Spale-Clique

S Glygge Grimpeli het au dasjoor wieder uf dr Schütze stattgfunde und s het zwei Spale-Teams gäh, wo sich mit de anderne Fasnächtler im Schutte gmässe hänn.

In dr Kategorie Binggis sinn sächs jungi Spalemer als Krayejoggelis ahträtte und hänn am Samschtig drey Sieg in drey Spiel könne fiire. Und das, obwohl sie kei Uswächselspieler kha hänn. E super starki Leischtig! Die zweiti Partie hänn sie sogar 8:0 gwunne – acht Gool muess me zerscht moll schiesse innerhalb vo 15 Minute! Und so hänn sie mit 9 Pünkt und eme Goolverhältnis vo 14:2 souverän d Zwüscherundi am Sunntig erreicht.

In dr Kategorie Gmischti isch wieder s Team Schölölö-Spale am Start gsi. Vo Ahfang ah isch klar gsi, dass es am Samschtig nit eifach wird. D Organisatore hänn quasi e Hammer-Grubbe gschaffe und d Erwartige sinn also nit bsunders gross gsi. Nachem Sieg im 2017 und em Out letscht Joor in dr Vorrundi het me sich uf fascht alles gfasst gmacht. S erschte Spiel het Hoffnige gmacht, will me grad mit 3:1 het könne gwünne. Leider het dä Sieg aber au e Opfer brocht – s Knü vom Däge het nochärt nümm so welle. Drum isch är denn im zweite Spiel ins Gool. Do hets  e Unentschiede gäh und d Chance uf d Qualifikation füre Sunntig isch immer no do gsi. Im Dritte Spiel hets s  erschte Duell gege d Schnooggekerzli gäh. Leidr ischs abr füre Däge au im Gool nümm wytergange und wills kei männliche Uswäggselspieler kha het, het ei  Frau meh ufs Fäld miesse. Trotzem guete Kampfgeischt hets e 2:1-Niederlag gäh.

Die Hammer-Grubbe het wirkligg  ghalte, was sie versproche het. Alli vier Teams hänn sich in dene drey Spiel vier Pünggt erspielt und somit ischs ufs Goolverhältnis druf ah ko. Erstuunlich abr wohr: Das vo dr Spale ischs Beschte gsi!!!! Und so hänn sie sich, wie d Binggis, als Grubbe-Erschte für d Zwüscherundi am Sunntig qualifiziert. Juhuuii!

Zur optimale Vorbereitig ufe Sunntig hänn sich d Schütteler denn no am Spalebärg ufe Pizza und e Bierli troffe und mit Après-Soleil d Sunnebränd e bitz bekämpft. Meh odr weniger erfolgrich…

Am Sunntig sinn denn alli wieder am Start gsi und s het sogar no Verstärkig gäh für die Gmischti. Für beidi Teams ischs loos gange mit dr Zwüscherundi. D Binggis hänn au am Sunntig kei einzigs Spiel vrlore, doch leider hänn die drey Unentschiide knapp nit füre Halbfinal glänggt! Abr wie s OK so gärn gseit het: Sie sinn trotzdäm Gwünner, will s het an däm Wucheänd keini Vrlierer gäh!

Die Gmischti Grubbe isch wieder miteme 3:1-Sieg gstartet und au s zweite Spiel hänn sie mit 2:1 gwunne. Dr Halbfinal isch scho so guet wie sicher gsi. Im dritte Spiel isch s wieder gege d Schnooggekerzli gange und Schölölös sinn barat gsi für d Revanche. Das isch leidr bitz in d Hoose, s Spiel het 3:0 gändet… und nit für d Spale. Trotzdäm hets fürs Halbfinal glänggt und au dört het wieder e bekannte Gegner gwartet: D Optimischte. Gege die het me am Samschtig unentschiide gspielt und dangg dr Verstärkig sinn alli positiv in die Partie gstartet. Und tatsächlich: Wo s Spiel nach 15 Minute fertig gsi isch, hets gheisse: „Schölölölö Schölölölö FI-NA-LE!!!“ D Freud übere Finalihzug isch riesig gsi.

Und wär isch ächt dr Final-Gegner gsi? Genau, d Schnooggekerzli! Und die hänns uns erscht rächt welle zeige, schliesslich hänn sie scho vor 2 Joor gege uns dr Final vrlore. S het au lang drnoch usgseh, will s 1:1 vo dr Spale isch erscht rächt spoot gfalle. Also ischs zum Penalty-Schiesse ko. Das isch nüt gsi für schwachi Närve. Dangg em überragende Pascal im Gool  und sichere und ultracoole Penalty-Schütze hänn d Schölölös das Grimpeli tatsächlich wieder gwunne und dr Pokal könne mit heime näh!!!!!!! Grossartig! Härzliggi Gratulation an alli Spieler und Spielerinne –Ihr sinn wirkligg Gwünner! 😀

(Stephi)

(mehr …)

