bieten
Das Spaledörli glich praktisch der vorgezogenen Aufführung vom diesjährigen Monschter.. mit Prolog und Epilog der an Dichtung und Vortrageart dem Orginal in nichts nachstand.. kein geringerer als dr Schorsch vom Hafebeggi 2
entlockte uns die Lacher und mit der Wundergugge, den Octopuls und den Lumpesammler entlud sich nach der Pause ein musikalisches Feuerwerk.. Die Altigarde glänzte mit dem Krajejoggi der Stamm veruchte sich zusammen mit den Jungen an der Daagwach und lieferte dann aber einen satten Nunnefurz als Entschädigung.. Trommlerautritte aus den eigenen Reihen, die Haaneburgerli und der allerletzte Auftritt der Sensitives würzten den Anlass noch zum vollendenten Intärne06…
Was bleibt zu sagen als ein riesen Dankeschön an die Organisatoren es war a day to remember!!!
Statist: Weniger Lärm! Weniger Gestank! Schöneres Basel ohne Fasnacht. Initiative zur Abschaffung der Fasnacht! Jetzt unterschreiben!
Hofnaar:
Jä gohts dir eigentlich no guet?
Du hesch meini scho no Muet,
eifach do in d Steine z stoh
und sone Schyssdrägg use z loh!
I frog mi mängisch bi eych Schwoobe
ebs nit richtig tickt dert oobe!
Wenn ihr Gugge nit gärn diend heere
und eych d Fasnacht sooo duet steere,
denn leend uns doch eifach elai
und blybet vo Afang ah dehei!
I weiss, es isch schwer zem begriffe
aber d Gugge, s drummle, s pfyffe
ka dr z Basel kein verbiete!
Do kasch no lang so umewiete!
D Fasnacht do bi uns am Rhy
het Tradition und Poesie!
In allne Medie schreye sie s ume
unseri Gsellschaft sig am verdumme!
Äggschen und Internet – vo morge bis z nacht!
Anstatt as me ebbis sinnvolls macht
wird permanänt nur konsumiert
was s Färnseh eim grad präsentiert.
Die hyttig Gsellschaft isch verdorbe
d Kultur vor hundert Joohr verstorbe
und statt as me s Härz mol aggtiviert
wird nur dr Gwünn no maximiert!
In dr hyttige Wält findsch doch fascht kein
wo sich no yysetze duet fir sy Verein!
„Ou sorry du, fir hyt mäld i mi ab!
I bi no am schaffe, es wird susch so knabb!
Und morn wird i dängg au nit kenne ko
I ha drum grad e neys Natel bikoh!
Weisch, i bi nämlig gsi go shoppe
Und jetzt gangi zu mim Fründ go…”
I weiss, was de jetzt dänggsch – i finds jo au dernääbe
aber e so hetzt me hytzedaags durchs Lääbe!
Me segglet zem Drämmli, dr Bligg uf dr Uhr
me isch Dail vo dr Masse, ohni Kontur
schaffe, ässe, schaffe und sofort wieder hai.
Jede und jedi ganz fir sich elai!
Doch eimol im Joohr, im Meerze oder Hornig
isch d Wält fir drey Dääg wieder in Ornig.
Wenn nämlich s Martinsgleggli vieri schloht
und in dr Stadt no s Liecht abgoht
ka uf dr Wält passiere was will
z Basel stoht d Zyyt denn still.
Wärend dr Fasnacht – do, bi uns am Rhy
stoht me allewyyl no gmainsam yy
well me als Bebbi schnäll verstoht
as es gmeinsam besser goht!
Am Mäntigmorge elai go starte?
Ohni uf dr Räschte z warte?
Nai! Do kasch di nit separiere
dr Morgestraich muesch zelebriere!
Wenn in vier Wuche die glaine und die grosse
wieder ruesse in de Gasse und de Strosse
und mir e Joohr uf d Rolle nämme
denn schrumpft dr Globus wieder zämme!
Dryssig Daag bis das Gleggli wieder schloht
E Zyyt wo nit schnäll gnueg vergoht!
Und kunnt denn ändlig dr magischi Momänt
isch d Fasnacht fascht scho wieder z Änd…
Aprospos Änd – jetzt ischs sowyt
es isch au allerheggschti Zyyt!
s Programm wär somit verby
aber e Schlusswort muess halt scho no sy!
DU bisch d Fasnacht und drum wämmer hoffe
au du sigsch im Meerz „drey Daag offe!”
Mir hänn am 9.12.05 im Käller s’zweite Mool e Gutzi-Party gmacht und die wo drbi gsi sinn-leider sinn das nit esone Huffe gsi-hänns schampar luschtig ka und die Gutzi wo’s gäh hett-himmlisch. Dr Bryys fir die beschte Gutzi isch an d’Ursi Rund für ihri Orange-Schnittli gange. Einfach unbeschrieblig und fantastisch guet sinn si gsi. Alli 11 awäsende Erwaggsene und die 4 Kinder hänn noch dr Prämierig denn ihri Gutzibüxene könne mit däne viele feine Gutzi fülle. Super wenn me mit einere Sorte kunnt und mit 11 Sorte heimgoht.
Allne Gutzibaggende Fraue und Männer härzligge Dangg firs bagge und firs ko – y hoff uff e Wiederholig im 2006.
e Gutzifrau