Kum doch zer Spale

Kum doch zer Spale

           

jg_flyer

Hett di s Fasnachtsfieber paggt? Bisch e Maitli oder e Bueb ab dr erschte Klass? Wottsch au Fasnacht mache? Denn bisch bi uns genau richtig!
In unserer Junge Garde kasch mit e huffe andere Junge s Ghaimnis vo dr Fasnacht entdecke. Du leersch bi uns in dr Pfyffer- und Drummelschuel au alli Grundlage zem aggtiv an dr Fasnacht z pfyffe und z drummle. Über 70 Buebe und Maitli sin in de letschte Joor jewyls an dr Fasnacht bi dr Spale mitgloffe. Dodermit isch unseri Jungi Garde eini vo de gröschte z Basel. Fir Dich bedyttet das, as du – näbem pfyffe und drummle leere – vyyli neyi Fründe kasch finde! Fasnacht in somene grosse Huffe mit vyyle Kollege z mache isch dr Hammer!

P.S.: Falls du scho 18 Joor alt bisch: Au dr Stamm suecht no neui Mitglieder für dr Vortrab: Mehr Infos.

 

 

 

D‘ Fasnacht vo dr Junge Garde

Jewyyls in dr Zytspanni vo Mitti Februar bis Mitti März sin „die drey scheenste Dääg“ z‘ Basel. Die Jungi Garde lauft am Mäntig-Morge Punkt vieri am Spalebärg ab. Am Nomidaag isch denn dr Cortège agseit, bevors nachem Znacht bis maximal em 10ni (Mäntig) oder 12i (Mittwuch) zobe mit em Gässle wytrgoht. Am Zyschdig isch jewyls spalefrei. Obligatorisch für d Afänger sin dr Mäntig- und Mittwuchnomidag. Begleitet wärde d Kinder vome erfahrene Zugchef und freiwillige Eltere. Wyteri Infos und Richtzytte findsch im Spalebiechli oder in dr Fasnachts-Usgoob vom Krayejoggi. Für e Ydruck wie dr Zug vo dr Spale JG in de letschte Joor usgseh het findsch unde e Liste mit Links zu de Fasnachtsbricht im Archiv.

Die letschte Sujets vo dr JG an dr Fasnacht:


E Cliquejoor: S lauft immer öppis

gottfried-keller-schulhaus

Iebige im Gottfried-Käller Schuelhuus

Jewyyls am Donschdig-Oobe vom 19.00 bis am 20.00 finde d Iebigsstunde für alli Junge statt. Egal ob de lernsch drummle oder pfyffe: erfahreni Instruktorinne und Instruktore bringe euch dr Umgang mit em Instrumänt und d’Fasnachtsmärsch us em Repertoire vo dr Spale by. Dr ersti Marsch zum lerne isch dr Arabi, mit was es drnoch wytergoht, gsehsch do in dr Übersicht vo unserem Clique-Repertoire.

 

Spalapfi

S Spalapfi isch s coole „Spale-Lager-An-Pfingste“, wo me freiwillig mit de Gspänli us dr JG und erfahrene Lagerleiter vom Stamm während 3 Daag ka zämme ins Pfingst-Lager go. E super Sach, mit villne spannende Projekt, Theme und Usflüg. Wotsch meh wüsse? Denn findsch do Spalapfi-Bricht us de vergangene Joor.

 

Glyggegrümpeli

Jewyls im Juni findet s traditionelli Glygegrümpeli statt, wo d‘ Spale jedes Joor e Hampfle an Fuessball-Mannschafte in de verschidenste Kategorie stellt. Dr Höhepunkt isch im Summer 2013 gsy, wo d „Spaladies“ JG-Mannschaft s Turnier in ihrere Kategorie gwunne het.

 

Fasnachtsvorbereitige

Nach de Summerferie könne alli Kinder vo dr JG Sujetvorschläg yyreiche und denn über ihr Sujet abstimme. S Bastelteam kreiert und organisiert denn e Larve und Goschdym, wo aber no lang nid fertig sind. Je nach Sujet dien d‘ Kinder d‘ Larve sälber bemoole, Basthoor für d‘ Larve knüpfe oder anderi Sache für d‘ Fasnacht gmeinsam im Spalekäller bastle. S Goschdym isch bereits fertig gnäit, je nach Sujet isches aber erwünscht, wenn d Kinder no eigeni Accessoires am Goschdym dien befestige.

 

Intärns

Nach dr Wiehnachte stygt s Fasnachtsfieber und dorum findet ca. Mitti Januar denn s Intärne vo dr Spale statt – unseri eigeni Vorfasnachtsveranstaltig. Am Nomidag isch „Konkurränz“ d.h. alli Kinder vo de Binggis und dr JG stöhn einzeln oder in Gruppe uf d Bihni und trage e Marsch vor, wo denn vonere kompetänte Fachjury bewärtet wird. Nachem Znacht gits denn d Rangverkündigung und aschliessend e rychhaltigs Oobeprogramm mit Uftritt vo in- und extärne Gruppe/Schnitzelbängg/Guggemusik etc.

 

Offiziells

S‘ Offizielle isch s Pryyspfyffe und -drummle vo allne Pfyffer und Tamboure us Basel. D‘ Spale stellt regelmässig e grossi Azahl Teilnähmer us dr Junge Garde und em Stamm, wo sich dört mit andere Fasnächtler dien mässe. Regelmässig isch d Spale au in super Räng vom Medalliespiegel verträte. Wenn de meh wotsch wüsse, findsch do die letschte Bricht vom Abschnide vo de Spale-Teilnähmer am Offizielle.


Kontakt

Hämr di Interässe gweckt? Hesch au du Lust in dr Spale Fasnacht z mache und e Instrumänt z lerne? D‘ Yschrybige sin an de drei Samstig (11.3, 18.3., 25.3.) nach dr Fasnacht jewyls vom 14.00 bis am 16.00 am Nomidag im Spalekäller an dr Schützemattstroos 16a. Mir freue uns uf di!

Benjamin Stähli, Obmaa Spale JG

076 337 80 77
benstaehli (at) gmx (punkt) ch

Dr ganzi JG-Vorstand findsch do.