Mit eme trockene und kalte Morgestraich wie us em Bilderbuech het am 11. März d Fasnacht 2019 agfange. Nachdäm am Sunntig durch dr Sturm e Tragholm vo dr Ladärne beschädigt worde isch, sin alli erlichtert gsi, dass nach einige Überstunde vo diverse Lüt, die scheeni Lampe parat und voll funktionstüchtig rächtzittig am Spalebärg gstande isch. Dr Mäntig-Nomidaag het denn ganz und gar garstig agfange mit eme veritable Schneesturm und sehr viel Wind, so dass d Lampe erst in dr 2. Cortège-Hälfti drzue gstosse isch. Es macht ebbe scho öppis us! Dr Zug vo de wisse Blätzli-Bajass het überall für Uffsehe gsorgt, erst Rächt mit de (LED-)Fackle in de änge Gasse am Obe. Au am Mittwuch simr vo kurze aber heftige Windstöss und Rägeperiode nid verschont blibe, dennoch sin die allermeiste Goschdyym bis zum (Räge-Räppli-Matsch-)Oobe erstunlich wiss blibe. E Highlight au das Joor: dr Monsterzug zämme mit de Junge und dr AG! So langsam isch denn aber au dr Ändstraich nöcher koh. Punkt 4ri am Donschdigmorge het d Spale Fasnacht 2019 mit em Basler Marsch uf em Rimmeli ufghört. Scheens ischs gsi!

(mehr …)

Au in däm Joor het s Glygge Grimpeli wieder uff dr Schützematte stattgfunde. Leider gits daas moll kei so erfreulichi Brichterstattig wie im letschte Joor.

In dr Kategorie Gmischti isch s Team „Schölölölö-Spale“ wieder ahträtte und hätt im beschte Fall welle dr Titel verteidige. Het s Team letscht Joor no könne als Underdog überzüge und überrasche, ischs daas Joor mitem Druck als Titelverteidiger nit zschlaag kho. Das isch sicher drah gläge, dass grad drei wichtigi SpielerInne verletzigsbedingt gfählt hänn.
S erschte Spiel het me zwar no mit 1:0 könne gwinne, im zweite hets denn aber e kleini Klatsche gäh. Grad mit 5:1 ischs Spiel ufgrund vonere miserable Abwehrleischtig vrlore gange. Au dr starggi Gooli het do nüt meh könne richte. Im dritte Spiel hets lang nacheme 2:2 Unentschiide usgseh, doch kurz vor Schluss het dr Gegner doch no s 3:2 gmacht. Somit isch me mit 3 Pünggt ufem 3. Platz glandet. Wyter ko sinn jewils die zwei erschte Plätz vo jedere Grubbe und die zwei beschte Drittplatzierte. Also het me miesse bis am Schluss warte und zittere obs nit villicht doch no längt. S isch denn saumässig knapp gsi. E andri Mannschaft het glych vyyl Pünggt kha und au s glyyche Goolverhältnis, sie hänn aber meh Gool gschosse und hänn sich somit für d Zwüscherundi qualifiziert. Somit ischs Grimpeli für d Schölölölös scho am Samschtig vrbi gsi…
Wirkligg druurig isch aber niemerts gsi und dr Oobe isch bim gmieltiche Grilliere im Garte usklunge worde.

Au in dr Kateorie Schutter het d Spale e Mannschaft könne stelle. Die Frèsche-Spale-Kickers mit doppleter Unterstützig us dr JG sinn ebefalls erfolgriich miteme 3:1-Sieg ins Turnier gstartet. Nochärt hänn sie leider au zwei Niederlage müesse ihstegge, bevors denn im vierte und letschte Spiel e einzigs Gool-Festival gäh het. D Frèsch hänn dr Gegner grad mi 12:1 vom Fäld gfäggt. Leider hets trotzdäm nüt gnützt und au d Schutter sinn scho am Samschtig usgschiede. Ufem 4. Platz hänn sie d Qualifikation knapp verpasst. Aber wie bi dr Gmischte isch au bi de Schutter d Enttüschig schnäll wieder verfloge.

Immerhin wird s au näggscht Joor wieder e Glygge Grimpeli gäh, wo hoffentlich au die Junge Spalemer ihri Fuessball-Künscht wieder könne unter Bewiis stelle…

(mehr …)

Gschmiert wird uff dr ganze Wält,
es goot um Macht, um seer vyyl Gäld,
doch au bi uns in dr Regioon,
griegt männge no e ‘Extra-Loon’.
Unverstyyrt und Baar uff d Flosse,
soo wird dr Bulver-Zuestupf gnosse,
egaal ob Doggter-Thittel oder Bolytigg,
d Schwyz als Banane-Rebubligg
D BVB isch gaar kai Lämmli,
die schmiere nämmli nit nur d Drämmli.
Dr Wessels schmiirt, es isch zem gruuse,
iber d Douane bis wyt ins Alsace uuse.
Dr Blatter schwätzt si FIFA rain,
laider verstoot dr Seppli kain.
Nit suuber isch sy Dialäggt,
und was äär – bigott – bezwäggt.
Waisch du, dass daas gege s Gsetz isch,
und du esoo sämtligi Regle verletzisch?
De gheersch nit uff die Forbes-Thabälle,
sondern bi Wasser und Broot in e Zälle!
Und doch sait jeede in syym Beryych,
es isch mer glyych, wel i schmier glyych!

(mehr …)

Will d Fasnacht so frieh isch, het natürlich au s Offizielle wieder sehr frieh im Jänner stattgfunde. Vom 11.-13.01 hänn sich die muetige Fasnächtler uf dr Bühni mitenander gmässe. Natürlich isch au d Spale wieder verträtte gsi.

Bi de Junge im Einzel hets dr Nerea Petretta vo de Binggis miteme wunderschöne Arabi uff dr undanggbari 7. Platz in dr Vorusscheidig glängt. Sie het somit dr Final bi ihrer erschte Teilnahm nur um ei Platz verbasst. Das isch e grossartigi Leischtig!!

Bi de Alte isch d Dominique Saladin in dämm Joor die einzig gsi, wo ellei uff d Bühni gstande isch. Fürs Final hets leidr nit ganz glänggt, abr au dr 9. Rang isch e super Resultat.

S isch e bitz ungwöhnt gsi, dass am Donnschtig nachem Einzel denn d Vorusscheidige vo de Grubbe stattgfunde hänn. Bi de Alte Tambuure Gruppe sinn dr Liam Berns und dr Nicola Langlotz vo dr JG zämme miteme Extärne ahträtte und hänn sich ufe 12. Blatz drummlet.

Bi de Alte Pfyffergrubbe isch d Spale zwei moll vrdrätte gsi. Dr „jüngere“ Grubbe mitem Pascal Sarti, dr Dominique Saladin, Florence Saner, Sandra Rudolf, Céline Saladin und Stephanie Hediger hets wie scho letscht Joor wäge eim Blatz nit ins Final glänggt und sie hänn sich miesse mitem 4. Blatz zfriide gäh. Besser ischs dr „ältere“ Grubbe gloffe. D Nicole Meyer-Lehner, Sarah Ziegler, dr Florian Stähli, Laurent Burdet, Niggi Zittel und Flavio Magliozzi hänn sich könne fürs Final qualifiziere.

Am Fritig isch denn zerscht d SoloDuo Konkurränz ufem Plan gstande. Au dört hets vyyli tolli Resultat gäh, au wenns dasjoor leider niemerem für ins Final glänggt het.

Dr Florian Stähli und dr Daniel Heutschi vo de JB Santihans hänn sich ufe 17 Blatz pfyffe und drummlet. Dr Olivier Boog isch zämme mitem Roman Zehnder vo de Muggedätscher ahdrätte und het dr 14. Blatz gsicheret. Mitem Christian Walk und em Patrick Meyer vo de Gääle Daggel isch e witers Duo mit Spalebeteiligung uff dr Bühni gstande. Für sie hets dr 12. Blatz gäh. D Dominique Saladin und dr Dominic Plattner vo de Naarebaschi hänn mitem 8. Blatz s Final nur knapp vrbasst, will die beschte 6 hänn am Samschtig nomoll dörfe ufdrätte. Ebefalls dr 8. Blatz im andere Saal hets fürs einzige komplette Spale-Duo gäh. Dr Florian Hediger und dr Pascal Sarti hänn nit nur dr Goschdympriis gwunne (wenns ein gäh hätt), sondern hänn au pfyfferisch und drummerlisch könne überzüüge. D Stephanie Hediger het zämme mitem Luca Müller vo de Basler Rolli s Final nur um ei Blatz verpasst und hänn sich könne über dr 7. Rang freue.

Zum Schluss isch no die „jüngeri“ Pfyffergrubbe zämme mit em Florian Hediger, Sascha Herzog und em Manuel Martinelli (Männli) in dr Gmischte Konkurränz ahdrätte. Bi dr Finalbekanntgoob ischs denn richtig luut worde, wo tatsächlich ihri Startnummere ufgruefe worde isch. Au sie hänn am Samschtig nomoll dörfe „ein uuse loh“.

Am Samschtig isches denn sowyt gsi: D Pfyffergrubbe het miteme schöne Fritzli s Podescht knapp vrbasst und dr 4. Platz erreicht.

Die Gmischti het sich über dr 5. Blatz könne freue und das isch grossartig gsi. D Freud isch bsunders bim Männli und dr Florence gross gsi, will sie ihre allererschte Zinnbächer hänn dörfe mit heim näh!

Wieder ei moll meh ischs e ufregends und tolls Wucheänd gsi. An dere Stell härzliggi Gratulation allne wo mitgmacht hänn und vyyle Dangg allne treue Fäns, wo d Teilnähmer immer grossartig unterstütze.

Mir hoffe, dass es au näggscht Joor wieder einiges zum Juble und Schreie wird gäh und freue uns scho jetzt uf zahlrichi Spalemer uf dr Offizielle Bühni im 2019.

(Stephi)